Mette Frederiksen spiralilersuisimanermi taarsiissuteqarnissaq pillugu: Nutaanik paasissutissaateqanngilanga
Spiralilersuinermi eqqugaasut taarsiiffigineqarsinnaanerat pillugu Naalakkersuisut Danmarkimilu naalakkersuisut suli isumaqatigiinniartut ministeriuneq oqarpoq.
Ministeriuneq Mette Frederiksen Kalaallit Nunaanni attaveqaatinut pingaarutilinnut aningaasaliisoqarnissaanik marlunngornermi nalunaaruteqarnermini, arnat spiralilersorneqarsimasut taarsiiffigineqarsinnaanerat pillugu nutaanik paasissutissaateqannginnini ilanngullugu, oqaatigaa.
Assi: Leiff Josefsen
Arnat spiralilersorneqarnikut danskit naalagaaffiannit Naalakkersuisunillu utoqqatserfigineqarsimalerput. Tamanna Nuummi Katuami septembarip 24-ani ministeriunerup Mette Frederiksenip peqataaffigisaani pisortatigoortumik malunnartinneqassaaq.
Utoqqatsernerli naammanngitsoq Naleqqamit oqaatigineqarpoq. Iliuuseqartoqartariaqartoq ilaatigut minnerpaamik 300.000 koruuninik taarsiissuteqarnikkut taakku isumaqarput.
Mette Frederiksen taarsiiffiginninnissaq pillugu Naalakkersuisunik isumaqatiginninniarnermi ingerlariaqittoqarsimanersoq aperineqarami ima akivoq:
– Siullertut, misissuineq aallartissimagatsigu nuannaarutigaara. Pissarsiaraara. Atuarpara. Ataatsimoorluta utoqqatserpugut. Isumaqarlunga eqqortuliornerusoq, Danmarkimmi akisussaasuunerani pisorpassuaqarnikuuvoq, kisianni aamma susassaqarfiup angerlaanneqareernerata kingorna pisoqarsimarpasippoq. Soorunami amerlanerit tamatuma siorna pisimapput.
- Taamaakkaluartoq isumaqarpunga utoqqatsernerup ataatsimut saqqummiunneqarnera pitsaasuusoq. Tassunga atatillugu iliuuserisassat tulliuttut pillugit isumaqatiginninniarnerit oqaloqatigiinnerillu aallartillugit aamma nalunaarutigaarput, taakkulu suli ingerlapput, ministeriuneq Mette Frederiksen attaveqaasersuutit pingaarutillit pillugit aningaasaliinerit Naalakkersuisullu isumaqatigiissutertik marlunngornermi saqqummiunnerani oqarpoq.
