Naalakkersuisooqatigiit ullut 100-it atuussimalereerput

- Inuiaqatigiittut annertuumik unammilligassat nalaanniippugut, kisianni tatiginnillungalu nuannaarutigaara, naalakkersuisooqatigiinni allorissaaqatigiilluta innuttaasut pitsaanerpaamik atugassaqartinniarlugit sulisutiginnikkatta, Naalakkersuisut siulittaasuat, Jens-Frederik Nielsen (D) oqarpoq.

Jens-Frederik Nielsenip aamma eqqaamava, qinersinermi oqaluttuarisaanermut ilannguttumi ajugaareerluni Naalakkersuisut siulittaasuattut atuutilernermini siulliullugu suliassarisimasani:

- Qinersineq sioqqullugu qinersisartut suliniutigerusutatsinnut kajungilersinniaqqammerpagut, ajugaallutalu. Issiavissannut nassarpakka pilersaarutit takorluukkallu qanoq iliorluta qinersisartunut neriorsuutigut naammassiniarsinnaassanerlugit. Sulilerlungali aallartikkama suliassaq siulleq uannut tunniunneqartoq tassaavoq orsussap akiinik qaffaasoqarnissaa pillugu Naalakkersuisunut isummerfissiaq, Jens-Frederik Nielsen oqaluttuarpoq nangillunilu:

Aningaasaqarnikkut iluarsaassineqassaaq

- Tamatuma kingorna aamma paasivarput aningaasaqarnikkut periarfissat annikilliartupallassimasut, taamaattumik aqajannguummernaqqaalaarpoq. Taakku qaavatigut aamma nunarsuarmi akit qaffakkiartornerat nunatsinnut apuuppoq, taannalu aamma isumatusaarluta suliariniagassaraarput. Taamaakkaluartoq suliassat eqqissillunga tiguakka, tassami naalakkersuisooqatigiinni ataatsimoorluta sulivugut, ataatsimoorlutalu anguniagaraarput aningaasarsiornikkut aningaasaqarnikkullu nalaatavut qaangerlugit illuatungaani tamatta nukittunerusumik inissinnissarput, Naalakkersuisut siulittaasuat oqarpoq.

Jens-Frederik Nielsen naqissusiivoq naalakkersuisooqatigiit siunertarisaat pingaarneq tassaasoq nunarput innuttaasunut najugaqarfigiuminarnerulersissallugu, ilaatigut innuttaasut aningaasaqarnikkut periarfissarissaarnerulernissaat tassani anguniagaalluni.

- Naalakkersuisunit soorunami maluginiarparput akit qaffakkiartornerisa kingunerisaanik innuttaasut amerlasuut aningaasaqarnikkut ajornartorsiulersimasut. Tassunga tunngatillugu qularutigineqassanngilaq ulluinnagut oqinnerulersinniarlugit tamaviaarluta suligatta.

- Nunarsuarmi akit qaffakkiartornerat, massakkut sakkortuumik eqqugaaffigeqqasarput, sapinngisamik annikillisinniartariaqarparput. Ajornakusoorsinnaagaluartoq, qanoq akinik apparsimaarinnittoqarsinnaanera pillugu iliuusissanik sammisaqarpugut. Aningaasanut inatsisissatut siunnersuut massakkut suliarisarput aqqutigalugu, aammalu eqqussuinerput aningalersuinerpullu siammarterniarlugu sulinitsigut, qularutiginngilara aningaasaqarnikkut periarfissarissaarnerulernissarput angusinnaassagipput, taanna Sermitsiamut oqarpoq.

Vivian sulilluartoq

Apeqqut erseqqissumik akineqarsimanngitsoq tassaavoq Siumup kingullermik ataatsimeersuarnerata sunniutaa qanoq issanersoq. Naalakkersuisunut ilaasortaq, Vivian Motzfeldt Aleqa Hammondimut siulittaasunngorniunnermi ajorsarpoq, taanna qinersisartunit qinigaasimanngilaq, taassumalu saniatigut Erik Jensenip piumasaraa Siumut naalakkersuisooqatigiinnit anissasoq.

