TUNNIUSSINISSAMIK QINNUTEQAAMMIK SULIARINNINNEQ
Paul Watson pillugu suliap aalajangerneqarnissaa qanilliartorpoq
Japanimut tunniunneqassava, aniguisitaassava imaluunniit tigummigallarneq sivitsorneqassava? Kalaallit Nunaanni Eqqartuussiviup aalajangiunnikuuaa Paul Watson-ip tigummigallagaanera sisamanngornermut septembarip 5-ata tungaanut sivitsorneqassasoq. Taamaattorli aalajangerneq sioqqullugu, pingasunngornermi septembarip 4-ani suliaq pillugu eqqartuussivimmi ataatsimiittoqassaaq.
Asseq: ABACA
- Kalaallit Nunaanni Eqqartuussivik sisamanngornermi aggustip 15-anni 2024 aalajangerpoq, Captain Paul Watson Foundation-ip pilersitsisua Paul Watson suli tigummigallarneqassasoq suliap tunniussinissamut qinnuteqaatip misissuiffigineqarnerani.
- Kalaallit Nunaanni Eqqartuussivik aalajangerpoq, taassuma tigummigallagaanera sivitsorneqassasoq septembarip tallimaat 2024 tikillugu, tamanna Paul Watsonip illersuisuata Kalaallit Nunaata Eqqartuussisuuneqarfianut suliakkiissutigaa, taamak Kalaallit Nunaanni Politiit aggustip 20-anni nalunaaruteqarnikuupput.
Tigummigallagaanerup sivitsorneqarneratigut Kalaallit Nunaanni Politiit, Unnerluussisussaatitaasut aamma Kalaallit Nunaanni Eqqartuussivik suliaq pillugu piffissaqarnerullutik misissuisinnaanngorput. Maannali Paul Watson pillugu suliap aalajangiiffigineqarnissaa qanillivoq.
Tassami eqqartuussivimmi ataatsimiinneq pissaaq pingasunngornermi septembarip sisamaanni Watsonillu tigummigallarnerata killigaa sisamanngorneq septembarip tallimaat.
Sulinerup ingerlarnga avammut nittarsaanneqanngilaq
Watson Japanimut tunniunneqassava, aniguisitaassava imaluunniit tigummigallarnera sivitsorneqassava? Suliaq qanoq ingerlanneqarpa?
Sermitsiamit Kalaallit Nunaanni Politiini unnerluussisussaatitaasut pisortaat, Mariam Khalil, apeqqutinut akissutissarsiffiginiarlugu saaffigigaluarparput, kisianni suliaq suli ingerlanneqarmat apersorneqarsinnaanngikkallarnerarpoq.
- Taamaattorli ilisimatitsissutigisinnaavara, tunniussisarnermut inatsimmi 1967-imeersumi Kalaallit Nunaannut atuuttumi, suliap qanoq ingerlanneqarnissaa pillugu aalajangersarneqarsimasoq naapertorlugu suliamik ingerlatsivugut, Mariam Khalil Sermitsiamut oqarpoq, nangillunilu:
- Tamanna isumaqarpoq, Justitsministeria (inatsisit atuutsinneqarnerannut ministeriaqarfik) tunniussinissamut qinnuteqaat tunngavigalugu itigartitsissuteqarsinnaanngippat, taava Justitsministeriap qinnuteqaat Kalaallit Nunaanni Politiinut nassiutissavaa, taamaalilluni misissuisoqarsinnaaniassammat, tunniussinissamut piumasaqaatit naammassineqarsimanersut aalajangiiffigineqarsinnaaniassammat, tunniussinissamut inatsit § 12 naapertorlugu. Misissuineq naammassippat, tunniussinissamut apeqqut Justitsministerimut saqqummiunneqassaaq, taassuma aalajangiiffigissavaa, § 15 naapertorlugu.
- Aalajangiisoqarpat tamanna Paul Watsonimut nalunaarutigineqassaaq, taava ullut pingasut iluanni eqqartuussivimmut saqqummiunneqarnissaa taassuma piumasarisinnaavaa, takuuk § 16.
- Aalajangiineq eqqartuussivimmut saqqummiunneqarpat, ilimanaateqarluarpoq siullertut Kalaallit Nunaanni Eqqartuussivimmut saqqummiunneqassasoq, kingornalu Kalaallit Nunaata Eqqartuussisuuneqarfianut suliakkiissutigineqarsinnaalluni. Kingullertut illersuisoq imaluunniit unnerluussisoq Procesbevillingsnævnimut (eqqartuussivitsigut suliat ingerlateqqinneqarnissaannut periarfissat atoreernerini immikkut akuersisartut) qinnuteqarsinnaapput suliap naalagaaffimmi eqqartuussiviit qullersaannut Højesteretimut saqqummiunneqarnissaa.
- Suliaq pineqartoq suleriaasissatut inatsisitigut aalajangiussat naapertorlugit ingerlanneqartoq maanna sumut killinnersoq oqaatigisinnaanngilara, Kalaallit Nunaanni Politiit unnerluussisussaatitaasuisa pisortaat, Mariam Khalil naggataatigut erseqqissaavoq.
