Malunnaatilimmik allannguuteqartoqassasoq Naalakkersuisut ilimasaaripput

Aningaasaqarnermut akileraartarnermullu Naalakkersuisoq,  Múte Bourup Egede (IA) kisitsissummik angisuumik atortulerluni ulapippoq. Tamannalu pissutissaqarluarpoq, nunattami aningaasaqarnera annertoorujussuarmik unammilligassamik nalaatarpoq.

Inuiaqatigiinni innuttaasut tamarmik akit qaffakkiartornerat sakkortuumik misigaat, kisiannili aamma nunatta aningaasaqarnera amigartooruteqarpoq - amerlasoorujussuarnik - tassami milliard koruunit sisamararterutaat sinnerlugu amigartooruteqarpoq aammalu akiliisinnaassuseq qajannartumi inisseqqalluni.

- Tamanna pissutigalugu malunnaatilimmik iliuuseqartariaqarpugut. Maannakkorpiaq inuiaqatigiinni aaqqissuussaanerput misissuisoqarpoq, aammalu naatsorsuutigaarput aningaasanut inatsisissamut atatillugu sipaarniuteqarnissamut pilersaarummik saqqummiussissalluta.

Innuttaasut eqqugaatinnaveersaarneqarput - kisianni sipaarniuteqarnissamut pilersaarut pisariaqarpoq

Bourup Egede oqarpoq pisortat ingerlatsiviini annertuumik sipaarniartoqarnera maluginiarneqarsinnaasoq, kisianni sipaarniarnerup sapinngisaminnik innuttaasunut sunniuteqannginnissaa aamma qulakkeerniarlugu Naalakkersuisut sulissuteqarput:

- Maanna nalaatsinerlunneq unammilligassartalik misigaarput. Kisianni Naalakkersuisunit sulissutigaarput inuunerissaarnissamut aningaasaliissutit  sullissinerillu sapinngisamik eqqugaatinnaveersaarniarlugit. Tamanna ilaatigut pissutigalugu pisortat aaqqissuussaanerat siulliullugu misissorparput.  Qanoq iliorluta aammalu sutigut pisortat aaqqissuussaanerat allanngortissinnaavarput, Bourup Egede aperivoq nangillunilu:

- Tassunga tunngatillugu aalajangerpugut aaqqissuusseqqinnerup qulaajaaffigineqarnerani avataaneersumik nalilersuisitassamik ilanngussisoqassasoq, ullumikkut qanoq aaqqissuussaanersugut taassuma misissussavaa, siunnersuuteqassallunilu qanoq pitsaanerusumik iliuuseqartoqarsinnaanersoq. Tassanittaaq Namminersornerullutik Oqartussat kommunillu suleqatigiinnerat ilanngullugu misissorneqassaaq. 

Taamaattorli iliuutsit taamaattut piffissamik atuiffiusarput, taamaattumillu Naalakkersuisut maanna aallartereerpaat pisortat ingerlatsineranni annertuumik sipaarniuteqarnissamut pilersaarusiorneq.

AAMMA ATUARUK:

Múte amigartooruteqaratarsinnaaneq pillugu: Aningaasartuutigisagut maanna misissoqqissaarpagut

Piffissalli ingerlanerani  allaffissornermut ingerlatsinermullu aningaasartuutinut sipaarniuteqartoqarnissaa suaarutigineqartarpoq, qanoq qulakkeersinnaavisiuk tamatumuuna oqaasiinnartigut tamanna taamaallaat pinavianngitsoq?

- Qanoq iliorluta qanorlu annertutigisumik sipaarniuteqarnissarput maannakkut oqaluttuarisinnaanngilara, aningaasanut inatsisissamut siunnersuutip piareernerani aatsaat tamanna piumaarmat. Kisianni uppernarsarsinnaavara sipaarniarnissamut pilersaarummik piffissalersukkamik suliaqaratta, aammalu annertuumik sipaarniuteqarnissamut pilersaarummik suliaqaratta, taamatuttaaq sipaarniarneruinnarani pitsanngorsaanissamik pilersaarutaammat erseqqissaatigissavara. Paasissutissat sukumiinerusut utaqqisariaqarpasi aggustip qeqqata missaata tungaanut, tassani aningaasanut inatsisissamut siunnersuut saqqummiunneqassaaq aammalu sukumiinerusumik sipaarniuteqarnissamut pilersaarut saqqummiunneqassalluni, Múte Bourup Egede (IA) akivoq.

