Assartuussineq pillugu Isumalioqatigiissitaq 2011-mi erseqqissumik ima oqarpoq.
– Mittarfissuup pingaarnerup Nuummut nuunneqarnissaata imminut akilersinnaanissaanut tunngaviusoq ataaseq pingaaruteqarluinnarpoq, tassa Kangerlussuup matuneqarnissaa. Uani mittarfiit taakku marluullutik ingerlaannarnissaat periarfissaanngilaq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Assartuussineq pillugu Isumalioqatigiissitaq 2011-mi erseqqissumik ima oqarpoq.
– Mittarfissuup pingaarnerup Nuummut nuunneqarnissaata imminut akilersinnaanissaanut tunngaviusoq ataaseq pingaaruteqarluinnarpoq, tassa Kangerlussuup matuneqarnissaa. Uani mittarfiit taakku marluullutik ingerlaannarnissaat periarfissaanngilaq.
»Mittarfissuilli marluk« atuutiinnarnissaannut ingerlavugut.
Nuummi mittarfissuaq nutaaq sisamanngornermi novembarip 28-ani ammarneqassaaq, nunattalu timmisartortitseqatigiiffia Air Greenland takornarialerisorlu namminersortoq Albatros Arctic Circle piffissami marsip 17-ianiit oktobarip 16-ianut 2025-mi Københavnimiit Kangerlussuarmut 62-eriar- luni timmisartuussisarniarput.
Tamannalu Nuummi mittarfiliornissamut aningaasaliissutit milliardilikkaanik naleqartut aningaasaqarniarnerannut akornutaalerpoq: Kangerlussuarmut atlantiku qulaallugu timmisartumut ataaseq ilaappat Nuummut timmisartumut ataaseq ilaasoq amigaataassaaq.
Nalorninartorsiorneq Naleqqap siulittaasuata Pele Brobergip, Aningaasaqarnermut Akileraartarnermullu Ataatsimiititaliami siulittaasup tulliata, ernumassutigaa.
– 2018-imi mittarfiliortiternerit pillugit politikkerit aamma ersarissumik aalajangerput, tassa Nuummi mittarfissap nutaap ammarnerata kingorna Kangerlussuaq atlantikoq qulaallugu timmisartuussiffigineqartarunnaassasoq, tamannalu aalajangerneq tunngaviusumik isumaqatigiissutini tamani Danmarkimut isumaqatigiissutigisimasatsinni ersippoq, Pele Broberg Sermitsiamut oqarpoq.
Taamaattumik §37 naapertorlugu apeqquteqarpoq, tassa Naalakkersuisut isummaminnik allannguisimanersut Kangerlussuarmut atlantikoq qulaallugu angallassisoqaannartarnissaa anguniarlugu – »mittarfissuit marluk« atorneqaannarnissaannut Assartuussineq pillugu Isumalioqatigiissitap mianersoqqussutiginikuusaa.
KANGERLUSSUARMI SINERISSAMI NAKKUTILLIISUT
Kangerlussuarmi ukiup nikinnerani 517-it najugaqarput.
Kangerlussuarmi ukiup tulliani qassinik inoqassanersoq maanna oqaatigineqarsinnaanngilaq; oqaatigineqaannarsinnaavorli Nuummi mittarfissuaq sisamanngornermi novembarip 28-ani ammarneqarpat aamma Kangerlussuarmi suli najugaqartoqassasoq.
– Naleraq inunnut taakkununnga Kangerlussuarmiittunut qanoq iliussava?
– Naleqqap sakkutuunngorniarfik upalungaarsimanermut ilinniarfinngortippaa, taamatullu allannguuteqarnerup kingunerisaanik Kangerlussuarmi sinerissami nakkutilliisut pilersinneqassasut pilersaarusiorpagut, taakku aalisarnermik nakkutilliinermik, imarsiornermik aamma SAR-imik suliaqarnermik suliaqartussatut, Pele Broberg oqarpoq.
Kalaallit Nunaata suliassanik taakkuninga nammineerluni tigusinissaata tungaanut danskit illersornissaqarfiat nunaqavissut piginnaasaannik ineriartortitsinissaat Naleqqap siunnersuutigaa. Susassaqarfinnik, namminersorneq pillugu inatsit atorlugu,
Namminersorlutik Oqartussat angerlaassinissamik akisussaaffigilersinnaasaat aqqutigalugu.
– Naleqqap timmisartoq MP42 Italiamiut timmisartortitseqatigiiffiannit Leonardomeersoq siunnersuutigaa, taanna nunap immikkoortuani mittarfinnik atuisinnaavoq. Taamaalilluta takornariartitsinermut tunngassuteqanngitsumik siunnersuuteqarpugut, mittarfiilli aaqqissuussaanerat pillugu politikki aalajangersimasoq aallaavigalugu, Pele Broberg oqarpoq.
Aqqut sangujoraartoq
Kangerlussuup atlantikoq qulaallugu timmisartuussinermut mittarfittut atorneqarnissaa aamma Naalakkersuisut Greenland Airports - Mittarfeqarfiullu akornanni kiffartuussinissamik isumaqatigiissummut tatisivoq. Kiffartuussinissamik isumaqatigiissut Kangerlussuarmi nunap immikkoortuani mittarfittut atorneqarnissaanut ukiumut 105 millionit koruuninik akeqarpoq, Kangerlussuarmi atlantikoq qulaallugu timmisartuussinissamut mittarfiup atorneqarnissaannut ukiumut 158 millionit koruuninik akeqarluni.
Nunap karsianut 53 millionit koruuninik naleqartoq.
