Kommunit aaqqissuussaanerat nutaaq 2029-mi

Politikkikkut ataqatigiissaarisut (Naalakkersuisut aamma borgmesterit) akuersissutigaat aaqqissuussinermut ataatsimiititaliap nutaap piffissalersuinera, kommunit aaqqissuussaanerannut allannguisussaq. Tamanna isumaqarpoq pilersaarutit malillugit ingerlasoqassappat, taava kommuninut aaqqissuussineq nutaaq 2029-mi atuutilersinnaavoq.

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq Jess Svane (S) siuttoralugu, politikkikkut ataqatigiissaarisartut kommuninut nutaamik aaqqissuussinissamik suliaq ingerlappaat. Suliaq naammassineqassaaq kommunit nutaat agguataarnerat aammalu namminersorlutik oqartussaniit kommuninullu suliassaannik agguataarnerat pillugu innersuussuteqarnikkut, kommunalbestyrelsimut nutaamut qinersinissaq aammalu Inatsisartut qinersinissaq 2029-mi pereerpat timitalersorneqartussanngorlugu.
Saqqummersinneqarpoq

Kalaallit Nunaanni kommunini innuttaasut kissaatigaat kommuninut aaqqissuussineq 2009-mi atuutsinneqalersumit allaanerusoq, taamani nunap kommunii 18-niniit sisamaannanngorneqarnikuupput, kingusinnerusukkullu tallimanngortinneqarlutik.

Innuttaasut kissaatigaat imminnut qaninnerusumik kommunimit kiffartuussineq. Innuttaasut kissaatigaat qinikkat sumiiffimmiittut naapinneqarsinnaasariaqartut. Ataatsimut oqaatigalugu innuttaasut kissaatigaat qanimut demokratii utertinneqassasoq, 2009-mi kommunit kattunneranni annaaneqarsimasoq isumaqarfigigamikku.

Nunami namminermi Naalakkersuisoq, Jess Svane (S) aamma siusinnerusukkut nassuernikuuvoq kommuninut aaqqissuussineq 2009-mi atuutsinneqalersoq kukkunerusoq, tamannalu politikkikkut ataqatigiissaarisartut peqatigalugit iluarsiniarlugu sulissutiginnipput.

Makku ukiut sisamat ingerlanerini naammassineqassapput

Maannakkummi aaqqissuussinermut ataatsimiititaliamit sulissutigineqarpoq kommuninut aaqqissuussineq nutaaq qanoq isikkoqarsinnaanersoq, ilanngullugu misissorneqarpoq namminersorlutik oqartussat kommunillu pisortatut suliasssaasa agguataarneri qanoq naapertuunnerusunngortinneqarsinnaanersut.

Makku pillugit aaqqissuussinermut ataatsimiititaliamit innersuussuteqartoqarnissaa naatsorsuutigineqarpoq:

  • Pisortat nutaamik aaqqissuussaanissaannut inassuteqaatit, inuit ataasiakkaat sunniuteqarsinnaanerannik nukittorsaasussat aammalu nunatsinni inoqarfinni najukkani aalajangiisinnaatitaanerulersitsisussat kiisalu innuttaasunut iluaqutaasumik pitsaanerusumik suliassanik suliarinnittarnissamut iluaqutaasussat.
  • Kommunit aaqqissuussaanerannut atugassarititaasunut killissaliussat
  • Suliassat sorliit qitiusumi isumagineqarpata tamanna naapertuunnerpaasussaanersoq aammalu sorliit najukkani aalajangiiffigineqartariaqaraluarnersut suliarineqartariaqaraluarnersullu, pillugit inassuteqaatit.
  • Pisortani immikkoortortat akornanni suliassat agguagaanerat qanoq aaqqissuunneqartariaqaraluarnersoq, inassuteqaatit.
  • Inassuteqaatit ungasissumut attanneqarsinnaasumik, aningaasaqarnermik piujuartinneqartussamik, qulakkeerissapput.

Suliniut pillugu piffissaliussat

  • 2025-2026: Kommuninut killissaliussanik suliaqarneq
  • 2026-2027: Kommunit aggulunneqarsinnaanerat pillugu politikkikkut oqallinneq innuttaasunillu akuutitsineq
  • 2027-2029: Suliassat nutaamik agguarneqarnissaannik immaqalu kommunit aggulunneqarnissaannik piareersaaneq atuutsitsilernerlu
  • 2029: Kommunit aaqqissuussaanerat nutaaq atuutilissaaq
Powered by Labrador CMS