KL

DK

Ministeriuneq isumaqarpoq Rusland Europamut akerleriissutissarsiornerulissasoq

Ministeriunerup ernumanartippaa Rusland ukiut arlaqanngitsut qaangiuppata europami nunamik allamik Rusland saassussisinnaalissasoq.

Danmark nunat angisoorsuit ilaginngilaat, kisianni nunat avannarliit nunallu baltiskiusut sinnerlugit Ukrainemik ataatsimeeqateqarnermi sinniisutut peqataasussatut toqqagaavoq.
ritzau
Saqqummersinneqarpoq

Ruslandip Ukrainellu akornanni eqqisseqatigiinnissamik aaqqiissutissanik periarfissat oqaluuserillattaarneqarput USA-mi naalakkersuinikkut allanngortoqarnissaata kingunerisaanik Ukrainemut tapersersuinermik annikillisaasoqarnissaa naatsorsuutigineqarluni.

Ministeriuneq Mette Frederiksen (S) isumaqarpoq Ruslandip eqqissineq kissaatigineqanngikkaa, pingasunngornermi unnukkut Bruxellesimi naalagaaffiit naalakkersuisuisa siulittaasuisa akornanni ataatsimiigiarnermini taamak erseqqissaavoq.

- Matumani pivarput Rusland, ukiut arlaqanngitsut ingerlanerini Europami nunamik allamik saassussisinnaasoq. Isumaqarpunga tamanna piumaartoq miserratigisinnaanngikkipput. Oqanngilanga tamanna pissasoq, kisianni miserratigisinnaanngilarput periaannaasoq.

- Isumaqarpunga sukkasuumik eqqissinissamik isumaqatigiissummik pilersitsineq immini Europami eqqissinermik patajaatsumillu ingerlatsisoqarsinnaalernissaa qulakkeerneqarsinnaanngitsoq. Russit tungaanniit takusaqanngilagut eqqissineq kissaatigineqartoq. Akerlianilli pisoqarpoq. Isumaqarpunga piffissaq aggersoq tassaajumaartoq Ruslandip Europamut akerleriissutissarsiorfissaa, taanna oqarpoq.

Ministeriuneq pingasunngornermi kingusinnerusukkut Bruxellesimi ataatsimiinnermi peqataassaaq, tassani Ukrainap præsidentia, Volodymyr Zelenskyj, Natomut pisortaaneq, Mark Rutte, kiisalu Europami nunat Nato-mi ilaasortat  arlallit, taakkununnga ilaallutik Tyskland aamma Italien ataatsimeeqataassallutik.

Danmark nunanut angisuunut ilaasuunngilaq, kisianni toqqagaavoq nunat avannaamioqatigiit aamma Baltikumimi nunat sinniisuuffigissallugit aammalu tassaavoq Ruslandimut sakkortuumik isornartorsiuisartoq.

- Qularpunga, Ruslandimik eqqissinissamik isumaqatigiissusiorneq pisinnaanersoq pillugu, nunami taanna eqqissinissamik kissaateqanngilaq, kisianni sorsukkusuppoq. Pingaaruteqarpoq eqqaamassallugu, Ruslandip Ukrainemi sorsunnini unitsissinnaagaluarpaa sakkutuuni tunuartillugit.

- Aamma russit unitsissinnaagaluarpaat Europami nunani allani saassussisarnerit, ullumikkut Europami nunanut allanut sunniuteqartartut. Tassami ullut tamaasa maanna, qarasaasiatigut saassussisarnerit imaluunniit saassussisarnerit hybridit imaluunniit aamma Europami nunani qinersinernik akornusersuisoqartarpoq, Frederiksen oqarpoq.

Naapinneq pissaaq Donald Trumpip USA-mi præsidentitut ivertinneqarnissaanut atuutilernissaanut qaammat ataaseq sioqqullugu. Taanna neriorsuinikuuvoq sukkanerpaamik Ukrainemi sorsunnersuaq unitsissallugu, Nato-p oqarnera naapertorlugu Ruslandip 2022-mi saassussilerneranit maannamut inuit millionit toqutaasimapput ikilerneqarsimallutillu.

Europami aqutsisut aarleqqutigaat Trumpip Ukrainemut tapersersuineq annikillissagaa Ukrainelu pisussaaffilerneqassasoq Ruslandip piumasaqaataanik naaperiaanissaminut, taamaattumik taakku tamaviaarlutik sulipput taamatut pisoqassagaluarpat taava qanoq pisoqassanersoq.

Europamiut akornanni oqaluuserineqarpoq Ukrainemi europamiunik sakkutuuliisoqartariaqassasoq, Ukrainemut eqqisseqatigiinnissamut illersorneqarnissaat qulakkeerniarlugu, kisianni naalagaaffiit naalakkersuisuisa suli aalajangiusimanngilaat qanoq iliuuseqartoqassanersoq.

Mette Frederiksenip takujuminaatsippaa aaqqiissutissatut periarfissat suussagaluarnersut, pitsaanerutippaalu transatlantisk forsvarsalliance Nato-mut ilaasortanngortitsinissaq neqeroorutigineqarpat.

- Nunat tamalaat tamarmik eqqisseqatigiittoqarnissaa kissaatigaat Rusland minillugu. Isumaqarpunga pitsaanerpaamik piviusumillu isumannaallisaatitut qulakkeerinnittoqarsinnaasoq Ukraine Nato-mut ilaasortanngortinneqarpat. Tassa taanna danskit eqqissisimasumik inuuneqarnerannut kiffaanngissuseqarnerannullu qulakkeerinnittoq, taanna oqarpoq.

Taanna innersuussivoq Nato-p illersoqatigiinnissamik isumaqatigiissutaannut, tassa ilaasortamik ataatsimik saassussineq tamarmiusumik saassussinertut isigineqarmat, taamaammallu illersoqatigiittoqarnissa nunat ilaasortat isumaqatigiissutiginikuuaat.

Danmarkip ministeriunera Europami siuttunut ikittuinnaasunut ilaavoq, Nato-mut atassuteqartumik Zelenskyj-mik naapeqateqarnermi,  EU-milu pisortat ataatsimiinnissaat sioqqullugu pisumi.

rusland nato mette frederiksen krig inuiaqatigiit samfund ukraine statsminister

ATORFIIT Se alle jobs

Powered by Labrador CMS