KL

DK

Naalakkersuisut aningaasaqarnermut ataatsimiititaliami ajorsangaarput

Aningaasanut inatsimmi kontot assigiinngitsut 27-t, katillugit 18,43 millionit koruuninik naleqartut, nuunneqarnissaat Inatsisartut Aningaasaqarnermut Akileraartarnermullu Ataatsimiititaliaata decembarip 17-ianni itigartippaa.

Tusagassiortoq
Saqqummersinneqarpoq

Naalakkersuisut juulli sioqqullugu Aningaasaqarnermut Akileraartarnermullu Ataatsimiititaliami ajorsarujussuarput, tassanilu inassutigineqartut ilaat “ naammattumik aningaasaqarnermik aqutsisoqarsimannginneranik suliassat ersersitsipput”.

Suliaq aporaassutaasoq Naalakkersuisut qinnuteqaataannit aallartittoq decembarip sisamaani aningaasaqarnermut ataatsimiititaliamit pissaaneqartumit itigartinneqarpoq, ilinniartitaanermut naalakkersuisoqarfiup kontoinut tunngassuteqartut missingersuutit nussorneqarnerpassui akuerineqassappata ataatsimiititaliap akissuteqartoqarnissaa piumasaqaatigimmagu.

Naalakkersuisut akissutaat naammagineqanngitsut, Aningaasaqarnermut ataatsimiititaliap decembarip 17-iani ataatsimiinnerani kingullermi takuneqarsinnaavoq:

- Ataatsimiititaliaq isumaqarpoq missingersuutinik sippuinerit erseqqissumik pinngitsoortinneqarsinnaasimanngitsut Naalakkersuisut akissuteqaataata uppernarsaraa. Ataatsimiititaliaq isumaqarportaaq naammattumik aningaasaqarnermik aqutsisoqarsimannginnera suliassat ersersikkaat, tamatumalu kingunerisimallugu iliuutsit naammassineqarnerat sioqqullugu pisariaqartumik aningaasaliissuteqarnikkut tunngavissaqarnissaq pissarsiariniassallugu annertuumik ajornarsimasoq, aningaasaqarnermut ataatsimiititaliaq allappoq.

Missingersuusiornermut malittarisassat

Ataatsimiititaliap 2008-mut missingersuusiornermut malittarisassat - decembarip sisamaani aalajangiineq assigalugu - innersuussutigai, tassanilu pingaarnersat issusuunngorlugit issuarpai:

"Siumoortumik aningaasaliliinertaqanngitsumik aningaasartuuteqartoqar­sinnaanngilaq. Iliuusissap ingerlanneqarnissaannut aningaasat inatsimmi imaluunniit inatsimmi tunngavissaanngippat iliuusissap ingerlanneqar­nissaa sioqqullugu aningaasaliinissamut tunngavissaq taamaattumik pissarsia­riniarne-
qa­ssaaq. Taamaattumik ukiumi aningaasaliiffiusup naanerani aningaasaleeqqittoqarnissaa­nik qinnuteqartoqar­niassan­ngilaq, missingersuutigitigut qaangiinissaq­ pinngitsoorneqarsinnaanngitsoq erseqqippat. Missingersuutitigut qaangiinissamut pissutaasoq akerlianik nunatta karsiata naatsorsuutaani naatsorsuutitigut nassuiaatini nassuiarneqassaa­q. Naatsorsuuseriner­mut ilitsersuutini immikkoortumut 7.3-mut innersuussisoqarpoq.

Missingersuutitigut tunngaviit, assersuutigalugu sulisutigut atuineq pillugu missiliuineq imaluunniit isertitanik matussuserneqartunik ingerlataqarnermit isertitat allanngorpata ilassutitut aningaasaliissuteqarnissamik assersuutigalugu qinnuteqartoqassan­ngilaq. Aningaasaliissutini pingaarnertigut siunertaq allanngorpat taamaallaat ilassutitut aningaasaliissuteqarnissanik qinnuteqartoqassaaq."

Aningaasat qinnutigineqartut 29.000 koruuninit 4,7 million koruunit sinnerlugit amerlassuseqarput.

Nalitunerpaat tallimat

Aningaasanik qaffasinnerpaanik Naalakkersuisut qinnutiginniffii tallimat ukuupput:

  1. Campus Kujalleq: 4.740.000 koruunit
  2. Ilinniartut ineqarfissaannik attartortarneq: 3.307.000 koruunit
  3. GUX Nuuk: 2.030.000 koruunit
  4. Inersimasunut ilinniartitaanerit: 1.821.000 koruunit
  5. Nunatta Atuagaateqarfia: 1.629.000 koruunit

Ilinniartitaanermit aningaasanik aallerfiunerpaaffiuniaraluit tallimat ima isikkoqarput:

  1. Tech College Greenland: 4.529.000 koruunit
  2. Niuernermik ilinniarfik: 3.000.000 koruunit
  3. Ingerlatsinermut sillimmatit: 2.718.000 koruunit
  4. Ilinniartitaanernut immikkoortunut pilersaarut: 2.014.000 koruunit
  5. Ilinniartitaanermut siunnersuisoqatigiit: 1.900.000 koruunit

    6. Aningaasat qaffanneqarlutillu appartinneqarneri 18.430.000 koruuninik naleqarput, minnerpaaffianniipporlu “Nunani tamalaani pilersaarutinut suleqatigiittoqarnera pillugu ilinniarnerni paasissutissiisarnernilu nutaaliorneq”, taannami 29.000 koruuniaqqanik naleqarmat.

finans- og skatteudvalget budgetomrokeringer bevillinger inuiaqatigiit økonomistyring naalakkersuisut samfund

ATORFIIT Se alle jobs

Powered by Labrador CMS