Inuusuttut maligassiuisut qulit imminut toquttarnermik pinaveersaartitsissapput

Imminut toquttarnerup pinaveersaartinnissaanut Kommuneqarfik Sermersooq 3,5 million koruuninik ukioq manna immikkoortitsivoq, immikkut suliniut tassani maluginiarneqarluni. Aningaasat qanoq atorneqarnissaannik pilersaarummik suliassamik saqqummiussinermi Meeqqanut Inuusuttunullu Ingerlatsivik paasissutissiivoq.

Toqqaannartumik aamma toqqaannanngitsumik imminut toqunnissamik pinaveersaartitsinermik suliaqartoqartoq ilisimatitsissutaavoq. Innuttaasunik qanimut sullissisunik piginnaasanik ineriartortitsinermut aningaasaliisoqarniarpoq, taamaalillutik innuttaasunut imminnut toqunnissaminnut ulorianartorsiortunut ilaqutaasunullu ikiuisinnaalissammata. Tamanna Tasiilami, Nuummi, Ittoqqortoormiini Paamiunilu ingerlatsivinni pissaaq.

Immikkut suliniut inuusuttunik peqataatitsissaaq

Aammattaaq meeqqanut inuusuttunullu toqqaannartumik sammisassaqartitsinissamut suliniuteqarnissamullu aningaasaliisoqarsimavoq, qaammammi tulliuttumi immikkut ittumik suliniuteqartoqarluni, qulequtaqartumik: "Mountain Leader Training".

Inuusuttut qulit 18-ileereersimasut najukkami qaqqani sivisuumik pisuttuartitsisinnaalernissaannik ilinniartinneqassapput.

- Ingerlatsinermi inuusuttunut ilaatigut ataatsimoortussaatitaanermi inuunermi piginnaasaqalernermik, aalajaatsumik takkuttarsinnaanermik aamma inuunermi peqqinnartunik toqqaanissamut eqqarsaateqalernermik angusaqassapput. Inuusuttut akornanni qanimut ataatsimoorfeqarneq ingerlatsinermi pingaartumik eqqumaffigineqarpoq. Kingorna ingerlatsinermi peqataasut Tasiilami atuarfimmi atuartunut angajullernut isumassarsititsiniarlutik saqqummiissapput, tamanna Meeqqanut Inuusuttunullu Ataatsimiititap maajip 23-ani ataatsimiinnerani oqaluuserisassani atuarneqarsinnaavoq.

Mountain Leader Training assersuutigalugu atuarfimmi, fritidsklubbimi najukkamilu kommunip susassaqartitsinermut immikkoortortaqarfianik suleqateqarluni Tasiilami meeqqanut inuusuttunullu allanut pinngortitamiinnermi silamiinnermilu isumannaatsunik sinaakkusiinermi peqataanikkut inuusuttut qanoq inuttut ineriartornerminnik pitsanngorsaasinnaanerannut aamma eqqarsartaatsikkut tatitunerminnik pitsanngorsaasinnaanerannut periusissiami annertunerusumik ilaasussatut eqqarsaatigineqartoq, suliniutip nassuiaataani nangilluni allaqqavoq.

Maligassiuisut

Tassani inuusuttut Mountain Leader Trainingimeersut Tasiilami meeqqanut inuusuttunullu maligassiuisuussapput. Mountain Leader Training Tasiilami ataavartumik takornariartitsinermi, piniarnermi aalisarnermilu ineriartortitseqataasinnaalersitsissaaq, taamaasiornikkullu pinngortitamik pissarititaanillu atuinermik imminut pilersorsinnaanermut periarfissaqarnerulersitsissalluni.

- Inuusuttut akornanni imminut naleqartinnginneq, inuusuttut suliffissaaleqinerat, siunissamut periarfissakinneq piginnaanngorsarnissamullu aqqutissaqannginneq assigiinngitsutigut imminnut attuumassuteqartut Tasiilamilu inuusuttut ilaasa akornanni ulluinnarni neriuuteqannginnermik ilatsiinnarnermillu sunnerneqarfiusumik attassiinnartitseqataasut ajornartorsiutaapput. Mountain Leader Training aqqutigalugu Tunumi inuusuttunut pitsaasumik ineriartornissamut periarfissanik pilersitseqataasinnaavugut. Imminut pilersorsinnaanerunissamut aamma imminut naleqartinnerulernermut kinaassutsiminnillu nukittunerulersitsinissamut periarfissaqarnerulissapput, suliniut taama nassuiarneqarpoq.