Illersuisoq Islandimiit ingerlaqqinnaveermat eqqartuussineq aallartinniaasaarpoq. Ataasinngormalli peqataasussat tamarmik Nuummi nalunaaqutaq ataatsimut Eqqartuussisuuneqarfik Sermersuumiipput.
Naalakkersuisunut siulittaasuusimasoq Lars-Emil Johansen suliaqarani kommunip aningaasaataanik aningaasarsisimasoq unnerluussisoq Bo Bjerregaard isumaqarpoq. Kommunimi pisortaasimasoq Lars Møller-Sørensen peqatigalugu tamanna pisimasoq unnerluussisoq isumaqarpoq.
Taamaattumik unnerluussisup angutit taakku marluk peqquserluttutut aamma oqartussaaffimmikk atornerluisutut eqqartuutsikkusuppai. Unnerluussisoq naapertorlugu pineqaatissiissut naapertuuttoq tassaavoq taakku marluullutik pinerluuteqaqqissagaluarunik ukioq ataaseq pineqaatissinneqarsimasunut inissiisarfimmiittussassanngortinneqassasut.
Lars Møller-Sørensen apersorneqartuni siulliuvoq. Lars-Emil Johansen Tasiilami Kofoeds Skolemik nutaamik pilersitsinissamut periarfissanik misissuisussatut atorfinitsinneqartoq, aamma politikkikkut siunnersuisartuusimasoq taanna oqaluttuarpoq. Lars Møller-Sørensenip eqqaamasai aallaavigalugti Lars-Emil Johansen marloriarluni Tasiilamiissimavoq.
Kommunep aamma Lars-Emil Johansenip attaveqatigiinnerat oqallisaangaatsiarpoq. Lars-Emil Johansenip aningaasarsisussat allattorsimaffianniittoq unnerluussisup ilaatigut oqaatigaa, tamannali atorfeqarneranik isumaqarani.
Unnerluussisup Lars-Emil Johansen kommunimi atorfilittut eqqartormagu illersuisut iluarinngilaat, taannami avataaniit siunnersortitut sullissisuummat.
Ilungersunartoq alla aamma pisoq tassaavoq Lars-Emil Johansenip aningaasartuutit kommunimi pisortap nammineq “mailianut” nassiussimagai unnerluussisup eqqaammagu, tamannalu Lars-Emil Johansenip illersuisuata sakkortuumik akerlilerpaa.
- Sulinermut atatillugu e-mailiuvoq, Ulrik Blidorf erseqqissaavoq taamaalillunilu annikitsumik assortuunneq pilluni.
Susoqarsimannginera uppernarsarniaraa
Unnerluussisup Bo Bjerregaardip inissisimaffia nalinginnaanngilaq. Unnerluussisup nalinginnaasumik pisumut aalajangersimasumut, soorlu tillinniarnermut nakuusernermulluunniit, uppernarsaatinik takussutissaqartarpoq.
Bo Bjerregaardili susoqarsimannginneranik, tassa Lars-Emil Johansenip Tasiilami allamiluunniit suliamik tamatuminnga suliaqarsimannginneranik, tunngavilersuisussaavoq.
Taamaattumik Lars-Emil Johansen aningaasarsissaguni isumaqatigiissummi sulerisariaqarneranik allaqqasoqannginnera tikkuarpaa. Lars-Emil Johansenillu aningaasarsiniarluni iliuuseqarsimannginnera apersorlugu erseqqissarniarsaralugu.
– Lars Emil Johansen pingaarnertut oqaatsitigut akissuteqartarsimanera erseqqissaatiginikuuat. Allakkatigut tunniussinikuua, Bo Bjerregaard aperivoq.
- Eqqaamanngilara, uannut pingaaruteqarsimanngilaq, akivoq.
Lars Møller-Sørensenip qanoq ililluni Lars-Emil Johansen ima suliaqarsimatigisimasoq akissarsiai qaffattariaqarlutik paasisimaneraa aamma apeqqutigineqarpoq.
- Suliaq pillugu nalunaartueqartoqarnerani qanoq sivisutigisumik suliarineqarsimasoq paasineqarsinnaavoq, Lars Møller-Sørensen oqarpoq.
Apeqqutit uteqattaarneqarnerat illersuisut naammaginartinngilaat. Eqqartuussisup Stine Dana Lyngep tamanna siunertaqartoq isumaqarpoq. Lars-Møller Sørensenip killisiorneqarnerani akunnerit marluk affarlu sinnerlugit sivisussuseqarpoq.
Sivikinnerusumik killisiorneqartoq
Lars-Emil Johansenip killisiorneqarnera sivikinneruvoq.
- Nalunngilara Lars Møller-Sørensenimik ateqartoqartoq. Suleqatigiinnissarpulli sioqqullugu inuttut ilisarisimanngilara, naalakkersuisunut siulittaasuusimasoq unnerluutigineqartup aappaanut attaveqarnini pillugu oqarpoq.
Ikinngutigiilersimasulli ilanngullugu oqaatigaa.
Lars-Emil Johansenip Lars Møller-Sørensenip oqaatigisaasa ilaat aamma uppernarsarpaa. Attaveqatigiikulasimapput, pingaartumik ataatsimiinnerit aqqutigalugit ilaannikkut sapaatip-akunneranut arlaleriarlutik.
Lars Møller-Sørensenip oqaatigisaa, tassa Tasiilami Kofoeds Skole nutaaq pillugu suliamut tunngassuteqartumik suliaqarsimanera Lars-Emil Johansenip aamma uppernarsarpaa. Suliamut atatillugu Tasiilamiissimanersoq unnerluussisup paaserusuppaa.
- Paasiuminartumik nassuiarneqareermat ilassutissaqanngilanga, Lars-Emil Johansen oqarpoq.
Tasiilami Kofoeds Skolep saniatigut aamma allanik suliaqarsimanersoq Bo Bjerregaard aperaaq.
– Politikkikkut aaqqissuussaaneq pillugu ilisimasaqarluarnera nukittuutigaara, taamaattumik Namminersorlutik Oqartussani oqartussaaffinnilu assigiinngitsuni sunniiniartartutut sulinikuuvunga.
Lars-Emil Johansenilli suliani sukumiisumik itisiliiffigiumanngilai. Taamaaliornissamut aamma pisussaaffeqanngilaq. Illersuisut apeqqutip qanoq ittuunera pillugu akerlileeqqippoq. Unnerluussisup paasisariaqarpaa tamanna itisileqqinneqarsinnaanngitsoq.
Unneqqarissumik suliaq tamanna suliarineqarsimasoq qularutigineqassanngitsoq Lars-Emil Johansen oqarpoq.
- Isumaqatigiissuteqaraangama naammassinissaat pingaartittorujussuusarpara. Isumaqatigiissuteqarsimanngisaannarpunga suliaqarnangalu. Pasilliutigineqartut ilisarisinnaanngilakka, oqarpoq.
Suliaq marlunngornermi pingasunngornermilu ingerlaqqissaaq. Ataasinngornermi ullaakkut kinguaattoorneq pissutigalugu immaqa aamma sisamanngorneq ilanngunneqassaaq. Suliaq pillugu paasissutissiisussat uppernarsaasut arlallit, ilaatigut politikerit, aggersarneqarnikuupput.
