Nalaatsornerinnakkut Paul Watson umiarsuaalu Nuummi umiarsualivimmut tulapput, tassanilu politiinit tigusarineqarpoq.
Umiarsuaq avannaata-kitaanut ingerlaarpoq orsersorniarlunilu tulalluni, Lamya Essemlali, Sea Shepherdip Frankrigimi immikkoortortaqarfiani pisortaasoq, nassuiaavoq. Paul Watsonip tigummigallarneqarnera paasinarsimmat taanna erngerluni Kalaallit Nunaannukarpoq.
Nalaatsornerinnakkut Paul Watson umiarsuaalu Nuummi umiarsualivimmut tulapput, tassanilu politiinit tigusarineqarpoq.
Umiarsuaq avannaata-kitaanut ingerlaarpoq orsersorniarlunilu tulalluni, Lamya Essemlali, Sea Shepherdip Frankrigimi immikkoortortaqarfiani pisortaasoq, nassuiaavoq. Paul Watsonip tigummigallarneqarnera paasinarsimmat taanna erngerluni Kalaallit Nunaannukarpoq.
Tamanna Kalaallit Nunaanni arfanniarnermut attuumassuteqanngitsoq, Lamya Essemlali erseqqissaavoq.
- Kalaallit Nunaat pissutigalugu maaniinngilagut. Orsersuinnarniarluta maaniippugut. Paul Watson suliffissuaqarfiit arfanniarnerinik akiuiniartuuvoq, sermitsiaq.gl-imut oqarpoq, Japanillu arfanniutaasa annersaat Sea Shepherdip sammigaa nassuiarlugu.
Umiarsuaq “Kangei Mauri” 9.300 tonsinik oqimaassusilik sananeqarami 330 millionit koruuninik akeqarsimavoq, tusagassiutillu arlallit naapertorlugit basketballertarfiit marluk angissusiannik naqqani toqoraavittaqarpoq.
Qallunaat naalakkersuisui utaqqineqartut
Orsernermut ingerlaqqinnermullu taarsiullugu suliniaqatigiiffimmik Sea Shepherdimik pilersitsisoq, Paul Watson, tigusarineqarpoq maannalu Nuummi pineqaatissinneqarsimasunut inissiisarfimmi tigummigallarneqarluni, Japanillu 73-inik ukiullip tunniunnissaanik kissaateqarneranut qallunaat naalakkersuisuisa qanoq qisuariarnissaat taassuminnga tapersersuisut utaqqiinnalerput.
Japanimi oqartussat naapertorlugit 2010-mi arfanniat Japanimiut sulineranni Paul Watsonip akornusersuinera pissutigalugu Japanimi tigusassatut nalunaarutigineqarnikuummat, maanna tigummigallarneqarpoq.
Ulluni sapaatip-akunnerinilu Watsonip Nuummi tigusaanerata kingorna, tapersersuisut nuimasut arlallit, ilaatigut Frankrigip præsidentia Emmanuel Macron, ilungersuutigisamik ingerlatsisoq Danmarkimit Japanimut tunniunneqarnissaanik akerliunerat sakkortunerulersimavoq.
Frankrigi Paul Watsonip qamannga pisumik qanitarilluinnagarigaa, aamma Frankrigimiorpassuarnit, ilaatigut politikerinit tapersersorneqartoq, Lamya Essemlali oqaluttuarpoq.
- Paul Watson ilisimaneqartuuvoq inuppassuarnit sapiitsuliortutut isigineqartoq, taamaattumik Danmarkip qanoq iliorniarnera kinguneqarujussuassaaq, taanna oqarpoq.
Eqqartuussissuserisut: Tunniussineq pisinnaatitaaffinnik unioqqutitsinerussaaq
Nunanit quliusunit politikerit 73-it ministeriunermut Mette Frederiksenimut allakkaminni avatangiisinik illersuisoq Paul Watson ingerlaannaq iperagaaqqullugu Danmark kajumissaarpaat.
Allakkat atsiortuisa ilagaat Europap inatsisartuini ilaasortat aamma nunani politikerit Frankrigimeersut, Finlandimeersut, Tysklandimeersut, Østrigimeersut, Hollandimeersut, Belgiameersut, Italiameersut, Spaniameersut Luxembourgimeersullu.
Paul Watsonip eqqartuussissuserisui naapertorlugit Japanimut tunniunnissaa Europami Inuit Pisinnaatitaaffii pillugit Isumaqatigiissummik unioqqutitsinerussaaq, taakkumi naapertorlugit Japanimi inuit pisinnaatitaaffii eqqortinneqanngimmata.
Watsonip suliniuteqarnera killiligaanngitsumik oqaaseqarnissamut tunngatillugu isigineqassaaq, 2012-imiilli Japanip Interpol aqqutigalugu Watson nunani tamalaani ujaarilermagu, maannalu Kalaallit Nunaanni tigusarineqarnerata kingorna, pisut tamarmik taassuma killiligaanngitsumik oqaaseqarsinnaaneranut taamalu inuit pisinnaatitaaffiinut innarliinerupput.
- Japanimiut assigalugit tigusatut Danmarkimi sivisuumik parnaarussaaqqatitsiniarnermut ilanngukkaanni, taava akerliuniat taakkua piumasaatut iliortoqassaaq. Taamaappat ingerlaannaq pillarneqarsinnaaginnarnavianngilatit, aammali ukiuni 15-ini Interpolimit ujaarineqarsinnaavutit, eqqartuussissuserisoq Jonas Christoffersen Ritzauimut oqarpoq.
Lamya Essemlali assinganik isumaqarpoq.
- Japanimut Paul Watson politikkikkut ilisarnaataavoq suujunnaarsinniarneqartoq. Japanimi eqqartuussineq naapertuilluanngitsuliorfigineqarnavianngilaq, Paulilu parnaarussivimmi toqussaaq, taanna mianersoqqusivoq.
Eqqartuussineq aggustip 15-ianni pissaaq.
