Marita Jessen Inatsisartuni sinniisutut ilaasortanngortoq
Inuit Ataqatigiit ilaasortaatitaat Marita Jessen ullumi Inatsisartuni aallartippoq.
Marita Jessen Inatsisartuni Inuit Ataqatigiinnut sinniisutut maanna issiasoq.
Leiff Josefsen
Mariane Paviasen upernaakkut ataatsimiinnerup sinnera sulinngiffeqarmat sinniisussaq nutaaq Inatsisartuni ullumi issiavimmut ingippoq.
Marita Jessen, 32-nik ukiulik, inuit innarluutillit ingammik issiavimmi kaassuartakkamiittunut sumiiffiit tikikkuminartuunissaat pillugu oqallitsitsisarsimavoq. Ilisimatusarfimmi ilinniartuugallarami iserniarluni allanik pisariaqartitsisarsimavoq. Misigisani tunngavigalugit Tilioq suleqatigalugu inuiaqatigiinni oqallitsitsisimavoq pisortat illuutaat Kalaallit Nunaannilu attaveqaatit, soorlu aqquserngit nunallu iluani angalanissamut periarfissaqarneq pitsanngorsarumallugu ilungersunarsinnaasut ersarissarlugit.
2021-mi Inatsisartunut qinersinermi kingullermi Marita Jessen qinigassanngortippoq 38-nillu taaneqarluni. Maanna Inatsisartuni sinniisussatut ilaasortanngorpoq.
Aamma pingasunngornermi Inatsisartut Siulittaasoqarfiata nalunaarutigisinnaavaa Hans Aronsenip Inatsisartunit tunuarnissamik qinnuteqaataa akuerineqarsimasoq. Taanna paarlallugu kina Inatsisartuni ilaasortanngussanersoq suli ilisimatitsissutigineqanngilaq.
