Ingerlatseqatigiiffiit nunatta aningaasarliorneranut toqqaannartumik pissutaaqataapput

Ukiuni tulliuttuni sisamani ingerlatseqatigiiffiit iluanaarutaannit nunatta karsiata isertitassaralui milliardip affaangajaanik Naalakkersuisut appartittariaqarsimavaat.

LÆS OGSÅ: 

RG med sammenlignelig soliditet som i 2009

Naalakkersuisut aningaasanut inatsisissatut 2026-mut siunnersuutaanni nassuiaatini atuarneqarsinnaavoq iluanaarutinit isertitassatut naatsorsuutigineqartut aningaasanut inatsimmi ukioq mannamoortumi tunngavigineqartunut naleqqiullugit annertuumik appartinneqartut. 

Piffissami 2026-2029-imi missiliuilluni 780 millioner koruuninik missaanut naliliilernermut taarsiullugu, maannakkut ataatsimut katillugit 320 millioner koruunit  missaat naatsorsuutigineqalerput, piffissami pineqartumi 460 millioner koruuninik appariartussanngorlutik.

Iluarsiinerup naatsorsuutigineqartup ersersippaa ingerlatseqatigiiffinni arlalinni ilaatigut ikinnernik iluanaaruteqartoqartoq, ilaatigullu patajaallisaanissamik aningaasaliinissamillu annertunerusumik pisariaqartitsisoqartoq Naalakkersuisut ilaatigut nassuiaapput.

Royal Greenland aningaasaqarnerminik iluarsiiniaruminaatsitsivoq

LÆS OGSÅ: 

Chok-regnskab: Historisk underskud i Royal Greenland

Naalakkersuisut nassuiaanertik nangillugu allapput Royal Greenlandip 2024-mi assersuutigalugu 265 millioner koruuninik amigartooruteqarsimasoq, ingerlatseqatigiiffiillu soorlu KNI Tusassilu iluanaarutinik akiliuteqarnissaat naatsorsuutigineqanngitsut imaluunniit piffissap ilaani annikitsumik iluanaaruteqassallutik. Tamannalu Nunatta Karsiata ingerlaavartumik aningaasaliiffigineqarneranut toqqaannartumik kinguneqartoq erseqqissaatigineqarluni.

LÆS OGSÅ:

Ja til Royal Greenland-millioner

Arlaleriarlutit erseqqissaatigivat pisortat ingerlatseqatigiiffiutaanni iluanaarutinit pissarsiassat naatsorsuutigisaraluamut sanilliullugu appartinneqartariaqarsimasut, tassanilu immikkut aamma taavat Royal Greenland. Kisianni Royal Greenland aalisarnermut inatsimmi aalisartitseqatigiiffinnut allanut aamma namminersortunut sanilliullugu immikkut inissisimatinneqarpoq. Royal Greenland 2009-mi pisimasumik uteqqiilerpa, taamanimi milliardip affaanik immikkut ittumik aningaasaliiffigineqartariaqarnikuummat?

- Paasissutissat maannamut pigisagut naapertorlugit, naatsorsuutiginngilarput Royal Greenland 2009-misut killiffeqassasoq. Ingerlaavartumik Royal Greenlandimit ilisimatinneqartarpugut aningaasaqarnikkut nalimmassaaniarluni sulissutiginninneq sumut killinnersoq. Tassuuna takusinnaavarput ingerlatseqatigiiffiup patajaatsunngorsaalluni sulinera iluatsikkiartortoq, taamaalillutalu naatsorsuutigisinnaagipput sinneqartoortaleqqissasoq sinneqartoorutiminillu inuiaqatigiinnut kalaallinut tunniussaqartaleqqissasoq siunissami qaninnermi, kisianni erseqqissaatigeqqissavara naatsorsuutiginnginnatsigu 2009-misut pisoqarumaartoq.

- Ullumikkutut ingerlaannarsinnaajunnaarpugut

2026-mut aningaasanut inatsisissatut siunnersuutip avammut tusarliunneqarneranut atatillugu aningaasaqarnermut akileraartarnermullu Naalakkersuisup pingaarnertut oqariartuutaa tassaavoq "ullumikkutut ingerlaannarsinnaajunnaartugut".

Taamak Naalakkersuisut oqariartuuteqarnerat aamma Namminersorlutik Oqartussat ingerlatseqatigiiffiutaannut tunngavoq, taakkumi assigiinngitsunik pissutilimmik sinneqartoorutinit nunatta karsianut tunniussassaminnik tunniussisinnaanerat killeqalersimammat.

Múte Bourup Egede sukannersumik erseqqissaavoq ingerlatseqatigiiffiit pilersinneqarsimasut inuiaqatigiit kalaallit kiffartuutissallugit, taamaammallu Naalakkersuisut tungaannit naatsorsuutigineqartoq ingerlatseqatigiiffiit tamanna qiteralimmiorilluinnassagaat aammalu pingaartitsissasut inuiaqatigiinnut utertitsinissaminnik.

- Ullumikkut nutaamik eqqarsartariaqalerpugut iliuutsitoqqallu qimattariaqalerpagut, tamanna aamma ingerlatseqatigiiffinnut tunngavoq. Ingerlatseqatigiiffiit minnerpaamik ilisimasariaqarpaat aningaasatigut iliuutsitik, ajunngitsumik ilungersunartumilluunniit kinguneqaraangata, tamanaa aamma inuiaqatigiiinnut sunniuteqartarmat, tassa ingerlatseqatigiiffiit aningaasaataat tassaammata inuiaqatigiit kalaallit aningaasaataat, taamaammallu ingerlatseqatigiiffiit annaasaqarsinnaallutik iliuuseqaraangata tamanna aamma isumaqartoq inuiaqatigiit annaasaqaatigisinnaagaat, aningaasaqarnermut Naalakkersuisoq erseqqissaavoq.

AAMMA ATUARUK:

– Chile isertitaqarfiusinnaasoq neriuppunga – taamaanngippat qimassavarput

Matumani aamma Royal Greenland, assersuutigiinnarlugu Chilemi aningaasarpassuarnik annaasaqarsimasoq immikkut ittumik aningaasaqarnermut akileraartarnermullu Naalakkersuisumit, Múte Bourup Egede (IA)-mit eqqaasinneqarpoq:

- Assersuutigiinnarlugu Royal Greenland nunatta avataani aningaasarpassuit atorlugit aningaasaliisaqattaarnikuuvoq annaasaqaatigerujussuakkaminik, taamaammalluuna aamma ingerlatseqatigiiffik aningaasarliorujussuartoq qajannartumik inissisimalissutigisaminik. Pissutsit taamaannerat Naalakkersuisunit eqqumaffigisorujussuuarput. Tassami inuiaqatigiit pigisaat inuiaqatigiinnut aamma iluaqutissiisussaapput!