Meeqqanut angerlarsimaffik kommunimit ammaqqinneqartoq

Qasigiannguani ulloq unnuarlu angerlarsimaffiup Puilasup ukiortaami ammaqqinnissaa kommunalbestyrelsip isumaqatigiittup aalajangerpaam kommunimi borgmesteri Simigaq Heilmann tusagassiuutitigut nalunaarummi ilisimatitsivoq.

Borgmesterip aalajangerneq nuannaarutigaa, meeqqalli angajoqqaaminnut angerlaqqinnissaat kommunimimt anguniagaajuartoq erseqqissarlugu:

- Meeqqat angajoqqaaminnut angerlaqqissinnaasut angerlartinneqarumaartut, angajoqqaarsiaasartunillu amerlanerusunik peqalersinnaanissarput suli siunertaraarput anguniarlugulu, Pingaaruteqarpormi meeqqat ilaqutariinni toqqissisimanartumik peroriartussasut.

Ammaqqinneqarnera aningaasartuutinik aamma sipaaruteqarfiussasoq borgmesterip aamma oqaatigaa:

- Taamaattorli kommunitsinni ulloq unnuarlu angerlarsimaffiup ukiumi nutaami ammaaqqinnissaa Kommune Qeqertaliup kommuninut allanut namminersortunullu ulloq unnuarlu angerlarsimaffiutilinnut aningaasarpassuarnik atuineranik annikillisaaqataassaaq, borgmesteri aalajangerneq pillugu oqarpoq.

Nakkutilliisoqareersorlu matuneqartoq

Ulloq unnuarlu angerlarsimaffiup kommunip nakkutilliisuinit siumut nalunaaruteqarani 2024-mi misissuiartornerani sulisut meeqqat pisariaqartitaannik naammassinnissinnaanngitsutut nalilerneqarpoq, tamatumalu kingunerisaanik paaqqinnittarfik matuneqarluni. Kommunip ammaqqiinissamik aalajangiineranut suliap ingerlanneqarnerani ilaatigut allassimavoq.

Namminersorlutilli Oqartussat nakkutilliinerat 2022-meersoq tamatuma akerlerluinnaanik inerniliisoq Aqutsisoqarfimmit aamma maluginiarneqarpoq, taamanili allannguutissat arlallit aamma innersuussutigineqarsimallutik.

Puilasoq ammaqqinneqarpat meeqqanut 0-17-inillu akornanni ukiulinnut paaqqinnittarfiussaaq, tassanilu meeqqat inuusuttullu angerlarsimaffimmi eqqissisimanissaat toqqissisimanissaallu siunertarineqarluni. Meeqqat arfineq-pingasut inissaqartinneqassapput.

Kommune Qeqertalimmi meeqqat 35-t angerlarsimaffiup avataanut maanna inissinneqarsimapput pingasullu utaqqisuniillutik. Taakkua ilaat immaqa Puilasumiilersinnaapput. Ingerlatsivik naapertorlugu tamanna kommunimut ukiumut 1 aamma 1,5 millionit koruunit akornanni sipaarutaasinnaavoq. Meeqqamik nuutitsisoqassappat pineqartoq tusarniaqqaarneqartussaavoq.