Inissiarsuarmik sumiginnagaasunik tigusineq taamaatinneqartoq
Kommuneqarfik Sermersooq Paamiuni inissiarsuarnik Namminersorlutik Oqartussanit tigusinissamik suliniuteqarsimavoq. Inissialli iluarsaanneqarnissaannut imminut akilersinnaanngitsutut nalilerneqarmata suliniut maanna taamaatinneqarpoq.
Kommuneqarfik Sermersuup Paamiuni Blok T Namminersorlutik Oqartussanit iluarsaanniarlugu tiguniarlugu sulisimavoq. Assi Blok U-mit assilisaavoq.
Assi: Iserit A/S-ip Kommuneqarfik Sermersuumut oqaaseqaataaniit
Kommuneqarfik Sermersuup inissiarsuarnik sumiginnagaasimasunik aserorsimasunillu Namminersorlutik Oqartussanit tigusiniarluni suliniutini taamaatiinnarpaa.
Kommunip Paamiuni blok T-p aamma U-p misissorneqarnissaat 2023-mi isumagaa.
Blokkit ataatsimoortuupput Namminersorlutillu Oqartussanit isaterneqartussanngorlutik, Blok T-li inissianik 23-nik assigiinngitsunik angissuseqartunik sanaartornissaq siunertaralugu iluarsaanneqarsinnaasoq kommunip misissuinerata takutippaa.
Kommuni naapertorlugu Blok T-mi inissiat attartorneqarsinnaasut ilaat 2023-mi misissuinermi atorsinnaalluarput.
Assi: Iserit A/S-ip Kommuneqarfik Sermersuumut oqaaseqaataaniit
Kommunilli aningaasaqarnermut ataatsimiititaliaa juunip pingajuani ataatsimiimmat, Blok T iluarsaanneqarani inissianik nutaanik sanaartornissaq innersuussutigineqartoq pisortat ataatsimiititaliamut ilisimatitsissutigaat.
Namminersorlutik Oqartussanik oqaloqateqarnermi „Kommunip isaterinermi aningaasanik immikkoortitsinissaq ajornarsisimagaa" ingerlatsivik ataatsimiititaliamut ilaatigut allappoq. "Aammattaaq inissiarsuit 2025-mi apriilimi ima aserfallassiamtigipput iluarsaanissaq imminut akilersinnaanani."
Iluarsaassinermut taarsiullugu Paamiuni inissianik minnerpaamik 14-inik nutaamik sanaartornissaq Namminersorlutillu Oqartussat suleqatigalugit inuusuttunut inissianik sisamanik sanaartornissaq sulissutigineqassasoq ataatsimiititaliaq aalajangerpoq.
