Nunatsinni aallarnisaasunut EU 1 million euronik tunissuteqarpoq
Kalaallit Nunaanni aallarnissaasunut siuarsaanissamut aningasaliissutit isumaqatigiissut pingasunngormat pisortatigoortumik atsioqatigiissutigineqarpoq.
Jutta Urpilainen, EU-kommissæri, pingasunngormat isumaqatigiissusiorpoq EU-mit aningaasaliissutit kalaallit Nunaanni inuussutissarsiornermik aallarnisaasunut atugassanik.
Leiff@sermitsiaq.gl
EU kommissæri Jutta Urpilainen, Nunat tamalaat akornanni peqatigiilluni suleqatigiinnermut kommissærisoq, sapaatip akunnerani matumani pingasunngornermi Nunatsinni aallarnisaasunut aningaasanik imalimmik isumaqatigiissummik atsiorpoq.
Tapersiissutissatut pilersaarut 1 million euronik aningaasartaqassaaq - qallunaat aningaasanngorlugit 7,5 millioni koruunit - aningaasat EU Kommissionimeersuupput, pilersaarutaavorlu Nalik Venture aqutsisuussasoq, taanna tassaavoq Namminersorlutik Oqartussat inuussutissarsiornikkut ineriartortitsinermut ingerlatseqatigiiffiat.
Nalik Ventures allappoq, tapersiissutissatut pilersaarut inuussutissarsiutinut mikisunut akunnattumillu angissusilinnut aaqqissuussinerussasoq, tassungalu ilanngullugu nutaamik aallartisarneqartunut inuussutissarsiortunut sammitinneqartoq.
Aaqqissuussineq taanna Capacity Facilitymik taaguuteqarpoq, siunertarineqarpoq inuussutissarsiutinik ingerlataqartut siunnersorneqarnerisigut, pikkorissartitsinikkut, workshoppertitsinikkut kiisalu ataatsimiittarnerit workshopit aqqutigalugit piginnaasanik annertusaanissamut aqqutissiuusseqataanissaq.
- Aaqqissuussaq ukiuni marlunni ingerlanneqassaaq, tassanilu piginnaasat qaffassarniarpagut, Nalik Venturesimi pisortaq, Thomas "Tyt" Mogensen, Sermitsiamut oqaluttuarpoq.
Siunnersortit sineriammi angalatinneqarsinnaapput
Pisortaq isumaqatigiissut pillugu assut naammagisimaarinnippoq aamma oqaluttuarpoq, aaqqissuussaq aqqutigalugu siunnersortinik piginnaasalinnik, soorlu naatsorsuuserisunik, inatsisilerituunik, siunnersuisartunik il.il. sinerissamut angalatitsisinnaanermik periarfissiisoq, tassani siunnersuineq suli neqeroorutaanngimmat.
- Ullumikkut misigisarput tassaavoq, aallarnisaasut ajornartorsiutisaraat, aningaasaqarnermut allaffissornermullu tunngatillugu aqutsinermut suliassat aaqqissuunneqarnissaat.
- assersuutigiinnarlugu Kalaallit aallarnisaasut akornanni ajornartorsiutaasartut ilagaat, akigititanik aalajangersaaneq, naatsorsuuserinermik pitsaasumik pilersitsineq il.il., Thomas Mogensen nassuiaavoq.
Taanna erseqqissaavoq, EU-mit tapiissuteqartarneq sulianut pioreersunut ilassutitut atorneqassasoq, Nalik Venturesimit aallarnisaasunut neqeroorutigineqartut naapertorlugit pitsaasumik inissisimasoq.
Tigussaasumik assersuuteqassagaanni aallarnisaasut pingasoriarlutik 12.000 kr.-nik tapiiffigineqarsinnaapput. Taassuma saniatigut aamma 350.000 kr.-nik suliniutinut tapiissuteqartoqarsinnaalluni.
Isumaqatigiissut atsiorneqarpoq EU-kommissæri Jutta Urpilainensip Kalaallit Nunaannut tikeraarnerani. Taassumalu tikeraarnermini ilaatigut atuarfiinik ilinniarfeqarfinnillu pulaaroq, taamatuttaaq inuussutissarsiortunik politikerinillu oqaloqateqarluni.
EU-kommissærip tikeraarnera aamma malunnartitsineruvoq EU-p ukioq manna Nuummi allaffeqalersimaneranik.
