Nutarterneqarpoq: Tapersersuilluartoqarnera Jens-Frederik Nielsenip nuannaarutigaa

Frankrigip præsidentia Emmanuel Macron FN-ip ataatsimeersuarnerani ataasinngornermi Kalaallit Nunaat pillugu oqaaseqarami ersaartaanneqangaatsiarpoq.

Ataatsimeersuarneq tassaavoq FN-ip imarpik pillugu ataatsimeersuartitsinera, nunat ilaasortaasut nunarsuarmi imarpik illersorniarlugu ataavartumillu suliniuteqarnissamut ataatsimeersuarnerannik taaneqartartoq.

Franskit præsidentia Kalaallit Nunaat pillugu oqalugiarami sunnertisimangaatsiarpoq, immap naqqani aatsitassarsiortoqarsinnaaneranut atatillugu piujuartitsineq imarsuullu illersorneqarnissaa pillugit oqalugiarnerami:

- Pinngortitami ataqatigiinnerit illersortariaqarpavut, sunik toqqortaateqarnersut ilisimannginnatsigu.

- Erseqqissumik oqarsinnaavunga imartat tuniniarneqassanngillat, Kalaallit Nunaat tuniniarneqassanngilaq, imartallu allat tuniniagassaanngillat, Emmanuel Macron FN-imut oqalugiarnerata tuluttut nutserneqarnera naapertorlugu oqarpoq.

Jens-Frederik Nielsen: Tapersersuilluni oqariartornera sakkortusoq

Naalakkersuisut siulittaasua, Jens-Frederik Nielsen (D), oqalugiarnermi tusarnaartunut ilaavoq, Macronillu tapersersuilluni oqalugiarnera Facebookimi allaatiginnilluni qisuariaateqarfigalugu:

- President Macron oqaaseqarnera tusarnaarpara. Nunarput taperserlugu ersarissumik oqariartorpoq Kalaallit Nunaat tiguneqarsinnaanngilaq imartallu pisiarineqarsinnaanngillat.

- Nuannaarutigaara aammaarluni nunatsinnut taperseeqqimmat, Jens-Frederik Nielsen allappoq nangillunilu:

- Nunarput tatiniarneqaqqaarmalli Frankrig tapersersorpaatigut. Tamanna pisariaqarlunilu nuannaarutissaavoq.

Kalaallit Nunaannut tikeraalersoq

Frankrigip præsidentia USA-p præsidentianut Donald Trumpimut Kalaallit Nunaannik tiguaaniarluni aqutsiniarlunilu oqariartortarnera pillugu arlaleriarluni sakkortuumik isornartorsiuisareerpoq.

Marcon sapaatiuppat Kalaallit Nunaannut tikeraassaaq, ministeriuneq Mette Frederiksen peqatigalugu Naalakkersuisut siulittaasuat Jens-Frederik Nielsen (D) ataatsimeeqatiginiarlugu.

Statsminister Mette Frederiksen tikeraarnermut atatillugu oqarpoq tikeraarneq Europami ataatsimoornermut aamma Kalaallit Nunaannut Kunngeqarfimmillu tapersersuinermut uppernarsaataasoq:

- Nunanut allanut politikkimut tunngatillugu qaammatini kingullerni ilungersunartorsiorfiusuni nunanit tamalaanit Kalaallit Nunaannut Kunngeqarfimmillu tapersersuineq malugissallugu qiimmaallannangaarpoq. Præsident Macronip Kalaallit Nunaannut tikeraarnissaa Europami ataqatigiinnermut uppernarsaatinut ilaavoq, ministeriuneq oqarpoq.

Ataatsimiinnermi nunani allani politikkikkut pissutsit, silap pissusiata allanngoriartornera nukissiuutinillu ataavartunik ineriartortitsineq sammineqassapput.