Pissutsit ajortut arlallit ukiumi kingullermi aningaasaqarnermut sunniuteqarsimasut Pinngortitaleriffiup pisortaa Josephine Nymand oqarpoq.
Pinngortitaleriffik 2023-mi umiarsuarnik marlunnik attartortitsinermut 25,2 millionit koruuninik isertitaqarsimavoq, tassungalu sanilliullugit 2024-mi attartortitsinermut isertitat 12 millionit koruuniinnaasimallutik. Tamatuma saniatigut umiarsuaq ilisimatusaat nutaaq Tarajoq ”2019-imi umiarsualiorneq aallartimmat missingersuutigineqartunit annertunerujussuarmik aningaasartuuteqartoq paasineqarpoq”, pisortaq ilisimatitsivoq.
Pissutsit ajortut arlallit ukiumi kingullermi aningaasaqarnermut sunniuteqarsimasut Pinngortitaleriffiup pisortaa Josephine Nymand oqarpoq.
Pinngortitaleriffik 2023-mi umiarsuarnik marlunnik attartortitsinermut 25,2 millionit koruuninik isertitaqarsimavoq, tassungalu sanilliullugit 2024-mi attartortitsinermut isertitat 12 millionit koruuniinnaasimallutik. Tamatuma saniatigut umiarsuaq ilisimatusaat nutaaq Tarajoq ”2019-imi umiarsualiorneq aallartimmat missingersuutigineqartunit annertunerujussuarmik aningaasartuuteqartoq paasineqarpoq”, pisortaq ilisimatitsivoq.
Umiarsuaqarnermik ingerlatsineq akisusoq
- Umiarsuit taakku marluk ingerlanneqarnerat ukiumut 50 millionit koruunit sinnerlugit akeqartarput, taamaalillunilu Pinngortitaleriffimmut Aningaasanut Inatsit aqqutigalugu aningaasaliissutit amerlanersaat taakkununnga tuttarlutik. Taamaattumik Pinngortitaleriffiup aningaasaqarneranut tamarmut aalajangiisuulluinnarpoq ukiut tamaasa aningaasanik amerlanerusunik aningaasaliisoqartarnissaa aamma/imaluunniit umiarsuit taakku marluk attartortinnerisigut isertitat amerlineqartarnissaat, Josephine Nymand Sermitsiamut oqarpoq.
2023-mi umiarsuarmik takornariartaammik kaanngartitsiniarnermi attartortitsinermit isertitat nalinginnaasumiit annertunerujussuuneranniit, 2024-mi avatangiisinut tunngasut siornatigut isertitaqarfiulluartut annaaneqarput.
- 2023-mi Tarajoq aatsitassarsiornermi misissuinermi, ilaatigut imaani itisuumi misissuinermut, attartorneqarpoq. Tamatuma kingorna politikkikkut imaani aatsitassarsiorneq itisuumilu aatsitassarsiorneq mianersornissaq pissutigalugu unitsinneqarallassasoq aalajangerneqarpoq, taamaattumillu aatsitassarsiorfiit taamatut misissuinissamut tunuarsimaalerput. Sanna 2023-mi aalisaatinik imaani annaaneqarsimasunik saliinissamut Avatangiisinut Aningaasaateqarfimmit aningaasaliiffigineqarpoq, 2024-mili aningaasanik qinnuteqaateqarnermi itigartinneqarpoq. Isertitat taakku marluk 2023-mi 7,5 mio. kr.-iupput, Josephine Nymand nassuiaavoq.
Aningaasaliissutit
Pinngortitaleriffik aningaasanut inatsit aqqutigalugu 70 mio. kr.-t missaanniittunik aningaasaliiffigineqartarpoq, taakkulu ingerlatsinermut aalajangersimasunut aamma uumasunik nakkutilliinermut atorneqartarput. Ilisimatusarneq ineriartortitsinerlu avataaneersunit aningaasaliissutinit ilaatigut aningaasaateqarfinnit aningaasalersorneqartarput, taakkulu 2023-mi 72,5 mio. kr.-niullutik.
- Missingersuutini amigartoorutit millionilikkuutaat umiarsuarnik ingerlatsinerit annertuumik aningaasartuutaasut nakkutilliinerillu taamaatiinnarnerisigut taamaallaat matussuserneqarsinnaapput. Tamannali piffissap ingerlanerani aalisakkat pineqartut pillugit paasissutissat amigartoorfiunerannik kinguneqarpoq, Josephine Nymand oqarpoq.
Pinngortitaleriffiup inuiaqatigiit aningaasaqarneranni pingaaruteqarnera Pinngortitaleriffiup pisortaata ima nassuiarpaa:
- Pinngortitaleriffiup umiarsuaata nutaap sanaartornerani Kitaani/Canadami sinerissap qanittuani qaleralinniarnerup misissuiffigineqarnera piffissami ilaani amigaateqarpoq. Tamanna ilisimatuussutsikkut siunnersuinermut paasissutissat tunngavianni nalorninartorsiortitsinermik kinguneqarpoq. Taamaattumik NAFO-p mianersorluni periuseq tunngavigalugu qaleralinniarnissamut siunnersuineq ukiunut 2023-24-mut ukiumut 7.000 tonsinut appartippaa. Paasissutissanik katersineq aatsaat 2022-mi umiarsuaq nutaaq atorlugu aallarteqqinneqarmat 2025-26-mut siunnersuinermi aamma taanna atuuppoq. Kalaallit Nunaannut TAC-p appartinneqarnera aalisarnermut akitsuutinit, A-mut akileraarutinit aamma ingerlatseqatigiiffinnut akileraarutinit annaasaqaataavoq inuiaqatigiillu aningaasaqarnerannut ukiumut 50 mio. kr.-t missaanni annaasaqaataassasoq Aalisarnermut Siunnersuisoqatigiinni inuussutissarsiortut nalilerpaat. Ukiut sisamat ingerlaneranni aningaasat amerlasuut pineqarput.
2025-mi umiarsuarmik attartortitsinerit pingasut
Umiarsuit akisuut attartortinnissaat Pinngortitaleriffiup aningaasaqarneranut pingaaruteqarpoq, 2025-mullu pingasunit attartorneqarnissaat pilersaarutigineqarpoq:
- Amerikamiut ilisimatusartut
- Tyskit aalisarnermik misissuisartut misissuinerat Pinngortitaleriffiup misissuineranut assingulluinnarpoq
- Canadamiut aalisarnermik misissuiartortut misissuinerat Pinngortitaleriffiup misissuineranut assingulluinnarpoq
Suliassat tamakku aningaasaqarnerup ingerlalluarnissaanut naammanersut nalornissutigineqarpoq.
- Pingasoriarluni attartortitsisoqaraluarpalluunniit naatsorsuutigineqarsinnaavoq siulersuisut pingaarnersiuinerat apeqqutaalluni sipaarniartoqartariaqartoq, pisortaq Josephine Nymand oqarpoq, erseqqissarlugulu pinngortitaleriffiup nammineq misissuinera attartortitsinermit "soorunami pingaarnersiuineq“.
