KOMMUNEQARFIK SERMERSOOQ
Kommunalbestyrelsi maleruuppoq - nalunaaruteqarani takkutinngitsoornerit unitsinneqassapput
Qinikkat politikerit suliassaminnit nalunaaruteqaratik takkutinngitsoortarnerannut nakkutiginninneq Kommuneqarfik Sernmersuumit sukaterneqarpoq, tamatuma ilutigisaanik nalunaaruteqarani takkutinngitsoortut akissarsiaminnik ilanngaatsinneqartalissapput.
Asseq toqqorsivimmit: Leiff Josefsen
Kommuneqarfik Sermersuumi kommunalbestyrelsimi ilaasortat aalajangerput qinikkatut ataatsimiinnerni nalunaaruteqaqqaarani najuutinngitsoortarnerit sukateriffigineqassasut.
Kommunalbestyrelsimi aalajangerpoq, ataatsimiinnerni ataasiakkaani peqataasinnaanngikkaanni, taava ullut tallimat sioqqullugit nalunaaruteqartoqartassasoq, taamaanngippat ataatsimiinnerni najuutinngitsoornerit tamaasa 569,70 kr.-inik akissarsianit ilanngaatigineqartalissasut, tamanna allassimavoq kommunalbestyrelsip juunip 19-ani 2025-imi oqaluuserisassaata allattorsimaffiani, tassanilu takuneqarsinnaavoq siunnersuut aamma akuerineqartoq.
Nalunaaruteqarani najuutinngitsoortarnerit ajornartorsiutaapput
Kommuneqarfik Sermersuumi aningaasaqarnermut inuussutissarsiornermullu ataatsimiititaq suliniummik aallartitsisuuvoq. Ilaasortat siumut nalunaaruteqaqqaaratik ataatsimiinnerni peqataasarsimannginnerannik nalunaarsugaqarpoq, ataatsimiititani aamma Kommunalbestyrelsimi.
Tamatuma saniatigut pisoqartarpoq peqataannginnermut patsisaasut ilumut akuerineqarluni peqannginnermut patsisaasinnaaneri apeqquserneqarsinnaasunik. Taamaattumik akuerineqarluni ataatsimeeqataannginnerup erseqqissarneqarnissaa nassuiarneqarnissaalu pisariaqartinneqartutut isigineqarpoq, aalajangiiffissatut siunnersuummi ilaatigut taamak tunngavilersuisoqarpoq, tamannalu kommunalbestyrelsimit akuerineqarpoq.
