Nunarsuaq tamakkerlugu qarasaasiat attaveerunnerannut pissutaasoq CrowdStrikep paasivaa
Virusimut illersuutip CrowdStrike-p nutarterneqarnerata kingorna, nunarsuaq tamakkerlugu Microsoftip qarasaasiai ajutoorput.
Australiami pisiniarfiit arlallit tallimanngornermi matusariaqarsimapput.
Saeed Khan/Ritzau Scanpix
Tallimanngormat qarasaasiat ajoquteqarnerannut pissutaasoq virusimut illersuummik CrowdStrikemik pilersitsisup paasisimavaa.
CrowdStrike-p ajornartorsiut aaqqinniarpaa.
Ingerlatseqatigiiffiup pisortaanera George Kurtz, inoqatinut attaveqaammi X-imi, taamatut paasissutissiivoq.
Microsoft-imik atuisut CrowdStrike-mik atuisut, ajornartorsiutinik annertuunik eqqugaasimapput. Virusimut illersuutip nutarterisoqareernerata kingorna ajornartorsiutit pilersimapput.
- Tamanna isumannaallisaanermut tunngatillugu ajornartorsiutaanngilaq internettikkullu saassussinerunani. Ajoqut suussuserneqarpoq, matuneqarpoq aaqqinniarneqarlunilu, George Kurtz allappoq.
Atuisut virusimut illersuutip qupperanut isernissai CrowdStrikep innersuuppai, tassani nutartikkat kingulliit nassaarineqarsinnaapput.
Nunani arlalinni timmisartortitseqatigiiffiit, mittarfiit, aningaaseriviit niuertarfiillu ajornartorsiummit eqqugaapput.
Aammattaaq Tuluit Nunaanni Tysklandimilu oqartussaasut, napparsimmaviit nakorsallu eqqugaapput.
Qarasaasiat qaqugu ajoquteqarunnaassanersut ilisimaneqanngilaq.
Qarasaasiat attaveeruttarsimanerannik nalunaarutit siulliit tallimanngornermi ullaaralaakkut Australiameersuupput, taannalu nunat eqqugaanerpaat ilagerpasippaat.
Soorluttaaq timmisartoqarfinni annerusuni arlalinni timmisartumut ikinissamut nalunaarsuisarneq ajornartorsiutaasoq, akiliinermullu atortorissaarutit ajornartorsiutaammata pisiniarfiit matusariaqarsimapput.
Australiami aningaaseriviit aamma eqqugaasimapput.
/ritzau/
