KALAALLIT NUNAANNI ANGERLARSIMAFFIUP AVATAANUT INISSIINERIT
Sermersuup meeqqat pillugit politikkia kinguneqartalerpoq
Decembari 2024-miit maannamut meeqqat inuusuttullu angerlarsimaffiup avataanut inissinneqarsimasut katillugit 26-it angerlartinneqarsimapput. Tamanna politikkikkut siunnerfeqartumik anguniagaqarnikkut angusaavoq, aammalu meeqqanut ilaqutariinnullu ingerlatsiviup politikkikkut anguniakkatsinnut sukkasuumik naleqqussarnerata kingunerisaanik pisinnaasimavoq, borgmesteri Avaaraq Olsen (IA) oqarpoq.
Siusissukkut tapersersorneqarneq, ilaqutariit nukittorsarneqarnerat aamma meeqqanik inuusuttunillu sullissinermi erseqqissumik siunertaqarneq pillugit politikkikkut anguniakkat taamaalillutik sunniutaat maannakkut takussutissaqalerput. - Meeqqat maannangaaq ilaquttaminnut angerlaqqissinnaanissaannut ingerlatsivimmi sukkasuumik naleqqussarneq aalajangiisuulluinnarsimavoq, borgmesteri Avaaraq Olsen (IA) ilisimatitsivoq.
Assiliisoq (arkiv): Leiff Josefsen
Kommuneqarfik Sermersuup meeqqanut ilaqutariinnullu politikkia nutaajusoq, siusissukkut iliuuseqarnermut ilaqutariinnullu tapersersuinermut sammitinneqartoq, decembarimi 2024-mi saqqummiunneqartoq maanna pitsaasunik angusaqarfiusalerpoq.
Ilaqutariinnut siunnersuisarneq qitiusumik inissisimavoq
Meeqqanut ilaqutariinnullu ingerlatsiviup sulinermini qitiutissimavaa toqqissisimasumik illersorneqarsinnaasumillu meeqqanut angajoqqaavinullu ikaarsaariartitsisarneq, tassanilu ilaqutariinnut siunnersuisarneq qitiusumik inissisimatinneqarluni, ilaatigut angajoqqaat piginnaasaat nukittorsarneqarluni aammalu meeqqat patajaatsumik atugassaqarnissaat qitiutinneqarlutik.
- Nuannaarutigaara politikkikkut suliniut nukittooq aamma ingerlatsivimmik qanimut suleqateqarneq aqqutigalugu ima angusaqarsinnaasimagatta, uagut kommunitsinni meeqqanut ilaqutariinnullu iluaqutaasunik angusaqarsinnaalluta, borgmester Avaaraq Olsen qujamasulluni oqarpoq, taassungalu tunngatillugu ingerlatsivimmi sulisunut qujassuteqarluni, taakkuami politikkikkut anguniakkanut nutaanut suliamullu tunniusimallutik sukkasuumik naleqqussarsimammata.
Siusissukkut tapersersuineq, ilaqutariit nukittorsarneqartut ersarissumillu siunertaqarneq
Siusissukkut tapersersorneqarneq, ilaqutariit nukittorsarneqarnerat aamma meeqqanik inuusuttunillu sullissinermi erseqqissumik siunertaqarneq pillugit politikkikkut anguniakkat taamaalillutik sunniutaat maannakkut takussutissaqalerput.
- Meeqqat maannangaaq ilaquttaminnut angerlaqqissinnaanissaannut ingerlatsivimmi sukkasuumik naleqqussarneq aalajangiisuulluinnarsimavoq, borgmesteri Avaaraq Olsen (IA) ilisimatitsivoq.
Meeqqanut, Ilaqutariinnut Atuartitaanermullu Ataatsimiititami siulittaasoq Poul Petersen (D), tapersiivoq:
- Meeqqat inuusuttullu taamak amerlatigisut maannangaaq angerlaqqissinnaalernerat assorsuaq pitsaasuuvoq. Tassunga ersiutaavoq uagut siusissukkut tapersersuinermik aamma ilaqutariinnik nukittuunik pingaarnersiuinitsivut aqqutissaq eqqortoq ingerlaarfigigipput.
Inissiisarneq pillugu erseqqissumik politikkimik kommune kissaateqarpoq
Meeqqat angerlarsimaffimminnut uteqqittartut amerliartuinnarnerat saniatigut, Kommuneqarfik Sermersooq kissaateqarpoq kommunit namminersorlutillu oqartussat akornanni nalilersueqatigiittoqassasoq, ulloq unnuarlu paaqqinnittarfiit imminut pigisut amerlassusaat pillugu, aamma tamanna inuiaqatigiinnut kissaatiginartuunersoq.
Kommunip kissaataa tamanna ersippoq borgmesterit Naalakkersuisullu ataatsimiinnermut oqaluuserisaanni, taakku politikkikkut ataqatigiissaarisuusut ataatsimiipput Qaqortumi 26. aamma 27. august 2025-imi.
Ulloq unnuarlu paaqqinnittarfiit imminut pigisut aqqaneq marlunngorsimapput kommunit ulloq unnuarlu paaqqinnittarfiisa pingasuisa namminersorlutik oqartussallu ulloq unnuarlu paaqqinnittarfiisa 11-iusut maanna amerlassutsimikkut qaangersimallugit.
Meeqqanut ilaqutariinnut politikkip nutaap saqqummiunneqarnerani kommunip nammineerluni erseqqissaatigaa, inissiisarnerni, kommunip ilaqutariit paarsisartut atornerusinnaanissaat kissaatigalugu, innersuussussissutigalugu misissuinerit takutissimagaat meeqqat ulloq unnuarlu paaqqinnittarfimmi peroriartorsimasunit inersimasunngornerminni pitsaanerusumik inooqataanissamut periarfissaqartartut.
Sermitsiamit sulissutigaarput Kommuneqarfik Sermersuumi borgmesteri Avaaraq Olsen (IA) oqaaseqartinniarlugu, taanna Paamiunit Nuummut umiarsuarmik ingerlaarpoq.
