Politiit kissaataat: Ikiaroorsimatilluni biilerneq pinerluttuliornertut pineqaatissiissutaasalerli
Cannabisimik atornerluineq Kalaallit Nunaanni aqqusinermi angallannermi isumannaatsuunermut navianartorsiortitsivoq, Kalaallit Nunaanni Politiit naqissusiipput, aallu ikiaroornartumik akoqartillugu biilerneq pinerluttuliornertut pineqaatissiissutaasalernissaa piffissanngortoq isumaqarput.
Leiff Josefsen
Akuerisamik biilersinnaajumalluni aak ikiaroornartumik qanoq annertutigisumik akoqassanersoq Kalaallit Nunaanni Danmarkimitulli malittarisassaqanngilaq.
- Ikiaroorsimatilluni ikiaroornartunillu allanik inerteqqutaasunik pisimatilluni biilernermut malittarisassat Danmarkimisulli Kalaallit Nunaanni atuuttariaqartut, Kalaallit Nunaanni Politiit isumaqarput, Kalaallit Nunaanni Politiit Sermitsiamut ilisimatitsipput.
Kalaallit Nunaanni Politiit qaqugu ikiaroornartumik uuttuisartunik atortulerneqarsinnaanersut, IA sinnerlugu Folketingimut ilaasortap Aaja Chemnitzip angallannermut ministeri Thomas Danielsen aperisimavaa. Politiit naapertorlugit inatsisit atuutilerpata ikiaroorsimatillunilu biilerneq pillaatisissutaasinnaalerpat, aatsaat ikiaroornartumik uuttuisartunik pisariaqartitsisoqalissaaq.
Politiit ilanngullugu nassuiaatigaat inatsisit assigiinngitsiginerat qanoq pissusissamisuunngitsiginersut:
- Aammattaaq Danmarkimi ikiaroornartumik aap akoqarnera pissutigalugu biilersinnaanermut allagartamik arsaarneqarsimasoq assersuutissaavoq, tassami Kalaallit Nunaanni biilersinnaanermut allagartamik arsaarneqarneq atuutinngimmat, ikiaroorsimatillunimi biilernermut tunngatillugu Kalaallit Nunaanni assingusunik malittarisassaqanngimmat. Taamaattumik pineqartoq kalaallisut biilersinnaanermut allagartaqalersinnaavoq, imaluunniit kalaallisut biilersinnaanermut allagartaqarnera suli atuussinnaavoq, Kalaallit Nunaanni Politiit nassuiaapput.
Ikiaroornartumik sunnerneqarsimatilluni biilerneq Danmarkimisut inerteqqutaalissappat „ikiaroornartumik sunnerneqarsimanermut uuttuinermut atortut qanoq amerlatigisut pisiarineqassanersut misissorneqarumaarpoq".
