Naleraq Kommune Qeqertalimmi suleqatigiinnit anivoq

Naleraq Atassut peqatigalugu Siumumut Kommune Qeqertalimmi borgmesterip allaffianut matuersaammik tunisisimasoq, maanna aalajangerpoq suleqatigiinnissaq suliluunniit aallartinngitsoq qimassallugu.

Tamanna isumaqarpoq Siumut arfinilinnik qinigaatitaqarluni Atassullu ataatsimik qinigaatitaqartoq, maanna ikinnerussuteqalertut, taamaalillutillu borgmesterimik toqqaasinnaajunnaartut, nutaanik suleqatissarsiornermikkut nassaanngikkunik.

Demokraatit sisamanik qinigaatitaqarlutik Inuit Ataqatigiillu pingasunik qinigaatitaqarlutik kiisalu Naleraq ataatsimik qinigaatitalik maanna amerlanerussuteqalerput.

- Suleqatiginiakkat namminneq Siumup iluani iluminni assortuuttutut malunnarsiartuinnarpoq, toqqissisimananngimmat aaqqiisinnaanngimmatalu, ilaatigut borgmester-ip inissaa malunnarmat assut assortuusutaasoq siumukkut iluanni, Jens Vetterlein (N) suleqataajunnaarnertik pillugu ilaatigut tunngavilersuivoq.

Isumaqatigiinniarnerit aallarteqqipput

Pissutsit tassunga killimmata, allaqqunneqarsinnaanngilaq isumaqatigiinniarnerit nutaamik aallartinneqartariaqartut, Siumut Atassullu amerlanerussuteqanngimmata.

Simigaq Heilmann (D) maannangaaq oqaaseqarusunngikkallarpoq Demokraatit sisamanik qinigaatitaqarlutik qanoq inissisimanersut, kisianni oqaloqatigiinnerit aallarteqqinneqarsimasut uppernarsarpaa, taamaattorli killiffik pillugu oqaaseqalaarpoq:

- Pisut malinnaaffigaagut. Siumup Atassutimik Naleraqimillu suleqateqalernissaa sioqqullugu Siumut peqatigalugu oqaloqatigiinneq pitsaasoq ingerlapparput, borgmesteri kinaassanersoq salliutinnagu. Kisianni illuatungiliuttunngorpugut, tamannalu tusaatissatut tigullugu. 

- Kisianni maanna suleqatigiileraluartut avissaartuutilersut malugalugulu malinnaaffigaarput. Tamanna kommunitsinnut innuttaasunut pitsaanngilaq, aammami kommunitsinnut tamarmut pitsaanngilaq, innuttaqassutsikkummi ikiliartornerput mumisinniartussaavarput. Taamaammat politikkikkut aqutsineq tatiginartuusariaqarpoq, innuttaasunit tatigineqarsinnaasoq, Simigaq Heilmann, qinersinermi inuttut qinerneqarnerpaajusoq Sermitsiamut oqarpoq.

Simigaq Heilmann (D) uppernarsaavoq isumaqatigiinniarnerit aallarteqqinneqarsimasut.

Inissititerluni ataatsimiinneq apriilip 30-ani imaluunniit maajip 2-ani

Kristian Jeremiassen (IA) Simigaq Heilmannip oqaasii uppernarsarpai:

- Innuttaasut qitiutillugit kommunalbestyrelsi sulisussaavoq, namminneq iluaqutissaminnik pinnani. Kommunitsinni politikkikkut aqutsinermik piginnaasaqarluartunik pisariaqartitsivugut. Kisianni malugaarput innuttaasut salliunnagit borgmesteritut inissinnissaq pillugu akerleriinnerit pisut.

Kristian Jeremiassen (IA) aamma uppernarsaavoq isumaqatigiinniarnerit aallartinneqarsimasut. 

Tamatuma ilutigisaanik aamma 44-nik ukiulik Kristian Jeremiassen kommunalbestyrelsimi sivisunerpaamik ilaasortaavoq. Taamaattumik taanna kommunalbestyrelsip nutaap inissititerluni ataatsimiinnissaanut qaaqqusisussaavoq.

- Aprilip 30-ani imaluunniit maajip aappaanni kommunalbestyrelsip ataatsimeerngaarnissaa pilersaarutigaara, maajip aallaqqaataa sulisartut nunarsuarmi ullorimmassuk ulloq taanna pisinnaannginnami. Ullorli allanngortinneqarsinnaavoq apeqqutaalluni suleqatigiinnissamik isumaqatigiissusiortoqareersimassanersoq.

Siumut assortuussuteqannginnerarpoq

Naleraq tunuarniarneranut tunngaviusoq Jens Vetterlein naapertorlugu Siumut partiimi annertuumik isumaqatigiinngittoqartoq, Siumullu tassaasussaagaluarpoq partiit suleqatigiit siuttuattut inissisimasoq. 

Aqqa Samuelsen (S), Siumut kommunalbestyrelsimi gruppemi siulittaasoq, tusagassiorfinnut nalunaarutinik arlalinnik nassiussuisarpoq partiimi assortuuttoqannginnerarlugu.

Frantz Lundblad (S), Aqqalu Reimerip borgmesterinngorniarnerminik tunuarniarnerani, borgmesterinngortussaagaluartoq, KNR-imi Qanoruumi ippassaq oqarpoq suli allannguisoqarsinnaasoq, taamaattumillu suli nalunartoq kina borgmesterinngussanersoq, Aqqalu Reimer (S) borgmesterinngorniarluni nalunaaruteqareeraluartoq.

Kisianni tassa maanna Kommune Qeqertalimmi isumaqatigiinniarnerit Nalerap tunuarneratigut ammaanneqaqqipput.