Ministeriunerup tikeraarnissaa Motzfeldtip isornartorsiorpaa

Naalakkersuisoqatigiit nutaat Katuami tallimanngormat saqqummiunneqarput, ministeriunerlu Mette Frederiksen sapaatip-akunnerani matumani pingasunngornermiit tallimanngornermut Kalaallit Nunaannut tikeraassasoq arfininngornermi nalunaarutigineqarpoq. Mette Frederiksenip USA-mit tatineqarneq pillugu Naalakkersuisut siulittaasussaat Jens-Frederik Nielsen kiisalu naalakkersuisunngortussat allat ataatsimeeqatigissavai.

Ministeriunerullu tikeraarnissaa naalakkersuisunut ilaasortanngortussat ilaannit, Siumup siulittaasuanit Vivian Motzfeldtimit, maanna isornartorsiorneqarpoq.

Tusagassiuutinut nalunaarummi naatsumi tikeraarnissaq "pissusissamisuunngitsutut“ taavaa, tassa Naalakkersuisut suli pisortatigoortumik ivertinneqarsimannginnerat pissutigalugu. Inatsisartut qinersereernerup kingorna ataatsimiinneranni aatsaat tamanna pisarpoq.

- Pissusissamisuunngilaq suli Naalakkersuisut pilersinneqarsimanngitsut ministeriuneq Mette Frederiksen Naalakkersuisunik naapitsiartorluni nunatsinnut angalassappat – pingaartumik nammineq taannaqqissaaq isornartorsiorsimaguniuk, oqariartorluni USA-p naalakkersuisui nunatsinni Naalakkersuisut nutaat pilersinneqarsimatinnagit ornigutissaguni pissusissamisuunngitsoq, Vivian Motzfeldt allappoq, nangillunilu:

- Maannamut suliluunniit Inatsisartut katersortinneqarsimanngillat, aamma qinigaasinnaanermut ataatsimiititaliaq suliaqaqqaartussaassaaq.

Motzfeldt aamma allappoq ataqatigiissumik avammut pissusilersussagutta, inerniliussassaq unaasariaqarpoq, ministeriunerup tikeraarnissaa aatsaat pisinnaasoq Inatsisartut katersuussimalerpata aamma Naalakkersuisut nutaat ivertinneqarsimalerpata.