Kommune kujalleq kissaateqarpoq periusissiortoqassasoq

Kommunit unammilligassaqarnerat annertoorujussuuvoq Kalaallit Nunaanni inissiisarnerit amerlasuut pissutigalugit tamatuma ilutigisaanik nunatsinni meeqqat angerlarsimaffimminni najugaqanngitsut ikilisarniarlugit iliuusissanik Naalakkersuisut utaqqisaapput.

Juunip aallartinnerani meeqqanut, inuusuttunut ilaqutariinnullu Naalakkersuisoq, Mads Pedersen, qanoq isumaqarnerluni ersarissumik oqariartuuteqarpoq, tamatumunngalu atatillugu apeqqutigalugulu nunami maani "inatsisitigut immikkut ittumik inissisimaneq"-mik peqarnersoq. Taamaakkaluartoq manna tikillugu inissiisarnernut tunngatillugu qanoq iliuuseqartoqarnissaa suli nalunaarutigineqanngilaq.

Kommunit iliuuseqarnissamik utaqqipput

Siulliulluni Kommuneqarfik Sermersooq iliuusissanik aalajangersimasunik saqqummiivoq, assersuutigalugu angajoqqaanut  angerlarsimaffeqanngitsunut inissianik pissarsiniarluni, taamaalillutik meeqqat angajoqqaaminnut angerlarsinnaaniassammata.

AAMMA ATUARUK:

Sermersuup meeqqat pillugit politikkia kinguneqartalerpoq

Kisianni ajornartorsiut annertoorujussuuvoq kommunit ataasiakkaat kisimiillutik imaaliallaannaq aaqqiissutissarsisinnaanngisaat, taamak isumaqarpoq Kommune Kujalleq:

- Nunarsuarmi kisitsisitigut paasissutissat agguaaqatigiisinnerat naapertorlugu Kalaallit Nunaanni meeqqat atugarliornersaat akornaniillattaasarnerat Kommune Kujalliup akuerisinnaanngilluinnarpaa. Meeqqat inuuniniarnikkut atugarliornerat pillugu politiinit nalunaarusianik tamanut saqqummiussisoqallattaagaluarluni iluamik iliuuseqarfigineqarneq ajorpoq, tamannalu isornarpoq, Kommune Kujalleq nunatta nuna tamakkerlugu periusissiortoqarnissaanik siunnersuuteqarnerminik tunngavilersuivoq.

Kommune allappoq 2024-mi naatsorsuinermi erserpoq, meeqqat 539-it ilaqutariinni paarineqartut, taakkunannga 413-it ukioq naallugu inissiisarfinni paarineqartut. Meeqqallu angerlarsimaffiup avataani inissinneqarsimasut 819-it missaannik amerlassusillit sinneri nalilerneqarpoq ulloq unnuarlu paaqqinnittarfinni, pinasuartumik paarineqartarfinni, piffissami sivikitsumi paarineqartarfinni allanilu iliuusissatut aaqqissutaasartuni paarineqartut.

650 millionit koruunit paarineqarnermut atorneqartut

Kommuneqarfik Sermersuup aningaasartuutai tunngavigalugit naatsorsuinermi erserpoq kommunit katillugit 650 millionit koruuninik angerlarsimaffiup avataanut inissiinernut aningaasartuuteqartut.

AAMMA ATUARUK:

Inuiaqatigiinni immikkut ittumik killilersuinerup tungaanut ingerlaarpugut?

• Kommuneqarfik Sermersooq - aningaasartuut: 278.000.000 kr.  (innuttat 23.994)
• Avannaata Kommunia -  aningaasartuut:   ≈ 125.172.000 kr. (innuttat 10.800)
• Qeqqata Kommunia -  aningaasartuut:   ≈ 106.628.000 kr.  (innuttat 9.200)
• Kommune Kujalleq -  aningaasartuut: 71.187.550 kr.   (innuttat 6.145)
• Kommune Qeqertalik - aningaasartuut:   ≈ 69.107.700 kr.   (innuttat 6.030)
• Katillugit ukiumut aningaasartuutit paarineqarnermut: 650.095.250 kr.
  

Naalakkersuisut inatsisinik nutarterinermik suliaqartut

Kommune Kujalliup siunnersuutaanut meeqqaanut, inuusuttunut ilaqutariinnullu Naalakkersuisoq, Mads Pedersen (IA) akissuteqarpoq inatsisit nutarterneqarnissaat sulissutigineqartoq, taamaaliornikkut pinaveersaartitsinermik aammalu ilaqutariit ataatsimoortillugit sullinneqarnerunissaannik aqqutissiuussisoqartoq, tamatumalu saniatigut aamma ilaqutariinnut inatsimmik nutaamik piareersaasoqartoq. 

Suliassaqarfik pillugu kommunit Naalakkersuisullu suleqatigiinnerunissaat pillugu annertuumik isumaqatigiittoqarpoq. Isumaqatigiissutaavortaaq, qaammammut ataatsimeeqatigiittoqartassasoq meeqqanut, inuusuttunut ilaqutariinnullu naalakkersuisoqarfik ataqatigiissaarisoralugu.

Taamaattorli ataatsimoorussamik periusissiortoqarnissaanik aammalu iliuusissatut pilersaarusiortoqarnissaanik Kommune Kujalliup siunnersuutaa piviusunngortinneqassanersoq, manna tikillugu suli erseqqissinngilaq, PKG-mi ataatsimiinnerup kingulliup imaqarniliorneqarnera suli tusarniaassutigineqarmat.