Isummersortoqareersorlu Naleraq ilaasortaajunnaarsitsivoq
Knud Mathiassenip ammip qalipaataanik immikkoortitsisutut nipeqartumik oqaaseqareernerata kingorna Naleraq sisamanngornermi unnukkut ataatsimiingasuarpoq, Knud Mathiassenilu partiimi ilaasortaajunnaarsinneqarluni. Knud Mathiassen aamma nalunaarpoq Inatsisartunut qinigassanngorteqqinniarani.
Naleraq-ip sisamanngornermi unnukkut ataatsimiinneranni Knud Mathiassen-ip oqaaseqarnera tunngavigalugu partiimit peersinniarlugu aalajangerneqarpoq.
Assi: Leiff Josefsen
Naleqqap ilaasortaq ataaseq, oqaaseqaatai partii naapertorlugu ammip qalipaataa tunngavigalugu immikkoortitsinertut nipeqarsinnaaneri pissutigalugit, ilaasortaajunnaarsinniarlugu sisamanngornermi aalajangerpoq.
Taamatut aalajangerneq pivoq partiip siulersuisuunerisa ataatsimiititaliaatalu immikkut ittumik ataatsimiinneranni.
Naleqqami siulittaasoq Pele Broberg tusagassiuutinut nalunaarummi ilisimatitsivoq Naleqqami ilaasortaq ima oqaaseqarsimasoq: “Namminiilivikkutta qallunaat nunatsinniittut angerlakaassapput.”
Pele Brobergip tusagassiorfinnut nalunaarummini ilisimatitsissutiginngilaa ilaasortaq kina pineqarnersoq. Aviisimili Sermitsiami taama oqaaseqarsimasoq tassaavoq Knud Mathiassen, qinigaaffimmi matumani IA-mi ilaasortaajunnaartitaanermi kingorna Naleqqami ilaasortanngorsimasoq.
Pele Broberg aalajangerneq pillugu ima oqarpoq:
- Naleqqap tamaviaarutigaa nunatta Naalangaaffinngornissaa, tassanilu tamanut peqataatitsinissaq inuiaqatigiitsinnullu akuutitsinissaq qitiuvoq. Pisariaqartipparput Naalangaaffinngornissamut aqqut eqqortumik pilersaarusiorneqarlunilu naapertuuttuunissaa, inuit pisinnaatitaaffii aamma nunat tamalaat inatsisaat ataqqillugit. Nunaata ataqqinassusianik ataatsinmoortariaqarnitsinnullu innarliinissamik oqariartuuteqarnissaq inissaqanngilaq, Broberg tusagassiuutinut nalunaarummi allappoq.
Knud Mathiassen Facebookimini allappoq Naleqqamut nalunaarsimalluni partiimit tunuarluni qinigassanngortinniarnanilu.
Isumaqatigiilluni aalajangerneq
Knud Mathiassen 2021-mi qinersinermi 60-nit taaneqarpoq sinniisutullu Inatsisartunut ilaasortanngorluni. 2023-mi apriilimi nakuusernermut tunngatillugu unnerluutigineqarnini pissutigalugu Inuit Ataqatigiinnit ilaasortaajunnaarsitaavoq.
Knud Mathiassen eqqartuussivimmi nunattalu eqqartuussiviani pinngitsuutinneqarpoq. Knud Mathiassen 2024-mi januaarimi Naleqqami ilaasortanngornissami tungaanut, attaviitsutut inissisimavoq.
Naleqqami siulittaasoq Pele Broberg oqarpoq Mathiassenip ilaasortaajunnaarsinneqarnera ataatsimiinnermi peqataasut tamarmik isumaqatigigaat:
- Naleqqami Siulittaasutut innersuussinera tamakkiisumik Siulersuisuunernit taperserneqarnera qujassutigerusuppara. Siulittaasoq, Siulittaasullu tullia pineqartoq pillugu paaseqatigiiffiusumik tunuartitsineq anngunneqarluni naammassereerpoq, Pele Broberg oqarpoq.
