Nuummi sullorsuit 570 millionit koruuninik akeqartussanngortinneqarput
Siorarsiorfimmut sullorsuup pioreersup allilerneqarnissaanik nutaamillu sullorsualiortoqarnissaanik pilersaarutit taamaatinneqanngillat, akiisali nutarterneqarsimanerat nalunaarutigineqarpoq.
Nuussuarmit illoqarfiup qeqqanut ataasiinnarmik ingerlaarfilik sullorsuaq angallaffiungaatsiartarpoq.
Leiff Josefsen
Siorarsiorfiup sullorsuata aqqutaa, illoqarfiup immikkoortortaanut nutaamut Qinngorpumit atassusiisussaq (titarneq aappalaartoq).
Assiliisoq: Kommuneqarfik Sermersooq
Nuummi sullorsuit marluk 570 millionit koruuningajannik akeqartussaapput, tamanna Kommuneqarfik Sermersuup aningaasaqarnermut ataatsimiititaliaanut saqqummiunneqartumi erserpoq.
Nuussuarmi sullorsuaq
Kommuneqarfik Sermersooq
Aqqusinermi sullorsuaq ataasiinnarmik ingerlaarfilik Nuussuarmik illoqarfiullu qeqqanik atassuteqartitsisoq 1970-ikkunni sananeqarpoq. Qaammaqqutiluppoq, aammalu biilertut aqqusinermilu pisuinnaat imminnut qanittuararsuusarput, tamannalu isumannaallisaanermut navianartorsiortitsingaarpoq. Tamatuma saniatigut illoqarfimmi angallanneq annertusiartupiloorpoq, sullorsuarlu marloqiusamik ingerlaarfilik illoqarfimmi biilertut angallannissaannut ajornannginnerulersitsisinnaavoq.
Suliniummut aningaasassaqarpat biilinut marlunnik aqqusinilimmik aammalu pisuinnarnut sikkilertunullu aqqusinilimmik sullorsuup allilerneqarnissaa pilersaarutaavoq, tamannalu 156,5 millionit koruuninik akeqassaaq ukiullu ataatsip qaammatillu arfineq-pingasut ingerlaneranni naammassineqassalluni, tamanna akit piffissallu pilersaarutaasa nutarterneqarneranni erserpoq, taannalu Verkis Grønland ApS-ip kommunimut suliarisimavaa.
Siorarsiorfiup sullorsuaq
Illoqarfiit pingaarnersaasa alliartornera pissutigalugu inissianut nutaanut nunaminertassaqarnerup amigaataanera pillugu, illoqarfiup immikkoortuanik nutaarluinnarmik ilanngussinissamik pilersaarutit 2017-imi illoqarfiup ataatsimiittarfiani annertuumik aaqqissuussinermi kommunimi pisortaasimasup Lars Møller Sørensenip borgmesterillu Asii Chemnitz Narupip saqqummiuppaat.
Kingorna Siorarsiorfimmik ineriartortitsinerup suliniutaanera nikeqqinngimmat, illoqarfik kommunip alliartortippaa.
Qinngorput Siorarsiorfiullu nutaap akornanniittoq sullorsuaq 1.075 meterisut takissuseqassaaq, aqquserngit marluk 130 kvadratmeterisut angissuseqassallutik, sikkilertut pisuinnaallu aqquserngat immikkuussalluni kiisalu illoqarfiup immikkoortuanut nutaamut ledningit pilersuiffissaannik aqquteqassalluni. Biilit 8.000-t ullormut aqqutigisinnaavaat.
Siorarsiorfiup sullorsua
Kommuneqarfik Sermersooq
Akikigisassaanngilarli, tassami 412 millionit koruuneqassaaq. Suliniut pillugu paasissutissat nutartikkat Verkis Grønlandimeersut naapertorlugit, politikkikkut aalajangiisoqarpat ukiut marluk qaammatillu pingasut qaangiuppata naammassineqassaaq.
Suliniutinut marlunnut taakkununnga atatillugu Namminersorlutik Oqartussat aningaasaliissuteqarsinnaanersut misissorneqassasoq, aningaasaqarnermut ataatsimiititaliami politikerit oqarfigineqarput.
