BORGMESTERIT UKIORTAAMI OQALUGIAATAAT TAAMAATINNEQARTUT
KNR: Kommunalbestyrelsimut qinersinissamut qanippallaarpoq
KNR-ip borgmesterit ukiortaami oqalugiaataat taamaatimmagit pissutaatinneqartutuaq tassaavoq KNR-ip isumaqarnera oqalugiartitsisoqassappat qinersinissamut qanippallaartoq. Taamaattorli aamma Inatsisisartunut qinersisoqassaaq tamatuma peqatigisaanik. - Naalakkersuisut siulittaasuata oqalugiaataa allaaneruvoq, KNR-ip TV-ata pisortaa Mathias Davidsen Sermitsiamut oqarpoq.
- Borgmesterinut Naalakkersuisullu siulittaasuannut ukiortaami oqalugiarnissaq neqeroorutaannaavoq, KNR-ip TV-ata pisortaa Mathias Davidsen oqarpoq, aamma paasissutissiivoq KNR-ip suli aalajangernikuunngikkaa borgmesterit ukiortaami oqalugiartarnissaannut neqeroorutaa ingerlaannassanersoq imaluunniit atorunnaarsinneqassanersoq.
Assiliisoq: Leiff Josefsen
Taaneqartartoq "spærretid" (qinigassanngortittut nalinginnaasumik radiomi tv-milu peqataaqqusaannginnerat, aaqq.) qinigassanngortittunut KNR-ip nammineerluni atorunnaarsippaa 2013-imili.
Maannali ukiut qulit sinnerlugit qaangiummata, tusagassiorfik aalajangerpoq borgmesterit oqaaseqarsinnaanissaminnut aammalu innuttaasuminnik ukiortaami pilluaqqusissallutik periarfissaqassanngitsut. Akerlianilli Naalakkersuisut siulittaasuat borgmesteritulli killilersorneqanngilaq, ileqqorlu malillugu ukiortaami oqalugiarsinnaanini nangissinnaavaa.
Davidsen: Assigiinngisitsinerunngilaq
Taamatut aalajangernersi assigiinngisitsinerunngila, KNR-ip borgmesterit ukiortaami oqalugiarnissaannik taamaatitsinera illuatungaanilu Naalakkersuisut siulittaasuat, aamma partiimi siulittaasuusoq oqalugiarnissamut kisimi periarfissinneqassappat?
- Naamik, isumaqarpugut immikkoortitsinerunngitsoq, KNR-ip aqutsisoqatigiivi isumaqarput Naalakkersuisut siulittaasuata oqalugiarnissaa allaanerusoq.
Inatsisartunummi aamma qinersisoqartussaavoq, soorlu aamma kommunalbestyrelsernut qinersisoqassasoq, sunaana assigiinngissutaasoq?
- Naalakkersuisut siulittaasuat nunamut tamarmut saaffiginnittarpoq borgmesterit namminneq innuttaasuminnut saaffiginnittarlutik, taamatuttaaq aamma borgmesterit qineqqusaarlutik oqalugiaamminni taputartuilersinnaanissaat pinngitsoorusupparput.
Borgmesterit avinngarusimasuni innuttaaqarput, taakkulu KNR-imik pisariaqartitsisuupput, borgmesterillu innuttaasuminnut anngukkusukkaluarlutik, taamatuttaaq borgmesterit oqalugiaataat nunap immikkoortuini allaniit malinnaaffigineqartarput?
- Borgmesterit nammineq aalajangissavaat qanoq ukiortaami pilluaqqussutertik ingerlateqqissanerlugu, kisianni KNR-ip aqutsisuisa aalajangerpaat qinersinissaq qanippallaartoq ukiortaamilu borgmesterit oqalugiaataat pinngitsoortinneqassasut.
Immaqa atorunnaarsinneqassaaq tamakkiisumik
TV-mi pisortap, Mathias Davidsenip massakkorpiaq oqaatigisinnaanngilaa borgmesterit ukiortaami oqalugiaataat tamakkiisumik atorunnaarsinneqassanersut imaluunniit qinersinermut atatillugu immikkut "killilersugaalertarnissaat" atuutsinneqassanersut.
- KNR-imi aaqqissuusseqqinnerup nalaaniippugut, aammalu oqaatigisinnaanngilara borgmesterit oqalugiaataat siunissami neqeroorutigineqassanersut imaluunniit neqeroorutigineqassannginnersut, Mathias Davidsen Sermitsiamut oqarpoq.
