NAALAKKERSUISUT SIULITTAASUAT
Kalaallit ataatsimiinnernut pingaarutilinnut peqataatinneqanngillat
Nunat avannarliit siunnersuisoqatigiivisa Islandimi ataatsimiinneranut pingaarutilimmut Kalaallit Nunaat namminersortullu allat peqataatinneqanngitsut, Múte B. Egede (IA) oqarpoq.
Nunat avannarliit siunnersuisoqatigiivisa ulluni tulliuttuni ataatsimiinnerani pingaarutilimmi Kalaallit Nunaat nunallu namminersortut allat peqataatinnagit ataatsimiinneq ingerlanneqartoq Múte B. Egede allappoq, taassumalu naqissuserpaa Nunat Avannarliit Siunnersuisoqatigiivinik suleqateqarnertik suli uninngatikkallarlugu.
Assiliisoq: Leiff Josefsen
Sapaatip-akunnerani matumani Nunat Avannarliit Siunnersuisoqatigiivi 76-issaanik Reykjavikimi Islandimiittumi ataatsimiipput. Marlunngornermi Ukrainep præsidentia Volodymyr Zelenskyj aamma ataatsimiinnermut peqataasussaammat ataatsimiinneq immikkut maluginiarneqarpoq.
Naalakkersuisulli Nunani Avannarlerni Siunnersuisoqatigiinni peqataaniarnatik aalajangernikuugamik peqataassanngillat, Naalakkersuisut siulittaasuat Múte B. Egede ilisimatitsivoq.
Kalaallit Nunaat Nunallu Avannarliit Siunnersuisoqatigiivini namminersortut allat ataatsimiinnernut pingaarutilinnut peqataatinneqanngitsut taanna Facebookimi allappoq, tamannalu Múte B. Egedep peqataaffigerusunngilluinnarpaa:
- Ikinngummut naligiimmik pinninnissaq qanoruna ajornartigisimaqinersoq? Nunani avannarlerni suleqatitta nunat ilaat taama aperaakka.
- Tassami aammaarluta maanna suleqatigiinnermi tassani naligiinngitsumik pineqarneq misigigatsigu, naak ukiorpassuarni naligiimmik pineqarnissarput piumasarisarsimagaluarlugu. Nunarput nunallu namminersortut suleqatigiinnermi tassani, ulluni tulliuttuni nunat avannarliit ataatsimeersuarnissaanni ataatsimiinnerit ilaanni pingaaruteqarluinnartuni assersuutigalugu tikilluaqqusaagatillu peqataaqquneqanngillat, Múte B. Egede allappoq.
- Taamaattoqarsinnaanngilaq
Tamanna pissutigalugu Naalakkersuisut ataatsimiinnermut peqataanngitsut nangilluni allappoq:
- Taamaattoqarsinnaanngilaq – Taamaammat ulluni tullerni ataatsimeersuarnissaannut peqataassanngilanga, soorlu aamma Naalakkersuisuni ilaasortat allat peqataassamaanngitsut.
Danmarkimi nunanut allanut ministeri Lars Løkke Rasmussen marlunngornermi nunani avannarlerni nunanut allanut ministerit suleqatigisani Reykjavikimi ataatsimeeqatigissallugit nalunaarpoq, ilaatigut Ukrainemut tapersersuinerup ingerlateqqinnissaa Kangianilu Qiterlermi pissutsit eqqissiviilliorfiusut eqqartorniarlugit.
Nunanut allanut, isumannaallisaanermut illersornissamullu politikki pillugu ataatsimiinnermut Kalaallit Nunaata qaaqquneqarsimannginnera pissutigalugu, Nunat Avannarliit Siunnersuisoqatigiivini suleqatigiinneq Naalakkersuisut unitsikkallarniaraat Múte B. Egedep maajimi nalunaarutigaa.
Savalimmiut Ålandilu aamma qaaqquneqarsimanngillat, taakkumi suleqatigiinnermi Kalaallit Nunaat assigalugu inissisimaffeqarmata.
