Naaja H. Nathanielsenip ministeriunerup naggueqatigiit pillugit oqaasii aalassassutigai
– Inuup inuiaqatigiinni akuerineqarsinnaaneranut inuiattut kingoqqiffia aalajangiisuussaanngisaannarpoq, Folketingimut ilaasortaq Naaja H. Nathanielsen ministeriuneq Mette Frederiksen pillugu allappoq, Danmark qallunaatut oqaaseqarfiusoq kissaatigalugu innuttaasullu nikerarnerat tapersersornagu taanna podcastimi oqarpoq.
Danskit ministeriunerat Mette Frederiksen BT-mi podcastimi sisamanngornermi peqataavoq, tassanilu inuiaassuseq qallunaajunerlu pillugit oqaaseqarpoq, tamannalu pillugu Folketingimut Inuit Ataqatigiit sinnerlugit ilaasortamut Naja H. Nathanielsenimut Facebookikkut qisuariartitsivoq.
Assi: RADEK MICA/Scanpix
Ministeriunerup Mette Frederiksenip inuiaassuseq qallunaajunerlu pillugit B.T-p podcastiani Borgerlig Tabloid-imi oqaaserisai aalassassutigalugit, Inuit Ataqatigiit sinnerlugit Folketingimut ilaasortaq Naaja H. Nathanielsen Facebookimi allappoq.
"Danmarkip ministeriunerata Mette Frederiksenip inuiattut kingoqqiffik, kulturi upperisarsiornerlu pillugit oqaloriaasia assut aalassassutigaara. Kingullermik BT-podcastiani Borgerlig Tabloid-imi erseqqissarpaa Danmarkimi “naggueqatigiit siulliit” qallunaanik naggueqartut, tamannalu avataaneersunik tikittoqaraangat allanngortartoq. Taamaattumik “nunap inuisa allanik taarserneqarnerat” akerleraa. Taaguut taanna talerperliuniat populistiusut atortarpaat nunasisut nunamik tiguaanerarlugit oqaraangamik", Naaja H. Nathanielsen allappoq, taassuma aamma oqaatigaa pisariaqarsinnaasoq nunasisarnerup unammilligassartai eqqartornissaat, tamanillu peqataaffigineqartumik akuulersitsisoqarnissaanik qulakkeerinninnissaq, eqimattat inuiaqatigiit avataanniittut pilersinneqaqqunagit.
“ Danmarkimili inuup nalinga inuiattut kingoqqiffianit upperisaanillu aalajangerneqartalersorinarpoq. Akuerineqassagaannilu inuttut qanoq ittuunissamut piumasaqaatit sukangalluinnartut naammassisariaqarsorinarput.”
"Taamatut oqaloriaaseqarneq politikkeqarnerlu qangali qaangerneqareersimasussaagaluarput,“ Naaja Nathanielsen (IA) Mette Frederiksenip podcastimi oqaaserisai pillugit oqarpoq.
Assi: Oscar Scott Carl
Oqariartaatsit itsaq atorneqartut
Naaja H. Nathanielsen nangilluni allappoq Kalaallit Nunaanni nunap inoqqaavi inuiaqatigiinnik allanik akulerutsitsisimanngitsuuppata "nungoreersimassagaluarpugut“.
"Nunasiaataasimavugut, ullumikkullu Kalaallit Nunaanni najugallit ilarpassui avataaneersuupput. Tamanna pisariullunilu ajornakusoorpoq. Inuiaqatigiinnili oqartussaaqataaffiusuni inuit timikkut kingornussaat upperisaalluunniit tunngavigalugit nalilersorneqartarnerat aaqqiissutissanngunngisaannassaaq.
Inuit “naggueqatigiinnut siullernut” ilaanersut pingaarnertut isiginiarneqalerpat, innuttaasut “eqqortumik” inuiattut kingoqqiffeqarnissamik piumasaqaammik naammassinninngitsut appisaluunneqarlutillu inuiaqatigiinnit mattunneqartarput.“
Naaja H. Nathanielsen naapertorlugu inuiaassuseq pillugu oqallinneq aamma Kalaallit Nunaanni ingerlanneqarpoq, tamannalu aamma kamassutigisarpaa.
“Taamatut oqaloriaaseqarneq politikkeqarnerlu qangali qaangerneqareersimasussaagaluarput.”
Eqqarsartariaaseq eqqumiitsoq
Tamanna tupigusuutigaa, ministeriunerummi tunngavilersuutaa naapertorlugu nunanit allanit tikittut inuiaqatigiit nikerarnerannut tapersersuippat imaappa kalaaleq qallunaamik meerartaartoq inuiaqatigiinni amerlanerusut kulturiannut akuliulluni innuttaaqatigiinnik nikeriartitsisoq?
"Eqqarsartaaseruna suna?" Naaja H. Nathanielsen allappoq nangillunilu, Danmarkimi qallunaat kulturiat inuiaqatigiinnut tunngaviusoq.
“Kulturili inuiattullu kingoqqiffik ataatsitut isiginissaat mianersorfigisariaqarluinnarparput. Aamma kulturi allanngujuitsuullunilu ataasiinnarmik iluseqartuusorissanngilarput.”
Sermitsiap ministeriuneq oqaaseqartikkumallugu ministeriuneqarfik aamma Socialdemokratit saaffigai maannamulli suli akisimanngilaq.
Oqaluttuarisaanermikkut assigiissuteqartut
Mette Frederiksenip oqaaseqaateqartinnissaa anguniarlugu Sermitsiap Statsministeriaqarfik saaffigaa. Statsministeriaqarfik Socialdemokratinut innersuussivoq, kingornalu partiip politikkikkut oqaaseqartartua, Rasmus Stoklund, aqqutigalugu oqaaseqaammik nassiussisoqarpoq:
"Kalaallit, savalimmiormiut danskillu oqaluttuarisaanermikkut assigiissuteqarput. Inuiaqatigiit akornanni ataqatigiilluarneq atuuppoq, tamannalu naalagaaffeqatigiinni pingaartipparput. Nunanit allaneersorpassuit MENAPT-imi (Kangia Qiterlermi Afrikallu avannaani nunat. aaqq.) ilaasortaasut ataatsimoornermuttaaq ilaapput, ajoraluartumilli amerlavallaartut akulerussuunneqanngillat. Musliimit nunaannit Danmarkimut nunasisut unammilligassaannik Ministeriunerup ukiuni qulikkuutaani, eqqartuinera naleqartitatigut, kulturikkut oqaatsitigullu assigiinngissuteqarnernik unammilligassanillu annertuunik tunngaveqarpoq."