POLITIIT

Paamiuni inissiami uiguleriaaniittumi ikuallanneq annertooq

Unnuaq arfininngornerup sapaatillu akornanni Kalaallit Nunaanni Politiinut nalunaarutiginnittoqarpoq Paamiuni inissiami uiguleriaaniittumi ikuallattoqartoq. Inuit marluk inissiami issimasut putsumik iioraasimasinnaanerat pillugu napparsimavimmi nakkutigineqarput.

Nal. 01:46-mi Kalaallit Nunaanni Politiit nalunaarfigineqarput Paamiuni inissiat ilaanni ikuallattoqartoq. Inuit marluk annaanneqarput, taakkulu putsumik iioraasimasinnaanerat pillugu napparsimavimmi nakkutigineqarput.

Kalaallit Nunaanni Politiit nuna tamakkerlugu sapaatip akunnerata naanerani suli ulapaarput, suliallu amerlanerpaat aalakoornartortalinnik imigassartorsimanermik aallaaveqarput.

Ataaserli immikkuullarissuuvoq, tassalu Paamiuni inissiat uiguleriiaaniittu ilaanni ikuallattoqarneranut atatillugu suliaqarneq.

Kalaallit Nunaanni Politiini nakkutilliisuutitat pisortaat, Anette Ostenfeldt oqaluttuarpoq ikuallattoqarnera pillugu nalunaarutiginnittoqarsimasoq arfininngornerup sapaatillu akornanni unnuakkut nal. 01:46.

- Inuit marluk inimi ikuallattumiissimasut putsumik iioraasimasinnaanerat pillugu Paamiuni napparsimmavimmi nakkutigineqarlutik unitsinneqarput. Suli ilisimaneqanngilaq ikuallanneq qanoq aallartissimanersoq, ikuallattoqarneranullu atatillugu paasiniaanerit suli ingerlapput, nakkutilliisut pisortaat Anette Ostenfeldt Sermitsiamut oqaluttuarpoq.

Anette Ostenfeldt aamma oqaluttuarpoq politiit paasitinneqarsimasut kommuni ajornartoornermi saaffissanik pilersitsisimasoq, pisoq pillugu innuttaasut oqaloqateqarnissaminnik pisariaqartitsisut saaffigisinnaasaannik.

Powered by Labrador CMS