Ombudsmandip Kommune Qeqertalik sulianik arriippallaartumik suliarinnissimaneranik isornartorsiorpaa
Meeqqanut tunngasumik suliami allagaatinik takunnikkumalluni nooqqaassut Kommune Qeqertaliup qaammatit arfineq-pingasut qaangiummata tunniuppaa. Tamanna Inatsisartut Ombudsmandiata isornartorsiorpaa.
Ombudsmandip suliaq 2024-mi decembarip 20-ani naammassivaa, maannali aatsaat tamanut saqqummiuppaa.
Assiliisoq: Morten Okkels
Peqatigiiffik 2023-mi aggustimi Kommune Qeqertalimmi meeqqat marluk angerlarsimaffiup avataanut inissinneqarsimasunut angerlartitsinissamullu suliamut atatillugu allagaatinik takunnikkumalluni noqqaassuteqarpoq.Meeqqap arnaa sinnerlugu allagaatit pillugit paasissutissanik takunnikkumasimapput.
Kommunip 2023-mi decembarimi akissutimini innuttaasumut allamut tunngasut kukkusut nassiuppai. Aatsaat apriilimi 2024-mi kommuni paasissutissanik eqqortunik tunniussinissamik piareerpoq.
Utaqqisitsineq Kommune Qeqertalik isornartorsiuinermik kinguneqarpoq, Inatsisartuni Ombudsmandi suliamut atatillugu piffissaq atorneqartoq naammaginanngitsumik sivisuallaartoq isumaqarpoq.
Ombudsmandip suliamut akuliuttoq
Ombudsmandip sulisui kommunimut arlaleriarlutik paasissutissanik pissarsiniarlutik nukingisaartariaqartarsimavaat. Ombudsmandip Gideon Jeremiassenip piffissap ilaani suliaq aallartinneqanngippat Inatsisartunut nalunaarutiginninnermik kinguneqassasoq kommuni mianersoqqussutigaa.
Kommuni Qeqertaliup mailikkut paasiniaalluni allagaqarnini akineqarsimanngitsoq paasissutissiissutigaa, tamannali Ombudsmandip isornartorsiuineranut allanngortitsinngilaq.
Peqatigiiffiup pineqartup kommuni paasissutissanik attuumassuteqanngitsunik nassiussisimanera pillugu Datatilsynimut nalunaarutigaa.
