Kalaallit Nunaat namminiilivinnialerpat tapiissutit isumaqatiginninniarnernit aalajangerneqassapput
Kalaallit Nunaat namminiilivereernerup kingorna aningaasatigut tapersersorneqaannassanersoq Mette Frederiksenip oqaatigiumanngilaa.
Kalaallit Nunaata namminiilivinnerata kingorna aningaasatigut tapersersorneqartuarnissaa isumaqatiginninniutigineqalissappat ministeriunerup aatsaat isummerfigissavaa.. (Assit toqqorsivimmit)
Assi: Ida Marie Odgaard/Ritzau Scanpix
Namminiilivinnerup kingorna Danmark Kalaallit Nunaannut aningaasatigut tapersersuiinnassanersoq isumaqatiginninniarnikkut aalajangerneqassaaq.
Tamanna ministeriunerup Mette Frederiksenip (S) naqissuserpaa, isumaqatigiinniarnerilli aallartissagaluarpata qallunaat naalakkersuisui qanoq isumaqarnersut oqaatigiumanngilaa.
Namminersorneq pillugu inatsimmi allassimasumut innersuussivoq, tassani namminiilivinnissamik aalajangertoqarpat Danmarkip Kalaallit Nunaatalu isumaqatiginninniarnissaat pillugu piumasaqaatit allassimanerannut.
- Namminiilivittoqarusuppat piffissami tassani aajangerneqassaaq. Taava isumaqatigiinniarnerit aallartissapput, tamatumalu kingorna innuttaasunik taasititsisoqassalluni.
- Tassa tassunga killissagutta isumaqatiginninniarnerit aatsaat aallartissavagut, taamaattumik maannakkut isumaqatigiinniarnerit ilinnut aallartissanngilakka, ministeriuneq Mette Frederiksen Ritzauimut oqarpoq.
Apeqqut pingaarutilik oqallinnermi amigaataasoq
Namminiilivinnissamik kissaateqartut amerliartorput, Kalaallit Nunaannilu partiit amerlanerit naalakkersuisut siulittaasuata Múte B. Egedep "nunasiaataanerup kalunnerinit" qanittukkut aniguinissamik kissaateqarneranut tapersersuipput.
Namminiilivinnissamut pissutaasoq pingaarutilik oqallinnermi suli sammineqanngilaq:
Namminiilivinnerup kingorna Danmarkip aningaasatigut tapiissutaasa tamakkiisumik ilaannakuusumilluunniit ingerlaannarnissaat Kalaallit Nunaata naatsorsuutigisinnaavaa?
Mette Frederiksenip oqaasii marlunngornermi unnukkut Tuluit Nunaata ministeriuneranik Keir Starmerimik Londonimi ataatsimeeqateqareerluni angerlamut timmisartukkut aallalernermini oqaatigineqarput.
Kalaallit namminiilivinnissamik tatineqariartuinnarnerat Donald Trumpillu nunanik tigusiniartup ataatsimut isigalugit naalakkersuisut naalagaaffeqatigiinnermik ingerlatsinerat ajornakusoornerulersippaa.
Amerlanerussuteqartut isumaqarput tapersersuineq pisariaqartoq
Danmarkimit tapiissutit 4,3 milliardit koruunit aamma ingerlatsinermi suliassat milliarderpassuarnik koruuninik nalillit allat kalaallit inuuniarnikkut atugarissaarnissaannut aalajangiisuupput, namminiilivinnissamillu kissaateqarnermut aningaasaqarnikkut atukkat aalajangiisuupput.
Berlingskep Sermitsiallu isumasiuinerat naapertorlugu kalaallit 55 procentii Danmarkip namminiilivinnerup kingorna tapersersuiuarnissaq pisussaaffigigaa isumaqarput.
Kunngeqarfimmiilli avissaartoqarpat Danmarki taamaaliorusunnersoq apeqqutaavoq.
Løkke isumaqataanngilaq
Nunanut allanut ministerip Lars Løkke Rasmussenip "siusinaartumik eqqartorneqartutut" Ritzauimut akissuteqarnermini taavaa.
Erseqqissarpaali namminiilivinnissamut tunngaviusumik nunanut allanut aningaasaqarnikkut attuumassuteqannginneq piumasaqaataasoq.
Ministeriunerulli Mette Frederiksenip Kalaallit Nunaat aningaasaqarnikkut nammineersinnaajumalluni Danmarkimit tapiissutinit allaanerusumik periarfissarpassuaqartoq erseqqissarpaa.
- Nalunngilara Kalaallit Nunaanni aningaasaqarnerup assigiinngitsunut siammarternissaa kissaatigineqangaartoq, tamannalu sivisuumik kissaatigineqarsimavoq, Mette Frederiksen oqarpoq.
Tamanna paasilluarsinnaavaa.
- Nuna sumiikkaluartorluunniit naalakkersuisullu kikkuugaluartulluunniit aningaasarsiornikkut assigiinngitsutigut isaatitsiveqarnissaq kissaatigineqartarpoq — aamma avammut niuernermi — tamannami nunap aningaasaqarneratalu nukittunerulernissaannut iluaqutaasarmat, Mette Frederiksen oqarpoq.
/ritzau/
