Nuuk: Suliffissarsiortut ikiliartortuarput
Ukiuni kingullerni sisamani illoqarfiit pingaarnersaanni suliffissaaleqisut ukiut tamaasa ikiliartorsimapput, ukioq mannalu suli taamaassasoq naatsorsuutigineqarpoq.
Annonse
Kommuneqarfik Sermersuumi suliffissaaleqisut ikiliartuinnarput, tamannalu kommunip aningaasaqarneranut sunniuteqarpoq.
Suliffissaaleqisut amerlanerusut suliffittaarnissaannut innersuunneqarnissaat nalunaarsorneqartarnissaallu, Suliffeqarnermut Isumaginninnermullu Ingerlatsivimmit 2023-mi ukkatarineqarpoq. Suliniutit taakku ukioq manna ingerlanneqaqqissasut nalunaarusiami, ingerlatsivimmi pisortap Ejner Grønvoldip ataatsimiititaliap apriilip 18-ani ataatsimiinnerani saqqummiussassaani, allassimavoq.
- Suliffissaaleqisut piginnaasatigut ineriartortinneqarnerisa kingunerisaanik (pikkorissaanerit il. il. iluaqutigalugit) suliffeqarfiillu suleqatiginerisigut suliffissaaleqisut amerlanerit kommunip illoqarfiini nunaqarfiinilu sulilersinnissaat, aammalu inuusuttut suliffissaaleqisut Majoriap neqeroorutaanik ingerlatsinissaannut innersuunneqartarnissaat anguniagaavoq, Ejner Grønvold allappoq.
2023-mi innersuunneqartut:
- Nuuk: 291
- Paamiut: 123
- Tasiilaq: 24
- Ittoqqortoormiit: 0
- Samtlige bygder: 1
Suliffissaaleqisut matchgruppe 2-mi suliniuteqarfigineqarnissaat annerusumik Majoriamit pingaartinneqartoq ilisimatitsissutaavoq.
Nalunaarsuisarneq sukannernerulersinneqarnikoq
- Misiliutaasumik suliniutip siunertarivaa, inuit suliffissaaleqisut inuttut piginnaasatigullu paasiniarneqarnissaat taamaalillugillu ilinniagaqarnissaannut suliffeqalernissaannulluunniit piumassuseqalerniassammata.
Suliffissaaleqisut nutaat tamarmik suliffissaaleqisutut nalunaarsorneqannginnerminni oqaloqatigineqaqqaartalernikuupput.
- Taamatut iliornikkut suliffissaaleqisut sukkanerusumik sulileqqinnissaannut periarfissaqarnerulissapput, attassiinnarnissaminnullu kajumissuseqarlerlutik, oqaatigineqarpoq.
