KL

DK

NAALAGAAFFEQATIGIINNERMI ATAATSIMIINNEQ 2024

Issittumi sinniisoqarneq pillugu aaqqiisoqanngilaq

Kalaallit Nunaanni piffissami qinersinermi matumani naalagaaffeqatigiinnermut tunngatillugu ajornartorsiutaasut ilagaat issittoq pillugu allorissaaqatigiinniarnerup ajornakusoornera, Kalaallit Nunaat Kunngeqarfiup Danmarkip issittumi immikkoortua, misigisimavoq qaangiataarneqartarluni sunniuteqarsinnaanerlu killeqartoq.

Flag
Ukiuni arlalinni sivisuumi ataqatigiissumik ajornartorsiuteqarpoq Kalaallit Nunaata Danmarkillu akornanni arktiskimut aallartitaq pillugu. Maanna paasinarsivoq naalagaaffeqatigiit ataatsimiinneranni matumani aamma aaqqiissummik nassaaqatigiittoqanngitsoq.
Jensine Berthelsen
tusagassiortoq
Saqqummersinneqarpoq

Minutsit kingullerpaat tikillugit isumaqatigiinniartoqaraluarpoq, maannali pissutissalimmik pasitsannarsivoq Danmarkip naalakkersuisui suli malartaasertuarsinnartut Kalaallit Nunaata piumasaqaataanut, tassalu issittumi aallartitaq issittumi pissutsinik ilisimasaqarluartuunissaanik aammalu issittumeersuunissaanik minnerunngitsumillu Kalaallit Nunaata innersuussaanik issittumi aallartitaq toqqarneqartalissasoq.

Naalagaaffeqatigiit siuttuisa ukiumoortumik ataatsimiinnissaat sioqqullugu Naalakkersuisut siulittaasuat, Múte Bourup Egede (IA) Sermitsiamit oqaloqatigigatsinni mianersortumik isumalluarneraraluarpoq tamatumuuna issittumi aallartitaq pillugu aaqqiissummik isumaqatigiissuteqarsinnaassallutik.

Naalakkersuisut siulittaasuata ataqatigiissaarisoqatigiivi

  • Naalakkersuisut siulittaasuat,  Múte Bourup Egede (IA)
  • Nunanut allanut tunngasunut Naalakkersuisoq, Vivian Motzfeldt (S),
  • Aningaasaqarnermut akileraartarnermullu Naalakkersuisoq, Erik Jensen(S)
  • Inatsisinik atortitsinermut Naalakkersuisoq, Naaja H. Nathanielsen (IA)

Naalakkersuisuni sulinermi ataqatigiissaarisoqatigiit maanna Danmarkimiittut, peqatigiillutik ataatsimiinnermi matumani piumasareqqippaat issittumi aallartitaq Kalaallit Nunaanneersuussasoq.

- Kingullermik ataatsimiinnermi (2023-mi aasaanerani, aaqq.) suliaq naammassisinnaasimanngilarput. Kisianni ataatsimiititaliortitsivugut, taakkulu suliassamik suliarinnittussaapput innersuussillutillu, maannalu naalagaaffeqatigiinnermi ataatsimiinneq sioqqullugu, suliassaq naammassisussaavoq, tamatumalu malitsigisaanik Kalaallit Nunaat siunissami innersuussisinnaalissaaq kina issittumi aallartitaanissamut toqqarneqassanersoq, isumaqatigiissut malillugu, taamak naalaaffeqatigiinneq pillugu ataatsimiinneq sioqqullugu Naalakkersuisut siulittaasuat Sermitsiamut oqarpoq.

Maannali marlunngornermi Naalagaaffeqatigiinnermi pissutsit pillugit ataatsimiinnerit ingerlanneqareernerini isumaqatigiissuteqartoqanngitsoortoq paasinarsivoq.

Naalakkersuisut siulittaasuannit oqaaseqartitsinissarput Sermitsiamit sulissutigaarput.

danskit naalakkersuisui samfund naalakkersuisut inuiaqatigiit issittumi ambassadøri naalagaaffeqatigiinneq pillugu ataatsimiinneq

ATORFIIT Se alle jobs

Powered by Labrador CMS