København aamma Nuuk ikinngutigiilertut
Naalagaaffeqatigiiffiup illoqarfiit pingaarnersaat marluk akornanni ataqatigiinneq massakkut nukittorsarneqarpoq. København aamma Nuuk maanna pisortatigoortumik illoqarfittut ikinngutigiinnermi isumaqatigiissuteqarput ilaatigut qanimut oqartussaaqataaneq, piujuartitsisumik illoqarfimmik ineriartortitsineq, inuusuttut, atugarissaarneq kiisalu pisortat suliffeqarfiini pitsaasumik ingerlatsineq ukkataralugit, taama Kommuneqarfik Sermersooq nittartakkamini paasissutissiivoq.
Foto: Kommuneqarfik Sermersooq
Kommuneqarfik Sermersooq nittartakkamini paasissutissiivoq København aamma Nuuk maanna pisortatigoortumik illoqarfittut ikinngutigiinnermi isumaqatigiissuteqartut.
- Illoqarfitta pingaarnersaasut marluusut illoqarfittut ikinngutigiilernikkut qaninnerusumik atassuteqalernerat nuannaarutigaara.
- København aamma Nuuk imminnut tunngasunik ilikkagassarpassuaqarput suliassaqarfinnilu assigiinngitsorpassuarni ilisimasanik avitseqatigiissinnaallutik, ilaatigut innuttaasunik peqataatitsinerulernermi, piujuartitsisumik illoqarfimmik ineriartortitsinermi aamma kulturikkut avitseqatigiinnissamut sinaakkutissat pitsaanerusut, overborgmesteri Lars Weiss, København sinnerlugu isumaqatigiissummut atsiortuusoq oqarpoq.
Overborgmester Lars Weiss
Foto: Kommuneqarfik Sermersooq
Ilisimasanik avitseqatigiinneq ineriartoqatigiinnerlu
Kommunit marluusuni ataatsimiititat susassaqartut suleqatigiissutigineqartussatut siunnersuutinik suliaqarput.
Siunnersuutit assigiinngitsorpassuupput ilisimasanik avitseqatigiinnissamik ineriartoqatigiinnissamillu ukkassiffiusut. Suliniuteqarfiit ukkatarineqartullu ingerlaavartumik nassuiaatigineqassapput.
- Københavnimik illoqarfittut ikinngutigiittut suleqatigiinnissamik isumaqatigiissuteqarneq nuannaarutigeqaarput naatsorsuuteqarluarfigalugulu.
- Avitseqatigiilluni naleqartitanik pilersitsinikkut aamma innuttaasutsinnik takuneqarsinnaasumik malugineqarsinnaasumillu qaninnerusumik suleqatigiilernerup aallartinneqarnera isumaqatigiissummik nalunaaruserneqarpoq. Kikkut tamat oqartussaaqataanerannik, kiffaanngissusermik, ataatsimoornermik aamma naligiinnermik tunngaveqartumik pissarsiaqarfiusumik suleqatigiinnissaq qilanaaraarput, Avaaraq Olsen, Kalaallit Nunaanni illoqarfiit pingaarnersaanni kommunimi, Kommuneqarfik Sermersuumi borgmesteri oqarpoq.
