Nuummi akerliussutsimik takutitsisut: Meeqqavut Danmarkimiittut arsaarinnissutigisaarunnaarniarsigit

Kalaaleq Ivana Nikoline Brønlund paniminik inoorlaamik ataasinngornermi ualikkut pinngitsaalineqarluni arsaarneqarnera inuit akerleralugu Inatsisartut ataatsimiittarfiata saani marlunngornermi katersuupput. Kalaallit Nunaat pillugu ataatsimiititaliami ilaasortat Inatsisartunilu ilaasortat ataatsimiinnissaat nalaarlugu akerliussutsimik takutitsisoqarluni.

Politikerit arlallit akerliussutsimik takutitsisut tusarnaarniarlugit majuartarfinnukaapput, ilaatigut Naalakkersuisut siulittaasuat Jens-Frederik Nielsen (Demokraatit), aningaasaqarnermut akileraartarnermullu naalakkersuisoq Múte B. Egede (IA), meeqqanut, inuusuttunut ilaqutariinnullu naalakkersuisoq Maasi Pedersen (IA), Folketingimut Inatsisartunullu ilaasortaq Aki-Matilda Høegh-Dam (Naleraq) aamma Naleraq sinnerlugu Inatsisartunut ilaasortaq Kuno Fencker. Aamma Kalaallit Nunaat pillugu ataatsimiititaliami ilaasortat arlallit.

Inuit pisinnaatitaaffii Danmarkimi unioqqutinneqarput

Filmiliornermi ilitsersuisoq Aka Hansen akerliussutsimik takutitsinermik aaqqissuussisuuvoq.

Kalaallit Nunaat pillugu ataatsimiititaliamut ilaasortanut ilaatigut ima oqarpoq:

- Qanoq aamma taamaaliorsinnaavisi? Aaqqissuussaaneq ilaqutariinnik avissaartuutsitsiuartoq qanoq ilillusi illersorsinnaavisiuk - amerlanertigut meeqqamut pitsaanerpaaneranik uppernarsaatissaqarasi?

Ivana Nikoline Brønlundip panianik pinngitsaaliissummik arsaarinninneq nunap inoqqaavisa inatsisitigut isumannaatsuunerata navianartorsiorneranut takussutissaasoq erseqqissoq Aka Hansen oqarpoq.

– FKU-t atorlugit misissuutit isorineqaqisut atorunnaarsinneqarnissaat anguniarlugu qaammatit arfinillit qaangiuttut akerliussutsimik takutitsiffigaavut, iluatsillugulu. Taama isumaqarsimagaluarpugut. Maannami kommunit misissuinerit taakku suli atortaraat paasivarput. Nunasiaatilittut aaqqissuussaaneq akiortuarparput, pisinnaatitaaffivullu sorsuutigiuartariaqarlugit. Meeqqat kukkunikkut arsaarinnissutaanikut angajoqqaaminnut uternissaat anguniagaraarput, Aka Hansen Sermitsiamut oqarpoq.

Inatsit nutaaq unioqqutinneqartoq

Aaja Chemnitzip akerliussutsimik takutitsisut aamma oqalugiarfigai. Isumaginninnermut ineqarnermullu ministeri Sophie Hæstorp Andersen Ivanamut suliaq pillugu apeqquteqaatinik ataasinngormat aamma nassiussivoq.

Høje-Taastrup kommunemi kalaallimut angajoqqaamut FKU misissuutit qanittukkut atorneqarsimasut suliami atuarneqarsinnaavoq, VISO-lu peqataatinneqarsimanani. Tamannalu inatsimmik nutaamik unioqqutitsinerusoq. Anaanaasoq inatsit najoqqutarineqartoq malillugu kalaaliusutut taaneqarsinnaanngitsoq kommunalbestyrelsip nalilersimavaa, naak Kalaallit Nunaanni inunngorlunilu kalaaliusutut imminut taagaluartoq. Suliani taamaattuni VISO-p peqataatinneqarnissaa, kommunalbestyrelsillu aalajangiineri nakkutigineqartarnersut ministerip uppernarsarsinnaavaa?

Isumaginninnermut ineqarnermullu ministerip apeqqut suli akinngilaa. Aaja Chemnitzilli kalaallisut oqaaseqarneq kulturilu kommunit eqqarsaatigineq ajoraat tupigusuutigalugu Sermitsiamut oqarpoq, massa inatsit maajip aallaqqaataani akuerineqartoq naapertorlugu pisussaaffigigaluarlugu. Angajoqqaap aqqusaagarisimasai siornatigulluunniit inuusimanera kisiat aallaaviginagu piginnaasaannik pitsanngorsaanissaq aallunnerusariaqaraluaraat taanna isumaqarpoq.

Ministerit ataatsimiittut

Meeqqanut, inuusuttunut ilaqutariinnullu naalakkersuisoq Maasi Pedersen akerliussutsimik takutitsisunut aamma oqalugiarpoq. Taassuma kalaallit meerartaannik pinngitsaaliissummik Danmarkimut arsaarinnittarneq pingaartilluinnarlugu oqaatigaa. Naalakkersuisunngornerminiilli Danmarkimi isumaginninnermut ineqarnermut ministeri ataatsimeeqatiginiarsaralugu aamma oqarpoq.