Múte: KNI-p namminersortunngorsarnissaa misissorneqassaaq

KNI A/S-ip pisiniarfii imminut akilersinnaasumik ingerlanneqarsinnaasut namminersortunngorsarnissaannut periarfissamut nassuiaammik

suliaqarnissamik aalajangiiffigisassatut siunnersuummut saqqummiunneqartumut Naalakkersuisut tigulluarpaat, tamanna Naalakkersuisut siulittaasuata Múte B. Egedep akissuteqaataani atuarneqarsinnaavoq.

Atassutip aalajangiiffigisassatut siunnersuutaa ukiakkut ataatsimiinnermi naammassineqaqqammersumi siullermeerneqarsinnaasimanngilaq, ukiakkulli ataatsimiinnerup immikkoortuata aappaani Inatsisartuni ukiumi nutaami suliarineqarnissaa kinguartinneqarpoq.

Nalunaarusiaq annertusisaq

Nalunaarusiap annertusineqarnissaa Naalakkersuisut kissaatigaat, taamaalillunilu Atassutip siulittaasuata Aqqalu C. Jerimiassenip aalajangiiffigisassatut siunnersuutaa KNI A/S-imi pisiniarfiit tamakkiisumik ilaannakortumilluunniit namminersortunngorsarsinnaanerinut kingunissanik misissueqqissaartoqassaaq.

- Killiffimmik oqaloqatigiissuteqarneq naliliinerlu tamatigut peqqinnartuuvoq. Aalajangiiffigisassatut siunnersuut sammisap qulaajaaffiginissaanut pissutissaqartitsilluarpoq, aamma KNI A/S-p pisiniarfiisa sumiiffinni inuussutissarsiornermut tunngatillugu pitsaasunik inissisimaffiini namminersortunngorsarnerinut ingerlanneqarsinnaanerinut piumasarineqartut periarfissaasariaqarput, Múte B. Egede akissummini allappoq, ilaatigut piginnittuunermut politikki nutaaq marsimi 2023-mi atuutilersoq innersuussutigalugu.

Najugaqarfinni isorliunerusunilu nioqqutissanik aningaaserivinnillu pilersuineq pillugu KNI A/S-mik Naalakkersuisut kiffartuussinissamik isumaqatigiissuteqarput, tassani kiffartuussinermi tunniussat annertussusaat qanoq ittuunerilu aalajangersarneqarlutik, matumani nioqqutissat aalajangersimasut pigiinnarnissaat, akit qaffasissusaat nalunaarusiortussaatitaanerlu ilanngullugit.

- KNI A/S-p pisiniarfii matullugit pitsaasumik sumiiffinni inuussutissarsiornermut tunngatillugu namminersortunngorsarneri iluaqutaalluarsinnaapput kisiannili aamma pitsaanngitsumik kinguneqarsinnaallutik illoqarfimmiunut sullissinerup pilersuinerullu sapinngisamik pitsaanerpaap qulakkeernissaanut tunngatillugu eqqarsaatigilluartariaqassaaq, Naalakkersuisut siulittaasuat allappoq nangillunilu:

Pilersuisussaatitaanermut pisussaaffik

- Suliffeqarfiup aaqqissuussaanerata allanngortitsisinnaanerup nunap ilaani tamani pilersuinerup isumannaatsup allanngorartuunngitsup tatigisassaasullu qulakkeernissaa pisariaqartumik pilersuisussaatitaanermut pisussaaffik sapinngisamik sunniuteqarfigissanngilaa. Tamanna tunngavigalugu Naalakkersuisut misissuineq annertusineqassasoq innersuussutigaat, taamaattumillu ataatsimut ingerlatsinermut, ineriartortitsinermut pilersuisussaatitaanermullu KNI A/S-mi pisiniarfiit namminersortunngorsarsinnaanerinut qanoq kinguneqarumaarnersut, misissueqqissaarnermini isummerfiginninnerminilu ilanngutissallugit.

Múte B. Egedep erseqqissarpaa Naalakkersuisut Atassutip aalajangiiffigisassatut siunnersuutaani siunertaasut tapersersorlugit, “ kisianni ineriartorneq ataatsimut eqqarsaatigalugu sukumiinerusumik annertunerusumillu itisiinermut tunngatillugu misissueqqissaarnerup annertusineqarnissaa kissaatigineqarpoq”.

Tamanna tunngavigalugu Naalakkersuisut allannguutissatut siunnersuuteqarput imatut oqaasertalimmik:

”KNI A/S-ip tamakkiisumik ilaannakortumilluunniit namminersortunngorsarneratigut inuiaqatigiinnut aningaasaqarnikkullu sunniutissat pillugit Naalakkersuisut nalunaarusioqqullugit peqquneqarnissaannik Inatsisartut aalajangiiffigisassaattut siunnersuut. Nassuiaat UPA2025-mi agguaanneqassaaq.”

Atuisut ikiliartorput

KNI A/S-imi aqutsisut siusinnerusukkut mianersoqqusillutik nalunaarsimapput, Namminersorlutik Oqartussallu isumaqatigiissuteqarfigiumavaat, ingerlatseqatigiiffiup pisiniarfiini pisiniartut ikiliartuinnartut pissutigalugit.

KNI-p annaassiniarnissamut pilersaarusiaq utaqqisariaqarpaa

Ukiumi 2000-imiilli ullumimut innuttaasut 6000-inik ikileriarsimapput, tamannalu ingerlatseqatigiiffiup niuernikkut tunngavissaanut unammillernarpoq.

Tamatuma saniatigut Namminersorlutik Oqartussat ingerlatseqatigiiffiutaat millionilikkaanik akeqartumik iluarsartuussinissamut kinguaattooruteqarpoq.

Tatineqarnermi aningaasarsiorluarsinnaassuseq

KNI-p pisortaata Jeppe Jensenip ukiumoortumik nalunaarusiami kingullermi naqissuserpaa ingerlatseqatigiiffiup isertitsisinnaanera tatineqarsimasoq.

- Tamanna KNI-p pisiniarfinnut quersuarnullu aningaasaliissutinik pisariaqartunik nammineq aningaasalersorsinnaaneranut ajornartorsiortitsivoq, taamanikkut pisortaaneq oqarpoq.