KOMMUNIT
Kommunit aaqqissuussaanerat suli misissoqqissaarneqarpoq
Kommunit kattussuunneqarnerisa kingorna, pingaartumik innuttaasut kommunit illoqarfiini pingaarnerni najugaqartuunngitsut akornanni qanimut oqartussaaqataaneq amigaatigilersimanerarlugu aammalu sullissinermi allaffissornerujussuaq pillugu naammagittaalliortarnerat annertuvoq. Naammagisimaarinninnermik misissuinerup takutippaa Kommunit aaqqissuussaanerat ullumikkutut ittoq innuttaasut naammaginngikkaat. Politikkikkut ataqatigiissaarisoqatigiit suli utaqqimaarpaat kommunitoqqanut uteqqittoqassagaluarpat aningaasaqarnikkut kingunissaasussat pillugit Inatsisartut misissuisitsinerat. Misissuineq taanna ukioq manna naatinnagu tunniunneqassasoq naatsorsuutigineqarpoq.
Kommunit katitigaanerisa allanngortinneqarnissaat 2025-mi kommuninut qinersinissaq, kingusinnerpaamik apriilip 6-anni 2025 pisussaq sioqqullugu angumerineqartussaanngilaq.
Asseq toqqorsivimmit: Leiff Josefsen
Naalakkersuisut innersuussigaluarput, aaqqissuussaaneq pillugu ataatsimiititaliortoqassasoq siunertaralugu pisortat aaqqissuussaanerata aaqqissuuteqqinnissaanik siunnersuusiornissaq.
Naalakkersuisut taamak innersuussinerminni,
innuttaasut akornanni allannguinissamik annertuumik kissaateqartoqarnera aallaavigaat, tamannalu pimoorullugu suliassatut tigussallugu pisussaaffigaarput, tamanna erseqqissarneqarpoq politikkikkut ataqatigiissaarisut (Naalakkersuisut aamma Borgmesterit, aaqq.) aalajangiiffigisassatut siunnersuusiami.
Siunnersuulli taanna peerneqarallarpoq tassami maanna suliaqartoqarmat kommuninut uteqqittoqassagaluarpat aningaasaqarnikkut tamanna qanoq kinguneqassanersoq pillugu nalunaarusiortitanik.
Aaqqissuussaanermut tunngatillugu innuttaasut naammagisimaarinninnerannik misissuiffigineqaqqammertut naammaginninnginnerminnik annertuumik ersersitsinerat, aammalu qanimut oqartussaaqataanerup nukittorsarneqaqqinnissaanik piumasaateqarnerat kiisalu aalajangiisarnerit innuttaasunut qanittumi pisarnissaannik piumasaqaateqarnerat tunngavigalugu alloriarneq siunnersuutigineqaraluarpoq.
- Innuttaasut pingaartippaat, aalajangiinerit
nunap immikkoortuani pissutsinut tunngasut najukkaminnut qaninnerusumik aalajangiiffigineqartarnissaat.
Nalilersuinerup aamma takutippaa, illoqarfinni arlalinni kiffartuussinermi suliassaqarfinni
innuttaasut naammaginninnerat appasittoq.
Kommunalbestyrelsit
nunap immikkoortuani soqutigisat sinniisuuffigisinnaanerat aamma ajornartorsiutinik aaqqiiffiginninniartarnerat ilanngullugu annertuumik naammagittaalliutigineqarpoq, aamma isumaqartoqarpoq oqaloqatigiinneq aamma sinnerneqartutut misigisimaneq amigaataasut, aaqqissuusseqqinnissaq pillugu ataatsimiititaliortoqarnissaanik siunnersuutaagaluartumi, maannali peerneqarallartumi tunngavilersuutit ilagaat.
2024 naatinnagu naammasseqqissaaq
Aaqqissuussaaneq pillugu ataatsimiititaliatut siunnersuutiginninnermi naatsorsuutigineqaraluarpoq taassuma isumaliutissiissutini tunniuteriissagaa 2025-p naanera sioqqullugu pissasoq.
Taamaattorli aaqqissuusseqqinneq pillugu ataatsimiititaliortoqarsinnaaneranut apeqqut kinguartinneqarallarpoq, maanna kommunitoqqanut uteqqittoqassagaluarpat tamanna aningaasatigut qanoq malitseqassanersoq (UPA2024/116) pillugu misissueqqissaartoqarmat.
