Innuttaasumit siunnersuut: Malik nutaamik naluttarfeqalersillugu allineqarli
Innuttaasumit siunnersuut Maliup naluttarfia nutaamik naluttarfittalimmik allineqarnissaa, tassani nunat tamalaat akornanni naluttarnermi unammiuaarnerit ingerlanneqarsinnaasussanngorlugit siunnersuut, politikerit aalajangiiffigisussanngorpaat.
Siunnersuutiginnittup isumaa malillugu, naluttarfik nutaaq ima isikkoqarsinnaavoq.
Assiliartalersuut: Siunnersuutiginnittup
Kommuneqarfik Sermersuumi Illoqarfimmik Ineriartortitsinermut Sanaartornermullu Ataatsimiititaq innuttaasup siunnersuutaa, tassa naluttarfik Maliup inuttaasunit amerlanerusunit katersuuffigisinnaasunngorlugu allilerneqarnissaanut siunnersuut, oktobarip 15-iani aalajangiiffigisassanngorpaat.
- Nunami immamik avatangiiseqartumi najugaqartuugatta nalunnermik ilinniarneq inuunermut pingaaruteqarluinnartuuvoq, innuttaasumit siunnersuut ilaatigut taama nassuiaateqarpoq.
Naluttarfik ukiuni 20-ni atorneqareerluni iluarsaanneqangajalerpoq, iluarsaanneqartullu nalaani matuneqartariaqassalluni.
Nunaminertaq piareersimavoq
- Kommuneqarfik Sermersuup ukiut 20-t sinnerlugit naluttarfiup kujataani nunaminertaq naluttarfimmut siunissami alliliissutaasussaq aalajangiusimasimavaa. Nunaminertaq taanna atorlugu naluttarfik Malik allilerneqarsinnaavoq naluttarfissamik nutaamut periarfissamik atuilluni, siunnersuuteqartoq nassuiaavoq erseqqissarlugulu nunat tamalaat akornanni nalunnermik unammiuaarnerit aamma kissaatigalugit.
- Nuummi takornariaqarnermut aamma pitsaassaaq sila atoruminaatsillugu illup iluani sammisassamik neqerooruteqarsinnaagutta. Soorluttaaq Nuuk nunat tamalaat akornanni nalunnguarluni unamiuaarnerni qaaqqusisuusinnaalissaaq. Tamanna suliffeqarfinnik pilersitseqataasinnaavoq soorluttaaq hotelini, neriniartarfinni, angallassinermi il. il. kaaviiartitsinernik pilersitsisinnaassasut, innuttaasup siunnersuutaanni allassimavoq. Siunnersuut Meeqqanut, Ilaqutariinnut Atuarfeqarnermullu ataatsimiititami politikerinit aamma aalajangiiffigineqartussaavoq.
Akikitsuinnaassanngilaq
Siunnersuuteqartup nassuerutigaa naluttarfiliorneq akikinnavianngitsoq. Naluttarfik siunnersuutigineqartutut allilerneqassappat ukiumut 167.000-it sinnerlugit atuisoqarsinnaavoq, tassa ullut tamaasa 500-t missaanniittunit atorneqarsinnaalissalluni.
- Kisianni Nuummi naluttarfimmik atuisut inuppassuit kisikkaanni, taava naluttarfimmik immikkoortumik naluttarfimmillu piusumik iluarsaassinermut aningaasanik illuartitsisoqarsinnaasariaqarpoq, siunnersuuteqartoq nassuiaavoq nangillunilu:
- Ilanngullugu namminersortut aningaasaliisuusinnaanerat eqqarsaatigineqarsinnaasariaqarpoq. Nuummi suliffeqarfiit soqutigisinnaavaat nammineq suleqatimik Nuummi nalerisimallutik atugarissaarnissaat. Aammattaaq aningaasaateqarfinnut qinnuteqartoqarsinnaasariaqarpoq Nuummi illoqarfiit pingaarnersaanni naluttarfimmik nutaaliaasumik nunani tamalaani naluttarfinnut piumasaqaatinik nallersuunneqarsinnaasunik, erseqqissaavoq.
Siunnersuuteqartup neriuutigaa iluarsaassinerup aallartinnginnerani naluttarfiup nutaamik allilerneqarnissaanut siunnersuut pisariaqartunit tapersersorneqassasoq.
- Piffissami taama sivisutigisumi naluttarfimmik matusiinnarneq, peqatigiiffimmik inuusuttunillu aallussisunik annaasaqarneq periarfissaanngilaq, naggasiivoq.
