Kommuneqarfik Sermersuumi utoqqarnut suliassaqarfimmik pitsanngorsaalersut
Utoqqaat amerliartuinnarnerat pissutigalugu Kommuneqarfik Sermersooq utoqqarnut tunngatillugu nutaamik pilersaarusiorpoq, ukiuni sisamani tulliuttuni qanoq iliuuseqartoqarnissaanik aalajangersaasussat.
Leiff Josefsen
Ukiut qulit kingulliit ingerlaneranni utoqqaat 49 procentinik amerlisimapput.
Kommuneqarfik Sermersooq taamaattumik utoqqarnut suliassaqarfimmut pilersaarummik nutaamik akuersissuteqarpoq, ukiuni sisamani aggersuni najoqqutarineqartussamik.
Suliassaqarfimmut pilersaarutikkut siunnerfigineqarpoq utoqqarnut suliassaqarfiup imminut napatissinnaasumik aamma siunissamut qulakkeerinnittumik ingerlanneqarsinnaanera, taamaalilluni kommunimi innuttaasut utoqqaat amerliartortut piareersimaffigineqaqqullugit, taamak Kommuneqarfik Sermersooq nittartakkamini allaaserisaqarpoq.
Kommuneqarfik Sermersuumi innuttaasut amerlassutsimikkut katitigaanerat ukiuni aggersuni malunnaatilimmik allanngussaaq, innuttaasut utoqqaat ukiuni qaangiuttuni qulini 49 %-imik amerleriarput aamma tamanna paaqqutarinninnermik neqeroorutinut piusunut tatisisitsivoq.
Teknologiimik atugaqarnissaq
Innuttaasut tamarmik nikagisassaanngitsumik utoqqartut inuuneqarnissaat qulakkeerniarlugu suliassaqarfimmut pilersaarutikkut neqeroorutinik ineriartortitsineq Kommuneqarfik Sermersuup pingaartinneqarpaa. Utoqqaat eqeersimaarlutit aamma sapinngisamik sivisunerpaamik namminersorlutik inuusinnaanerannut pitsanngorsaataasunik imalimmik. Suliassaqarfimmut pilersaarutikkut pingaartinneqarpoq peqqinnissaqarfimmik suleqateqarneq pitsanngorsagaq kiisalu isumaginninnermi teknologiimik annerusumik atugaqarnissaq taamaalilluni isumassuinermik suliallit suliassaannik oqilisaasoqarsinnaaqqullugu, aamma innuttaasut utoqqaat kiffaanngissuseqarnerullutik soorluttaaq ulluinnarni inuunerminni isumannaannerusumik inuuneqarsinnaaqqullugit.
Suliassaqarfimmut pilersaarutikkut suliniutit aallartinneqareersut ilagaat angerlarsimaffimmi sungiusarneq digitalimik ingerlasoq. Angerlarsimaffimmi sungiusarnermut programmikkut utoqqaat timikkut piginnaasaat nukittorsarneqassapput aamma utoqqaat namminersorsinnaanerisa attatiinnarnissaannut ikiuuttoqassaaq. Suliniut taanna misiliutitut suliniutaalluni upernaakkut 2024 aallartinneqarpoq, angerlarsimaffimmi ikiortitut neqeroorummik aaqqissuussamut aaqqissuussat digitaliusut ilanngunneqarput.
- Kommuneqarfik Sermersuumi utoqqaalluni eqeersimaartumik inuuneqarnissamut inuiaqatigiinnilu peqataanissamut pitsaasunik atugassaqartitaanissaq pisariaqarpoq. Uagut kommunitut akisussaaffigaarput qulakkiissallugu, utoqqaat tamarmik ataqqineqarnermik, naleqartinneqarnermik isumassorneqarnermillu misiginissaat, Isumaginninnermut Suliffeqarnermullu Ataatsimiititami siulittaasoq Inge Olsvig Brandt oqarpoq nangillunilu:
- Suliassaqarfimmut pilersaarutikkut anguniakkat suliniutillu erseqqissut tapersersorneqassapput, utoqqarnut suliassaqarfimmi pisariaqartitsinernik atuuttunik malittarinninnermik naleqqussarsinnaanermullu tunngasut. Pilersaarut una aqqutigalugu Kommuneqarfik Sermersuumit kissaatigineqarpoq utoqqartut ataqqinertumik toqqissisimasumillu inuuneqarnissamut sinaakkutissanik pilersitseqataanissaq – maannakkut siunissamullu.
