Løkke aamma Troels Lund: Trumpip Kalaallit Nunaat pissanngilaa
Naalakkersuisunut ilaasortat nuimasut marluk Kalaallit Nunaata Trumpimit pissarsiarineqarsinnaanera itigartippaat.
Lars Løkke Rasmussen (M) aamma Troels Lund Poulsen (V) Donald Trumpip Kalaallit Nunaannik pissarsisinnaanera itigartippaat. (Assi toqqorsivimmit)
Assiliisoq: Emil Nicolai Helms/Ritzau Scanpix
Nunanut allanut ministerip Lars Løkke Rasmussenip (M) aamma illersornissamut ministerip Troels Lund Poulsenip (V) Donald Trumpip USA-llu amerikamiut præsidentiata oqaatigisaatullu Kalaallit Nunaannik pissarsisinnaatitaanerat itigartippaat.
Taama partiip siuttui marluk marlunngornermi oqarput.
- Trumpip Kalaallit Nunaat pissanngilaa. Kalaallit Nunaat Kalaallit Nunagaat. Inuiaallu Kalaallit tassaapput nunat tamat akornanni inuiattut akuerisat, tusagassiorfiit arlallit naapertorlugit Lars Løkke Rasmussen taama oqarpoq.
Apeqqut: Trumpip Kalaallit Nunaat perusuippagu, taava sakkutuulersorluni tigusariaqassavaa?
- Kalaallit Nunaat pisinnaanngilaa. Taamaammallu qanoq pissarsisinnaaneranik pissarsisinnaannginneranillu maani oqaaseqassanngilanga, DR naapertorlugu Lars Løkke Rasmussen oqarpoq.
Kalaallit Nunaat USA-mi naalagaaffinnut ilaalernani – Danmarki Savalimmiullu peqatigalugit naalagaaffeqatigiinniikkusunnera nunanut allanut ministerip iluarisimaarpaa.
Troels Lund Poulsenittaaq Lars Løkke Rasmussenip Trumpip USA-llu Kalaallit Nunaannik pissarsisinnaannginneranik naliliinera isumaqatigaa.
- Nunanut allanut ministerip akunnialuit matuma siorna oqaatigisai isumaqatigaakka, Troels Lund Poulsen Venstremi gruppip ataatsimiinnerata kingorna oqarpoq.
Ministeriuneq Mette Frederiksen (S) suliaq pillugu aallartitatut mianersorpoq. “Kalaallit Nunaat kalaallit pigigaat”, taamaammallu kalaallit namminiilivissinnaanermut isummertussaanerat innersuussutigisarpaa.
Mette Frederiksen Donald Trumpip pissusilersorneranut ersarinnerusumik itigartitsisariaqarneranik Troels Lund Poulsen aperineqarpoq.
- Ministeriuneq arlaleriarluni taamaalioreersoq isumaqarpunga, taanna oqarpoq.
Ministeriuneq marlunngornermi Europami angalaarpoq, tassanilu Tysklandip forbundskansleria, Olaf Scholz Berlinimut pulaarpaa.
Maannakkorpiaq Mette Frederiksen Frankrigip præsidentianik Emmanuel Macronimik oqaloqateqassalluni Parisimiippoq, kingornalu Bruxellesimut ingerlaqqissaaq. Tassani ministeriunerup Nato Generalsekretæria Mark Rutte oqaloqatigissavaa.
