Nuummi sakkortuumik anoraasuarsuannguuttartumik anoraasuarnissaa aarlerisaarutigineqarpoq
Nuummi anorersuarnissaanik DMI aarlerisaarivoq, pigisanillu teqqaasinnaasunik isumannaarsuinissamik kommune kaammattuuteqarpoq.
Sisamanngorpat unnukkut Nuummi anorlertorujussuussasoq DMI-mit nalunaarutigineqarpoq.
Assiliisoq: Leiff Josefsen
Sisamanngorpat unnukkut Nuup eqqaani sakkortuumik anoraasuassangatinneqarpoq.
Anorersuarnissaanik ilimasaarummik „kategori 1“-imik taaneqartumik, anorersuarnerani sakkortuumik anoraasuarsuannguuttartumik anoraasuarnissaanik DMI ilimasaaruteqarpoq.
Sisamanngornermi nalunaaqutaq 19.00-mit unnukkut nalunaaqutaq 23.00-ip tungaanut aarlerisaarut atuuppoq.
- Anorersuarujussuarmik kujammut 20-23 m/s-imik sakkortussuseqartumik, anoraasuarsuartut sakkortutigisumik 33-35 m/s-imik anoraasuarnissaa DMI-p ilimagaa, DMI nittartakkamini paasissutissiivoq.
Ajoqusertoqarnissaa annikinnerpaaffissamiitinniarlugu innuttaasut avatangiisiminni qanitani atortunik teqqaasinnaasunik isumannaarsuinissaannik kaammattorneqartut, Kommuneqarfik Sermersooq Facebookikkut nalunaaruteqarpoq.
- Tamanna aamma sanaartorfinni sanaartornermut atortunut atuuppoq, Kommuneqarfik Sermersooq allappoq.
