Kommune Qeqertalik
Kommunimi politikerit nuimasut marluk Siumumit tunuarput
Kangaatsiami Aasiannilu borgmesteriusimasut marluk, Otto Jeremiassen aamma Enok Sandgreen, Siumumiit tunuarnertik nalunaarutigaat. Taakku Kommune Qeqertalimmi kommunalbestyrelsimi ilaasortaapput, Siumullu gruppiata suleriaasaa akuerisinnaanagu partiimiit tunuarniuteqarput.
Tidligere borgmester i Kangaatsiaq, Otto Jeremiassen og tidligere borgmester i Aasiaat, Enok Sandgreen, forlader Siumut i protest.
Siumut ilaasortanik marlunnik maanna piitsuunerulerpoq, ilaasortammi marluk partiimit tunuarniarlutik aalajangerput.
Tunuartut marluk borgmesteriusimapput. Otto Jeremiassen Kangaatsiami borgmesteriunikuuvoq, Enok Sandgreenilu Aasianni borgmesteriunikuulluni.
Siumumi aalajaallutik ilaasortaareerlutik, maanna matu matorluppaat.
- Kommune Qeqertalimmi Kommunalestyrelsimi ilaasortaanitsinni, maanna suleriuserineqarluni Siumup gruppiani ingerlanneqartoq akuerisinnaannginnatsingu, aammalu tamanna piffissamik sivitsulersumik allanngussanani ingerlanneqartualermat, kommunalbestyrelsimi ilaasortat marluk allapput.
Taakku aamma allapput partiip borgmesterimik soraarsitsinissamik atorfilittanillu malersuinerat akuerinnarsinnaajunnaarlugu.
- Qinikkatut suliniarsarinitsinni illuatungiliuttuuneq tunngavigiinnarlugu, anguniakkagut tunullugit amerlanerussuteqartunut aammalu borgmesterimik soraarsitsiniarsaraluni sulineq, kiisalu atorfilittanik malersuinertut ittunik perusaarneq pissusissamisoortutut isumaqarfiginanngimmat, tunngavilersuinerminni allapput.
Siumut isiginngitsuusaarpoq
Siumut gruppiata borgmesterimik soraarsitsiniarsarinerat atorfilittanillu malersuinerat kisimi isumaqataaffigiinnanngilaat. Aalisarnermut inatsisissamut tunngatillugu innuttaasut akerliullutik oqariartornerat Siumup qisuariarfiginngimmagu aamma isornartorsiorpaat:
- Aalisarnermut inatsisissaq eqqarsaatigalugu Siumup siunnerfimminik allanngortiterusunnginnera. Kommune Qeqertalimmut aammalumi allanut inoqarfinnut tamanna annertuumik kingunerlussasoq oqariartuutigineqartarluni pisoqaraluarnerani innuttaasut nilliataannut annerusumik tusaaniarunnaarsimanera ersarilluni.
Tunuarnerat siulittaasup tupaallaatigaa
Kommune Qeqertalimmi Siumut gruppianni siulittaasoq, Aqqa Samuelsen isornartorsiutinut sakkortuunut akissuteqartinniarlugu Sermitsiap attavigaa. Taassuma politikerit tunuarnerat tupaallaatigaa:
- Aatsaat Siumut tungaaninngaanniit paasivarput Enok aamma Otto Siumuminngaanniit anisut. Taanna toqqaannarlugu uagutsinnut apuunneqarsimanngilaq.
Otto Jeremiassenip aamma Enok Sandgreenip tunuarnerminnut ilaatigut tunngavilersuutigaat Siumup borgmesterimik soraarsitsiniarluni sulinera kiisalu atorfilittanik malersuinera isumaqataaffigisinnaanagit. Aalisarnermullu inatsisissamut siunnersuummut qisuariarnerat aamma isumaqataaffiginngilaat.
Aqqa Samuelsenili naapertorlugu tunuartut marluk tunuarniuteqarnerminnut tunngavilersuutigisaminnut isumataqaasarsimapput:
- Eqqartueqatigiittarnikuuvugut pisunut oqimaatsunut aalajangigassanut. Taakkununngalu sammineqartunut aamma namminneq tunuliaqutsiillutik peqataaffiginikuuaat suleqataaffiginikuullugulu. Taamaammat taamanna tunuarniuteqarnerminni taamannak tunngavilersornerat soorunalimi paatsuunganarpoq, Aqqa Samuelsen oqarpoq.
Taassuma oqaatigaa tunuartut oqaloqatigisimanagit tusarfigisimanagilluunniit.
Suleriaasertik allanngortikkusunngilaat
Otto Jeremiassenip Enok Sangreenillu Siumup suleriaasianut naammaginninngimmata suleriaatsimik siulittaasoq allannguinianersoq Sermitsiaq aperivoq. Akissut naappoq:
- Naamik, kommunalbestyrelsimi illuatungiliuttutut inissisimavugut. Isornarsinnaasut pitsaanerusariaqartumillu ingerlasariaqartunut tikkuaasarnerput ingerlatiinnassavarput, Aqqa Samuelsen naggasiivoq.