- Siusinnerusukkut oqaatigereerpara, uteqqissavaralu, Siumup ataatsimeersuarneranut aammalu tassani aalajangiunneqartunut ataqqinnippugut. Naalakkersuisooqatigiinni suleqatigiinnerput attatiinnarparput, sulinitsinnilu naalakkersuisooqatigiinnermut isumaqatigiissut aallaavigaarput, Siumumit allannguuteqartoqarnissaanik saaffiginnissummik tigusaqarsimanngilanga, taamaattumik sulinitsinnik nangitsissaagut, Naalakkersuisut siulittaasuat Jens-Frederik Nielsen (D) oqarpoq nangillunilu:

- Suleqatigiissutigisagut pingaaruteqaqaat, nunat allat suleqatigalugit ingerlatsinerput  isumagissallugu pingaaruteqarpoq, tassanilu Vivian Motzfeldt (S) sulilluaqaaq, sulininilu naalakkersuisooqatigiinni isumaqatigiissuterput malillugu ingerlappaa, oqareernittullu isumaqatigiissutitta allanngortinneqarnissaanik kissaatinik uannut apuussisoqanngilaq, tamannalu toqqissisimanarpoq.

Suleqatigiinnerit pingaarutillit

Naalakkersuisut Danmarkimut attaveqarnerup nutarterneqarnissaa sulissutigaat, aamma suleqatigiinnerit pioreersut isumagilluarneqarnissaat sulissutigineqarpoq, tamatumalu saniatigut aningaasaliisussanik kajumissaarineq ingerlanneqarluni, taamaalilluni nunap isertitaqarneranut tunngaviit siammarterneqarsinnaallutik, taamaaliornikkut aalisakkanik qalerualinnillu isumalluuteqarnerujussuaq annikillisarniarneqarluni.

Suleqateqarnermut tunngatillugu, Naalakkersuisut ilaatigut pisuutinneqarput allanut pituttorniarpallaartutut, taamaalillunilu nunarput pinngitsuuisinnaajunnaarsarneqarneragaalluni, namminiilivinnissamik sulissutiginninneq tununneqarsimaneragaalluni, tamanna ilumoorpa?

- Naamik, taamaattoqanngilaq. Naleqartitavut aammalu nunatsinni siunissarput pillugu pilersaarutivut taakkuupput, nammineerlutami nunatsinni nammineq pigisatsinni najugaqarpugut. Aningaasaqarnikkut naalakkersuinikkullu namminersulernissaq kissaatigaarput, nunarput siunissami kinguaassatsinnut ingerlateqqinneqarnissaa qulakkeerniarlugu, Naalakkersuisut siulittaasuat naqissusiivoq, nangillunilu:

- Kisianni tamanna oqaatigereerlugu, avatitsinniittunut suleqatiginninnerit nunatsinnut pingaaruteqarluinnarput. Naalakkersuisooqatigiit sulineranni nunarsuarmioqatitsinnut pallittaalisalersortutullusooq pissuseqanngilagut. Piumasaqaatigut kissaaterpullu malillugit suleqatigiinnerit ingerlanneqarnissaat, aammalu kalaallit innuttaasut suleqatigiinnernit annertunerpaamik iluaqutissarsinissaat sulinitsinni tunngaviupput. Kisianni aamma puigussanngilarput suleqatigiinnerit tamarmik illuatungeriinnut aamma pisussaaffiliisarmata.

Naalakkersuisut siulittaasuat, Jens-Frederik Nielsen (D) naggasiullugu innuttaasunut ammasumik oqaloqatigiinnermi peqataanissamut kaammattuuteqarpoq:

- Inuiaqatigiittut pingaarutilinnik aalajangigassaqarpugut, taakkulu aalajangiinerit uagutsinnut minnerunngitsumillu kinguaassatsinnut sunniuteqartussaapput. Taamaattumik nunatsinni sumiiffinni tamani oqaloqatigiinneq pitsaasoq qanittorlu pisariaqartipparput, tassami ataatsimoorluta peqatigiillutalu aatsaat qulakkeersinnaavarput alloriarnerit uagutsinnut siunissamilu innuttaasunut iluaqutaassasut.

Naggataatigut, naalakkersuisooqatigiit pilersinneqarneranit maanna ullut 100-t sinnerlugit qaangiupput, qinersinissamut tullermut ullut 1.300-t missaat qaangiuppata pisussap tungaanut naalakkersuisooqatigiit atassappat?

AAMMA ATUARUK:

Naalakkersuisooqatigiilersussat D, IA, S aamma A-p isumaqatigiissutaat

- Aap, taama naatsorsuutigilluinnarpara. Unammilligassat takkuttuartussaapput, kisianni inuiaqatigiinnik kalaallinik sullissinerput ataatsimoorussamillu anguniagaqarnerput ingerlaannassasoq naatsorsuutigaara tatiginnillungalu, Naalakkersuisut siulittaasuat, Jens-Frederik Nielsen (D) naggasiivoq.