KL

DK

Mette Frederiksenip Issittumi sikusiutit amerlanerusut pisariaqartinneqartut oqaatigaa

Danmarkip maannakkut sikusiutinik pisinissaq pilersaarutiginngilaa. Pisariaqartitsisoqartorli ministeriuneq oqarpoq.

Nato-mi nunat ilaasortat sikusiutinik Issittumi atorneqarsinnaasunik amerlanerusunik peqalernissaat kissaatiginartoq ministeriuneq Mette Frederiksen (S) oqarpoq.
Ritzaus Bureau
Saqqummersinneqarpoq

Issittumi, nunat pissaanilissuit Ruslandip Kinallu soqutigisaqarfigisaanni, isumannaatsuunissamut iluaqutaasinnaasunik sikusiutinik pisinissamik Danmark maanna pilersaaruteqanngilaq.

Nunalli killermiut isumannaallisaanermik annertusaasariaqartut ministeriuneq Mette Frederiksen (S) isumaqarpoq. Helsinkimi, Finlandimiut NATO-mi nunat Østersøp eqqaaniittut ataatsimeeqatigalugit sikusiutaannut tikeraarnermini, marlunngornermi taama oqarpoq.

- Sikusiutinik amerlanerusunik pisariaqartitsigunarpugut. Imaanngilaq maannakkut sikusiutinik pisiniarlunga, sikusiutinilli issittumi tamarmi atorneqarsinnaasunik Finlandi sanaartorsinnaasut nunat ilagaat.

- Taamaattumik Finlandimiut suleqatiginissaat pissusissamisuuginnarpoq, oqarpoq.

Rusland "sikusiutinik minnerpaamik 50-inik, taakkunannga 13-it sikunik aserorterutit Issittumi atorneqarsinnaasutut sananeqarsimasunik“ peqartoq Illersornissamut ministeri Troels Lund Poulsen (V) Folketingimi apeqquteqaatinut akissuteqaammini ataasinngornermi ilisimatitsivoq.

Taakkua ilagaat sikusiutit atomimik ingerlatillit angisuut arfineq-marluk, Ruslandi kisimi pigisai sulilu amerlanerusunik sanaartornissaamik pilersaaruteqarfiusut.

Kina maannakkut sisamanik sikusiutinik Issittumi atorsinnaasunik peqarpoq nunalli Nato-mi ilaasortat katillugit 13-iinnarnik sikusiuteqartut Troels Lund Poulsen paasissutissiivoq.

Danmarki sikusiutinik siornatigut Danmarkip imartaani atorneqartunik peqarnikuuvoq. 2010-mi illersornissaqarfimmi sipaarniartoqarnerani sikusiutit pingasut kingulliit atorunnaarsinneqarput.

Danmark sikusiummik peqaqqilissanersoq apeqqutaalerpoq.

- Suut tamaasa suli aalajangiiffiginngilagut. Isumannaallisaanermulli tunngatillugu pissutsit eqqarsaatigalugit sikusiutit allat aamma eqqarsaatigisariaqarivut paasinarpoq.

- Nunat issittormiut Natomilu qanoq agguataarneqassanersut suli naluarput, tamannali aamma eqqarsaatigissavarput, Mette Frederiksen oqarpoq.

Danmarkip Issittumi akisussaaffini, pingaartumik Kalaallit Nunaanni, sumiginnarsimaneraa aperineqarami ministeriuneq ima akivoq:

- Isumaqarpunga nunani killerni, imaluunniit nunarsuup kitaata ilarujussuani, isumannaallisaanerup pingaarnersiorneqarsimannginnera ukiorpassuarni atuuttoq, aamma issittumi.

- Qallunaat nunaanniit kunngeqarfiullu tungaaniit iliuuseqarnerorusuppugut. Nato-mili aamma Kitaani nunani tamani taama nukittutiginngilagut, aamma issittumi.

inuiaqatigiit samfund arktis sikkerhedspolitik isbrydere mette frederiksen

ATORFIIT Se alle jobs

Powered by Labrador CMS