Aningaasaliisartut inuussutissarsiornermillu ingerlataqartut kajungilersinniarneqassapput

Múte Bourup Egede oqarpoq, ingerlatsinermut sipaarniuteqarnikkut taamaallaat iluarsiisoqarsinnaanngitsoq, kisianni inuussutissarsiornermik siuarsaanermik suliniutit aningaasarsiornermut aammalu inuiaqatigiinni atugarissaarnermut qulakkeerinneqataasussaasut taanna erseqqissaavoq.

- Naalakkersuisunit ilisimaaraarput aaqqiissutissat attanneqarsinnaasut nassaarineqarsinnaanngitsut sipaarniarneq kisiat atorlugu, kisianni aamma pingaaruteqartorujussuuvoq aningaasaliisartut inuussutissarsiortullu kajumissaarneqarnissaat. Nalunngilarput pisuussuterpassuaqartugut periarfissarpassuaqartugullu, tamakkulu massakkut annertusiartortumik iluaqutigiartuinnalerpagut. Assersuutigalugu takornariaqarnikkut siuariartorneq malugisinnaavarput, tamatumalu peqatigisaanik aatsitassarsiornermik ingerlatserusuttut akuersissutinik tunineqartartut amerlartorput, taamaattumik najummatsisimanartumik inissisimagaluarluta  suna tamarmi taartuinnaanngilaq, Múte Bourup Egede erseqqissaavoq.

AAMMA ATUARUK:

Nunatta karsia 2024-mi 250 millionit koruuninik amigartooruteqartoq

Ilungersunartumi inissisimanerput naqissuserpat, tamanna nunanut allanut taarsigassarsinermik kinguneqarsinnaava nunatta akiliisinnaassusia qulakkeersimajumallugu?

- Aningaasanik taarsigassarsineq periarfissaassaaq aatsaat allat tamarmik misilinneqareerlutik periarfissaajunnaarpata, qujanartumillu tassunga killinngilagut. Isumaqarpugut suli periarfissaqarluta aningaasaqarnikkut ajornartorsiornermik qaangiinissatsinnut, tassungalu tunngatillugu pisariaqarluinnarpoq aaqqiissutissat attanneqarsinnaasut nassaarinissaat, ullumikkut atukkagut kisiisa eqqarsaatiginagit aammali siunissaq eqqarsaatigalugu.

Nunatta karsiata sinneqartoortumik ukiut arlalissuit ingerlareerluni tassanngaannaq amigartoortumik ingerlalerneranut pissutaasut arlaliupput. Pissutaasut ilaat tassaavoq  Namminersorlutik oqartussat ingerlatseqatigiiffiutaanit sinneqartoorutinit akiliisarnerit ikilineqarsimammata, taakkumi aamma aningaasaliisariaqartaramik aserfallatsaaliinermik kinguaattoorutit annertusiartuinnassanngippata. 

Aammali pissutaasut ilagaat innuttaasut ukiumikkut katitigaanerat najugaqartiternerallu pillugu ukiut amerlasuut ingerlaneranni oqallisaasimasoq maanna piviusunngormat, tassani sulisinnaasut ikiliartulerlutik, illuatungaanilu utoqqaat pilersorneqartariaqartut amerliartuinnarlutik. Kisianni aamma maluginiagassaavoq meeqqat inuusuttullu angerlarsimaffiup avataanut inissinneqartarnerannut, meeqqanut inuusuttunullu Naalakkersuisoq naapertorlugu, ukiumut milliard koruunit affaat atorneqartariaqartarmata.