Karl Lyberthip akikinnerusumik avinnissaq naammagisimaaraa
Qeqqata Kommuniata avinneqarnissaa, Maniitsullu namminiilernissaa Naleqqameersup, Karl Lyberthip nilliaatigisareerpaa. Borgmesterip tulliatalu akikinnerusumik avissaarnissamut periarfissarsiornera iluarisimaarpaa.
Assi: Tôrtia Reimer-Johansen
Qeqqata Kommuniata avinneqarnissaa Karl Lyberthip, Naleqqameersup suaarsaatigisareerpaa, ilaatigut avinnissamut taasititsoqarnissaanut kommunalbestyrelsimut siunnersuuteqartarsimalluni.
Borgmesterip tulliatalu kommunip avinnissaanut pilerisulersimanerat Karl Lyberthip nuannaarutigaa.
- Nuannaarutigaara borgmesterip tulliatalu kommuni avikkusulersimammagu. Taasititsisoqarnissaanummi siunnersuut itigartinnikuuaat, kisianni nuannaarutigaara allatut isumaqalersimammata, Karl Lyberth oqarpoq.
Akisusinnaasoq
BDO-p naatsorsuinerata kisitsisit takutippaat kommuni avinneqarpat sulisut 92-inuut 187-it pisariaqartinneqassasut, ukiumut 48 millionit koruuniniit 97 millionit koruunillu akornanni aningaasartuuteqartoqarnerulissalluni.
Naak avissaarneq akisunerunissaa naatsorsuutigineqaraluartoq, Malik Berthelsen (S) aamma Gedion Lyberth (S) isumaqarput avissaarneq akikinnerusinnaasoq. Taakkumi siunnersuutigaat atorfiit akileeqatigiilluni pigineqarsinnaasut, soorlu innuttaasunut attuumassuteqanngitsit, IT, HR, akissarsialerivik sanaartornerlu.
- Isumaqataaffigaara pisortat suliffeqarfiutaat sipaarniarfigineqassappata, uannut aamma pingaarpoq suliffiit kisimi Sisimiuniinngippata, Maniitsumiissinnaappata aamma. Inuiaqatigiinnut sipaarutaasinnaappata isumaqataasinnaavunga.
Qeqqata Kommuniani kommunalbestyrelsi tamarmiusoq ataatsimiinnermi isumaqatigiippoq, innuttaasunik taasititsisoqassasoq.
Taamani isumaqatigiipput taasititsineq qinersereernerup kingorn pissasoq. Kommunimut qinersineq pissaaq apriilip aallaqqaataani 2025-imi.
