Nittartakkatigut sulisussarsiortarfittaassamut itigartitsissut misissorneqassasoq
Nittartakkatigut sulisussarsiortarfittaassaq, Aningaasaqarnermut Akileraartarnermullu Ataatsimiititaliamit aningaasaliiffiginissaanut itigartinneqartoq, pillugu qanoq sulisoqarsimanersoq naalakkersuisup Bentiaraq Ottosenip (A) allaffeqarfimmut misissoqquaa.
Nittartakkatigut sulisussarsiortarfittaassaq, kalaallit sulisinnaasut pillugit paasissutissiivittut atortussiaammat pitsaasoq, suliaq nukinginnartuusoq, Bentiaraq Ottosen Sermitsiamut oqarpoq
Assi: Oscar Scott Carl
Nittartakkatigut sulisussarsiorfittaassamut nutaamut Naalakkersuisut 4,9 millionit koruuninik aningaasaliissuteqarnissamik qinnuteqaataat Aningaasaqarnermut Akileraartarnermullu Ataatsimiititaliap itigartitsissutigigaa, Sermitsiami sapaatip-akunnerani matumani allaaseraarput.
Nittartakkatigut sulisussarsiorfittaassamut suliaq naalakkersuisup Bentiaraq Ottosenip (A) allaffeqarfimmut misissoqqeqqullugu, ataatsimiititaliallu oqaaseqaatai naapertorlugit "pisariaqartut isumageqqullugit" piumasaqaatigisimallugu, Sermitsiamut allakkatigut akissuteqarluni ilisimatitsivoq.
Kalaallit suliffeqarfiutaat nittartakkatigut sulisussarsiorfittaassamut suliaqarnermut peqataatinneqassasut ataatsimiititaliap piumasaraa. Naalakkersuisut CV-t atorfiillu inuttassarsiorneqartut tamaasa danskit suliffeqarfiannut Jobindeximut ukioq manna siusinnerusukkut nuuppaat. Tamannali Naalakkersuisut naapertorlugit aaqqiissutaagallarneruvoq.
Naalakkersuisoq Bentiaraq Ottosen (A) ataatsimiititaliamut utoqqatsersimasoq Aningaasaqarnermut Akileraartarnermullu Ataatsimiititaliap qanittukkut aalajangiinerani nalunaarummi atuarneqarsinnaavoq. Ataatsimiititaliap eqqunngitsumik paasissutissinneqartannginnissaa pingaaruteqartoq ataatsimiititaliamit aamma erseqqissarneqarpoq.
Utoqqatsertariaqarnermut suna pissutaavinnersoq Sermitsiamit naalakkersuisoq aperaarput:
- Akisussaaffiga ilisimaarigakku suliffeqarnermullu tunngasut uanga akisussaaffigigakkit ataatsimiititaliamut utoqqatsertariaqarsimavunga. Naak suliassaq naalakkersuisoqarfiup akisussaaffigilernissaa sioqqullugu aallartissimagaluartoq, naalakkersuisoqarfillu alla suleqatigalugu suliarineqartoq taamaaliorpunga, Bentiaraq Ottosen allappoq.