Taamaattumik Pele Brobergip aamma Naalakkersuisut aperai 2025-mi aasakkut Kangerlussuarmut timmisartuussisoqartalerpat Greenland Airports - Mittarfeqarfiit kiffartuussinissamik isumaqatigiissummut tamanna qanoq aningaasatigut kinguneqassanersoq.
– Kangerlussuup nunaqarfittut mittarfittulluunniit siunissaa pillugu Naalakkersuisut allanngorartuartut innuttaasunut iluaqutaanngillat, Pele Broberg apeqqutiminut tunngavilersuivoq.
Namminersorlutik oqartussat imminnut assortorput
2025-mi aasakkut Kangerlussuarmut timmisartuussisoqarnissaanik isumaqatigiissut Albatros Arctic Circlep Air Greenlandillu akornanni atsiorneqarpoq.
Namminersorlutik Oqartussat mittarfinnut ingerlatseqatigiiffiata Greenland Airports - Mittarfeqarfiup Kangerlussuarmi akunnittarfik takornarialerialerisunut namminersortumut Albatros Arctic Circle ApS-imut aggustip aallaqqaataani 2023-mi tunivaa, piginnittullu nutaap soorunami Nuummi mittarfik novembarip 28-ani ammarpat allatut isertitaqarsinnaaneq misissorpaa.
Namminersorlutik Oqartussat timmisartortitseqatigiiffiat Air Greenland Kangerlussuup atlantiku qulaallugu timmisartuussinermut matuneqarnissaanut politikkikkut aalajangiinermut akerliusumik isumaqatigiissuteqartoq Pele Brobergip paasisinnaanngilaa, tamannalu Namminersorlutik Oqartussat Nuummi atlanktikoq qulaallugu timmisartoqarfissaata aningaasaqarneranut ajoqutaammat.
– Suliffeqarfiit pisortanit namminersortumilluunniit pigineqartussat Kangerlussuarmut atlantiku qulaallugu angallassineq pillugu namminneq isumaqatigiissuteqarsinnaappat, imaluunniit Inatsisartut Naalakkersuisullu nunami attaveqarnermut sinaakkutissat aalajangertarpaat?, Pele Broberg aperivoq.
Paasissutissat isertuunneqartut
Air Greenlandip isumaqatigiissuteqarnissartik sioqqullugu Naalakkersuisut attaveqarfigisimaneraat, isumaqatigiissut Naalakkersuisut Greenland Airports - Mittarfeqarfiullu akornanni kiffartuussinissamut isumaqatigiissummut sunniuteqassammat Sermitsiap Air Greenland aperaa. Aamma Albatros Arctic Circlemik isumaqatigiissuteqarnissartik sioqqullugu Greenland Airports.
- Mittarfeqarfiit attaveqarfigisimaneraat, tassami piffissami marsimiit oktobarimut 2025-mi Greenland Airports - Mittarfeqarfiit Kangerlussuarmi sulisuisa amerlassusaannut sunniuteqassammat.
Piffissap killiliussap iluani akissuteqartoqanngilaq.
– Timmisartuutileqatigiiffik Albatros Arctic Circlemik isumaqatigiissuteqarnissani sioqqullugu Naalakkersuisunut akuersititseqqaarsimanngippat Air Greenlandip aqutsisui akisussaassapput, Pele Broberg oqarpoq.
Air Greenland juulip 15-ianni 2025-mi aqqut nutaaq pillugu tusagassiuutinut nalunaaruteqarpoq.
Ineqarnermut attaveqaasersuutinullu naalakkersuisoq Hans Peter Poulsen, Siumut, Air Greenlandimik qaammatit tamaasa ataatsimeeqateqartarluni Sermitsiamut oqarpoq. Juunillu 17-ianni timmisartortitseqatigiiffimmik ataatsimeeqateqarnermini Air Greenlandi Kangerlussuarmut timmisartuussissarnissaq pillugu suliffeqarfimmik isumaqatiginninniartoq, isumaqatigiissullu Kangerlussuarmi suliaqartoqarneranut annertusititsisussamik kinguneqartussaq pillugu naatsumik isertortumik paasitinneqarsimalluni.
Qineqqusaarnerup tungaanut
Kangerlussuup Nuulluunniit mittarfissuartut atorneqarnissaanut apeqqummut Naalakkersuisut isummernerat »taanna/imaluunniit«-mmit »mittarfiit marlunnut«-mmut Pele Brobergip tupigusuutiginngilluinnarpaa.
2021-mi apriilip arfernani qinersisoqarnerata kingorna Inuit Ataqatigiit Nalerarlu naalakkersuisoqatigiilerput, ukiorli ataaseq qaangiummat Naleraq Siumumit taarserneqarpoq. Tassani partiip siulittaasua Erik Jensen ineqarnermut attaveqaasersuutinullu naalakkersuisunngorpoq kingornalu Hans Peter Poulsenimit taarserneqarluni.
– Qinigaaffik naangajalerpoq, Kangerlussuullu siunissaa qineqqusaarnermi sammineqangaatsiassaaq; minnerunngitsumik Qeqqata Kommuniani kommunimut qinersinermi Kangerlussuarmilu nunaqarfinni aqutsisunut qinersinermi. Siumup Kangerlussuup matuneqarnissaa tapersersorlugu qineqqusaarsinnaanngilaq, taamaattumillu Kangerlussuarmu atlantikoq qulaallugu angallanneq aqqutissiuullugu partiip aaqqiissutissarsiorniarsaraa. Mittarfeqarnerulli siunissami aaqqissuussaanissaannut politikkimut akuersissutigineqartumut akerliusumik ingerlasoqarnera Siumumit akisussaaffigineqarpoq, Pele Broberg oqarpoq.
