Naleraq: Nunatta nunarsuarmi siuttuusut nammineerluni oqaloqatigisinnaavai
Naleqqap siulittaasua Pele Broberg isumaqarpoq Mette Frederiksen Danmarkimiiginnartariaqartoq Frankrigip præsidentia Emmanuel Macron sapaatiuppat Kalaallit Nunaannut tikeraarpat.
Pele Broberg tassaavoq Naleraq siulittaasuat aamma Inatsisartuni nunanut allanut sillimaniarnermullu politikkimut ataatsimiititaliap tullersortaa.
Foto: Oscar Scott Carl
- Mette, angerlarsimaannarit. Nunatsinniit nammineerluta Macron oqaluussaqqaarparput.
Naleqqap siulittaasua Pele Broberg ministeriunermut Mette Frederiksenimut taama oqariartuuteqarpoq.
Taanna isumaqarpoq Frankrigip præsidentia Emmanuel Macronimit Kalaallit Nunaannut tikeraalerpat Danmarkip ministeriunerata peqataanissaa inissaminiinngitsoq.
- Akuleruttariaqanngikkaluarpoq, angerlarsimaannarniarli. Frankrigip præsidentiata Danmark tikeraarusussimasuuppagu Nunatsinnukarani Danmarkiliassagaluarpoq., Pele Broberg tusagassiuutinut nalunaarummi oqarpoq.
Kunngeqarfiup aaqqissuussaanerani pissutsit atuuttut naapertorlugit nunanut allanut sillimaniarnermullu politikki naalagaaffimmut tunngasutut taaneqarpoq, taamaattumillu tamakkununnga tunngasut oqaluuserineqaraangata qallunaat naalagaaffiannit sinniisumik najuuttoqartussaavoq.
Emmanuel Macron Mette Frederiksenilu pilersaarutit malillugit sapaatiuppat Kalaallit Nunaannut tikeraarpata Naalakkersuisut siulittaasuat Jens-Frederik Nielsen (D) ataatsimeeqatigissavaat, tassanilu naalakkersuisut siuttui pingasut ilaatigut Atlantikup avannaani Issittumilu isumannaallisaanissaq oqaluuserisussaavaat.
Pele Brobergilli kissaatigaa ataatsimiinneq qallunaanit peqataaffigineqassanngitsoq:
- Nunat allat sinniisui Nunatsinnut tikeraassatillugit naalagaaffik sinnerlugu nunatsinniit oqaluunneqassaqqaarput. Miiti angerlarsimaannarit, qallunaanik kilitsissiaanianik oqaluunnitsinni amigaateqanngilagut, Pele Broberg oqarpoq.
