KOKAINIMIK EQQUSSERIARNEQ PILLUGU SULIAQ
Kokainimik eqqusseriarnerup misissorneqarnera pillugu unnerluussisoq oqaluttuarpoq
Kangerlussuarmi pisut annertuumik pingaaruteqarput ikiaroornartumik sakkortuumik eqqusseriarneq pillugu suliami, massakkullu Nuummi eqqartuussivimmi ingerlanneqartumi. Sisamanngornermi ullaap tungaani unnerluussisoq oqaluttuarpoq eqqartuussineq sioqqullugu suliaq qanoq ingerlanneqarsimanersoq.
Eqqartuussineq Nuummi ingerlanneqarpoq, Kangerlussuarli qitiuvoq.
Assi: Morten Okkels
Siusinnerusukkut Sermitsiamit aallaaserisatsinni oqaatigineqareersutut, S aamma N, maanna eqqartuussivimmi Sermersooq Kredsret-imi unnerluutigineqartutut issiapput annertuumik ikiaroornartulerinermi pinerluuteqarsimasutut unnerluutigineqarlutik. Unnerluussisoq, inatsisilerinermilu siunnersorti Brian Viholt, kissaateqarpoq unnerluutigineqartut taakku marluk aappaa ukiuni qulini aappaalu ukiuni sisamani pineqaatissinneqassasut, pingaartumik kokainimut tunngatillugu pinerluuteqarsimanerat innersuussutigineqarluni.
KOKAINIMIK EQQUSSERIARNEQ PILLUGU SULIAMI INUIT AKISUSSAASUTUT INISSISIMASUT
S 44-nik ukioqarpoq Odensemilu inunngorsimalluni. S-ip ukiuni qulini pineqaatissinneqarnissaa unnerluussisumit kissaatigineqarpoq. S unnerluutigineqarpoq kokainimik katillugit 488,5 gramimik cannabisimillu naatitsinermut peqataasimasutut unnerluutigineqarluni. Taanna pisuunnginnerarpoq.
N 37-nik ukioqarpoq Nuummilu inunngorsimalluni. N-ip ukiuni sisamani pineqaatissinneqarnissaa unnerluussisumit kissaatigineqarpoq. N unnerluutigineqarpoq 112 gramimik kokainimik tigummiaqarsimasutut, taannalu S-imit tuniniagaassatut pissarsiarisimassaagaa ilimagineqarluni. Unnerluutigineqartup taamaattoqannginnerarpaa, kisianni 30 gramimik nammineq atugassarisimanerakkaminik pisinini nassuerutigaa.
Ikiaroonartulerinermut tunngatillugu unnerluutigineqarnermik saniatigut angutit pineqartut tamarmik immikkut unnerluutigineqarputtaaq sioorasaarisimasutut, taamatuttaq N tarnikkut persuttaasimasutut unnerluutigineqarpoq. Unnerluussissutaasunut aamma taakkununnga pisuussuteqannginnerarput. Eqqartuussineq sioqqullugu tamarmik Nuummi pineqaatissinneqarsimasunut inissiisarfimmi tigummineqarput.
Kangerlussuarmi pisut pingaarutilimmik inissisimapput suliami pineqartumi. Tassunga ilanngullugu unnerluussisup S-imut immikkut ittumik ukiuni qulini pineqaatissiisoqarnissaa anguniarpaa.
S ilaatigut unnerluutigineqarpoq timmisartoq Danmarkimeersoq aqqutigalugu kokainimik eqqusseriarnernut iluatsinngitsunut marlunnut peqataasimasoq. Taanna nammineq pinngitsuunerarpoq.
Ullumi sisamanngornermi ullaap tungaani paasisaqarnerulerpugut, kredsret-imi suliap aallartinneqannginnerani siornatigut qanoq pisoqarsimanersoq. Siullermik uani sammisassavarput anngiortumik eqqussiniarneq, 17. juni 2024-mi pisimasoq.
Eqqusseriarneq iluatsinngivissortoq
Anngiortumik eqqusseriartoq angutuuvoq, kokainimik 167,5 grammimik iterminiititaminik eqqusseriarsimasoq, taannalu Kangerlussuarmi akitsuuserisunit paasisaavoq. Eqqusseriartoq taanna kingorna ukiuni sisamani ukiullu affaanik pineqaatissinneqarsimasunut isertitsivimmiittussanngortitaavoq. Unnerluutigineqartut taakku marluk arlaannaalluunniit eqqusseriarnermi matumani pineqartumi timmisartumi ilaanngillat. Kisianni unnerluussisoq isumaqarpoq S angalanermik aaqqissuussinermut peqataasimasoq, taamaalillunilu pisooqataasoq.
Ullualuit qaangiummata, 28. juni 2024-mi, S unitsinneqarpoq Aasianniit Ilulissaniillu Kangerlussuarmut pimmat. S angalavoq, unnerluussisup oqarnera naapertorlugu, allap aqqa atorlugu billetseqarluni. S angalanermini tassani ikiaroornartunik nassataqanngilaq. Kisianni nassarpaa allattuiffik naatsorsuutinik imalik. Tamanna kingornatigut uterfigissavarput.
S-ip aamma nassarpaa korti akiliut, taanna akiliut anngiortumik eqqusseriartup pigivaa, taannalu sapaatip akunnerani siuliani Kangerlussuarmi mittarfimmi tigusarineqarpoq, unnerluussisoq oqarpoq.
Taamaattoq tamanna immini isumaqanngilaq S pinerluutigineqartumi peqataasimasutut pisuussuteqartoq. Kisianni tamanna isumaqarpoq, unnerluussisoq naapertorlugu, juuni 2024-mi S-ip aammalu Kangerlussuarmi eqqusseriaraluartoq imminnut atassuteqartut.
