MIO qisuariarpoq: Akitsuinerit atornerluinerillu iliuuseqarfigisigit

Nunatsinni meeqqat atugarliortut atugarissaarnerulernissaannut innuttaasut akisussaaffeqalernissaat politikerit naatsorsuutigiinnarsinnaanngilaat.

Meeqqalli amerlasuut atugaat pitsanngortinniarlugit Inatsisartuni Naalakkersuisunilu politikerit aaqqiissuteqarniarlutik siunnersuutissanik suliaqalereertariaqarput.

Meeqqat pisinnaatitaaffiinik sullivik MIO politikerinut ammasumik allakkamini kajumissaarivoq politikerit siunnersuutaat ukiamut ataatsimiinnermi suliarineqartariaqartut.

MIO: Akitsuinerit iliuuseqarfigisigit

MIO-p ilaatigut politikerit kajumissaarpai ulluinnarni inuussutissat akitsuinernut iliuuseqassasut, akitsuinerit meeqqanut pissakinnerusunut eqquingaatsiarmata:

- Angajoqqaat ulluinnarni inuussutissanik pisinissamut akissaqannginneri peqqutaalluni meeqqat kaallutik innartarnerat nerineqaratilluunniit atuariartortarnerat akuerineqarsinnaanngilaq, MIO allappoq.

Aammattaaq hashimik imigassamillu atornerluineq, meeqqat ilaqutariillu inuunerannik aseruisutut inuiaqatigiinnullu kulturimullu tamarmut ajortumik sunniuteqartut, MIO-p oqaaseqarfigai.

AAMMA ATUARUK

Inuiaqatigiinni immikkut ittumik killilersuinerup tungaanut ingerlaarpugut?

- Innersuussutit piareersimapput. Ilissilu iliuuseqartussanngorpusi. Aammattaaq imigassamik/ikiaroornartumillu atornerluinerup, sumiginnaanerup, kinguaassiutitigut kannguttaatsuliorfigitissimanerup, annersagaasimanerup, imminut toqussimanerup kingorna ataasiakkaat ataatsimullu atugarisat sakkortuut qaangernissaannut aaqqiissummik nassaartariaqalerpusi. Ajornartorsiutit tunngavii iliuuseqarfigineqanngippata ajornartorsiutit meeqqanut ernuttanullu ingerlateqqinneqaannartassapput, MIO allappoq.

Pingajuattut perorsaasutut, ilinniartitsisutut, isumaginninnermi siunnersortitut tarnillu pissusaattut nunatsinni sulisinnaanerup soqutiginarnerulernissaanik politikerit sulissuteqarnissaat MIO-p kissaatigaa.

- Sulisummi taakkuupput meeqqat inuusuttullu toqqissisimanartumik ajunngitsumillu peroriartornissaannut atuartinneqarnissaannullu pisariaqartitagut – taakkuuppullu pisariaqartitsisoqartillugu iliuuseqartussat ikiuuttussallu.

- Iliuuseqartariaqarpusi

MIO-p allagai ammasut naalakkersuisup Mads Pedersenip (IA) sapaatip-akunnerani kingullermi tusagassiortunik katersortitsinermini oqariartuutaanut qisuariaataapput. Naalakkersuisoq tusagassiortunik katersortitsinermini innuttaasut inersimasullu tamaasa kajumissaarpai ineriartornerup allanngortinnissaanut meeqqanullu atugarliortunut atugassarititaasunik pitsaanerusunik pilersitsinissamut akisussaaffeqaqqullugit.

MIO-p naalakkersuisup pissutsinik akuersaarneqarsinnaanngitsunik sammisaqarnera ajunngitsumik oqaatigaa, aammali politikkikkut iliuuseqartoqarnissaa piumasaralugu:

- Mads Pedersenillu meeqqanut ikiuunnissatsinnut tapersersuinissatsinnullu tamatta akisussaassuseqartugut oqaaseqarnera ilumoorpoq. Tamannali naammanngilaq. Akisussaaffik innuttaasunut tunniutiinnarsinnaanngilarput. Sumiiffinni maligassiuisut meeqqanik isumaginnissasut naatsorsuutigiinnarsinnaanngilagut.

- Ilissiuvusi, nunatta politikkerii, Inatsisartuni kommunalbestyrelsenilu ilaasortat nutaat – minnerunngitsumillu – Naalakkersuisut nutaat – akisussaaffimmik tigusisussat. Iliuuseqartariaqalerpusilu, MIO kaammattuuteqarpoq.